Latest News
ਆਲੂ ਦੀ ਬਰਾਮਦ 'ਤੇ ਰੋਕ ਨੇ ਕਿਸਾਨ ਝੰਬੇ
By ਜਲੰਧਰ (ਸ਼ੈਲੀ ਐਲਬਰਟ)

Published on 07 Aug, 2015 11:26 AM.

ਆਲੂ ਦੀ ਬਰਾਮਦ ਉੱਤੇ ਰੋਕ ਲੱਗੀ ਹੋਣ ਕਾਰਨ ਪੰਜਾਬ ਦੇ ਕਿਸਾਨਾਂ ਨੂੰ ਪਿਛਲੀ ਫਸਲ ਦਾ ਆਲੂ ਵੇਚਣ ਵਿੱਚ ਹੀ ਭਾਰੀ ਔਖਿਆਈ ਹੋ ਰਹੀ ਹੈ, ਜਦੋਂ ਕਿ ਸਤੰਬਰ ਮਹੀਨੇ ਵਿੱਚ ਆਲੂ ਦੀ ਨਵੀਂ ਫਸਲ ਆਉਣੀ ਸ਼ੁਰੂ ਹੋ ਜਾਵੇਗੀ। ਪਿਛਲੇ ਸੱਤ ਮਹੀਨਿਆਂ ਵਲੋਂ ਕਿਸਾਨਾਂ ਦਾ ਲੱਗਭੱਗ 22 ਲੱਖ ਟਨ ਆਲੂ ਕੋਲਡ ਸਟੋਰਾਂ ਵਿੱਚ ਪਿਆ ਹੈ ।ਨੁਕਸਾਨ ਨੂੰ ਵੇਖਦੇ ਹੋਏ ਕਿਸਾਨਾਂ ਨੇ ਅੱਜ 500 ਕੁਇੰਟਲ ਆਲੂ ਲੋਕਾਂ ਨੂੰ ਮੁਫਤ ਵੰਡ ਦਿੱਤੇ । ਜਨਵਰੀ ਅਤੇ ਫਰਵਰੀ ਮਹੀਨੇ ਵਿੱਚ ਬੇਮੌਸਮੀ ਮੀਂਹ ਕਾਰਨ ਕਿਸਾਨਾਂ ਨੂੰ ਪਹਿਲਾਂ ਹੀ ਕਾਫ਼ੀ ਨੁਕਸਾਨ ਝੱਲਣਾ ਪਿਆ ਸੀ ਅਤੇ ਬਚੀ ਹੋਈ ਫਸਲ ਨੂੰ ਖਰਾਬ ਹੋਣ ਤੋਂ ਬਚਾਉਣ ਲਈ ਕੋਲਡ ਸਟੋਰਾਂ ਵਿੱਚ ਰੱਖ ਕੇ ਉਲਟਾ ਆਰਥਕ ਨੁਕਸਾਨ ਉਠਾਉਣਾ ਪੈ ਰਿਹਾ ਹੈ। ਉਹਨਾ ਕਿਹਾ ਕਿ ਸਰਕਾਰ ਕਿਸਾਨਾਂ ਨੂੰ ਕੋਈ ਵੀ ਰਾਹਤ ਦੇਣ ਵਿੱਚ ਅਸਫਲ ਰਹੀ ਹੈ। ਪਿਛਲੇ ਸਾਲ ਜਦੋਂ ਆਲੂ ਦੀ ਕੀਮਤ ਵੱਧ ਸੀ ਤਾਂ ਕੇਂਦਰ ਸਰਕਾਰ ਨੇ ਮੰਗ ਅਤੇ ਆਪੂਰਤੀ ਨੂੰ ਬਣਾਈ ਰੱਖਣ ਲਈ ਆਲੂ ਦੀ ਅੰਤਰਰਾਸ਼ਟਰੀ ਬਰਾਮਦ ਉੱਤੇ ਰੋਕ ਲਾ ਦਿੱਤੀ ਸੀ, ਜਿਸ ਕਾਰਨ ਆਲੂ ਦੀ ਕੀਮਤ ਵਿੱਚ ਭਾਰੀ ਕਮੀ ਆ ਗਈ। ਕਿਸਾਨਾਂ ਨੂੰ ਆਪਣੀ ਲਾਗਤ ਦਾ 25 ਫੀਸਦੀ ਵੀ ਪ੍ਰਾਪਤ ਨਹੀਂ ਹੋ ਸਕਿਆ ਸੀ। ਆਲੂ ਉਤਪਾਦਕ ਐਸੋਸੀਏਸ਼ਨ ਦੇ ਸੀਨੀਅਰ ਆਗੂ ਜਸਵਿੰਦਰ ਸਿੰਘ ਸੰਘਾ ਨੇ ਦੱਸਿਆ ਕਿ ਆਲੂ ਬੀਜਣ ਵਿੱਚ ਪ੍ਰਤੀ ਕਿੱਲੋ ਅੱਠ ਤੋਂ ਦਸ ਰੁਪਏ ਦੀ ਲਾਗਤ ਆਉਂਦੀ ਹੈ, ਜਦੋਂ ਕਿ ਉਨ੍ਹਾਂ ਨੂੰ ਤਿੰਨ ਤੋਂ ਚਾਰ ਰੁਪਏ ਪ੍ਰਤੀ ਕਿਲੋ ਬਾਜ਼ਾਰੀ ਭਾਅ ਮਿਲ ਰਿਹਾ ਹੈ। ਆਲੂ ਵੇਚਣ ਵਾਲੇ ਦਸ ਤੋਂ 15 ਰੁਪਏ ਪ੍ਰਤੀ ਕਿਲੋ ਆਲੂ ਵੇਚ ਕੇ ਭਾਰੀ ਮੁਨਾਫਾ ਕਮਾ ਰਹੇ ਹਨ ।
ਪੰਜਾਬ ਵੱਲੋਂ ਆਲੂ ਪਾਕਿਸਤਾਨ, ਪੱਛਮੀ ਬੰਗਾਲ, ਕਰਨਾਟਕ ਅਤੇ ਉੱਤਰ ਪ੍ਰਦੇਸ਼ ਨੂੰ ਬਰਾਮਦ ਕੀਤਾ ਜਾਂਦਾ ਹੈ, ਪਰ ਇਸ ਵਾਰ ਭਾਰੀ ਫਸਲ ਹੋਣ ਕਾਰਨ ਇਹਨਾਂ ਰਾਜਾਂ ਵੱਲੋਂ ਵੀ ਆਲੂ ਦੀ ਮੰਗ ਨਹੀਂ ਆ ਰਹੀ ।ਪਾਕਿਸਤਾਨ ਨੇ ਵੀ ਆਲੂ ਦੀ ਦਰਾਮਦ ਉੱਤੇ ਭਾਰੀ ਟੈਕਸ ਲਾ ਦਿੱਤਾ ਹੈ।
ਕਿਸਾਨਾਂ ਦਾ ਕਹਿਣਾ ਹੈ ਕਿ ਆਲੂ ਬੀਜਣ ਦੇ ਸਮੇਂ ਇਸ ਦੀ ਕੀਮਤ 1600 ਰੁਪਏ ਪ੍ਰਤੀ ਕੁਇੰਟਲ ਸੀ, ਹੋਰ ਰਾਜਾਂ ਵੱਲੋਂ ਮੰਗ ਨਾ ਹੋਣ ਦੇ ਕਾਰਨ ਵੇਚਣ ਦੇ ਸਮੇਂ 200 ਰੁਪਏ ਪ੍ਰਤੀ ਕੁਇੰਟਲ ਹੀ ਰਹਿ ਗਈ । ਪਹਿਲਾਂ ਸਰਕਾਰ ਨੇ ਪਾਕਿਸਤਾਨ ਨੂੰ ਆਲੂ ਬਰਾਮਦ ਕਰਣ ਦੀ ਇਜਾਜ਼ਤ ਦੇ ਦਿੱਤੀ, ਪਰ ਕੁਝ ਹੀ ਦਿਨਾਂ ਬਾਅਦ ਇਸ ਨੂੰ ਬੰਦ ਕਰ ਦਿੱਤਾ ਗਿਆ, ਜਿਸ ਨਾਲ ਪੰਜਾਬ ਵਿੱਚ ਆਲੂਆਂ ਦੇ ਅੰਬਾਰ ਲੱਗ ਗਏ ਹਨ।
ਬਾਗਬਾਨੀ ਅਧਿਕਾਰੀ ਡਾਕਟਰ ਸਤਵੀਰ ਸਿੰਘ ਨੇ ਦੱਸਿਆ ਕਿ ਕੋਲਡ ਸਟੋਰ ਵਿੱਚ ਕੇਵਲ ਬੀਜ ਵਾਲਾ ਆਲੂ ਹੀ ਪਿਆ ਹੈ ਅਤੇ ਇਸ ਦੀ ਵਿਕਰੀ ਸਤੰਬਰ ਮਹੀਨੇ ਵਿਚ ਸ਼ੁਰੂ ਹੋਵੇਗੀ। ਸ੍ਰੀ ਸੰਘਾ ਨੇ ਦੱਸਿਆ ਕਿ ਘਾਟੇ ਨਾਲ ਨਿਬੜਨ ਲਈ ਉਹਨਾ ਕੋਲ ਕੋਈ ਦੂਜਾ ਸਾਧਨ ਨਾ ਹੋਣ ਕਾਰਨ ਉਨ੍ਹਾ ਨੇ ਫੈਸਲਾ ਕੀਤਾ ਹੈ ਕਿ ਉਹ ਸਾਰਾ ਆਲੂ ਲੋਕਾਂ ਨੂੰ ਮੁਫਤ ਵੰਡ ਦੇਣਗੇ। ਜਲੰਧਰ ਵਿੱਚ ਅੱਜ 500 ਕੁਇੰਟਲ ਆਲੂ ਮੁਫਤ ਵੰਡ ਕੇ ਉਨ੍ਹਾ ਇਸ ਦੀ ਸ਼ੁਰੂਆਤ ਕੀਤੀ ਹੈ ਅਤੇ ਕਿਹਾ ਕਿ ਆਲੂ ਖਤਮ ਹੋਣ ਤੱਕ ਉਹ ਰੋਜ਼ਾਨਾ ਮੁਫਤ ਵੰਡਦੇ ਰਹਿਣਗੇ।
ਜਲੰਧਰ ਆਲੂ ਉਤਪਾਦਕ ਐਸੋਸੀਏਸ਼ਨ (ਜੇ ਪੀ ਸੀ ਏ) ਨੇ ਮੰਗ ਕੀਤੀ ਕਿ ਆਲੂ ਦੀ ਬਰਾਮਦ ਉੱਤੇ ਲੱਗੀ ਰੋਕ ਨੂੰ ਹਟਾਇਆ ਜਾਵੇ ਅਤੇ ਆਲੂ ਬੀਜਣ ਵਾਲੇ ਕਿਸਾਨਾਂ ਦੇ ਕਰਜ਼ੇ ਮਾਫ ਕੀਤੇ ਜਾਣ, ਤਾਂ ਕਿ ਕਿਸਾਨਾਂ ਨੂੰ ਆਤਮ-ਹੱਤਿਆ ਕਰਨ ਵੱਲੋਂ ਰੋਕਿਆ ਜਾ ਸਕੇ।

947 Views

Reader Reviews

Please take a moment to review your experience with us. Your feedback not only help us, it helps other potential readers.


Before you post a review, please login first. Login
e-Paper