ਨਵੀਂ ਦਿੱਲੀ : ਭਾਰਤੀ ਕਮਿਊਨਿਸਟ ਪਾਰਟੀ (ਸੀ ਪੀ ਆਈ) ਨੇ ਸੋਮਵਾਰ ਉਨ੍ਹਾਂ ਰਿਪੋਰਟਾਂ ਦੀ ਸਖਤ ਨਿੰਦਾ ਕੀਤੀ, ਜਿਨ੍ਹਾਂ ਵਿੱਚ ਕਿਹਾ ਗਿਆ ਸੀ ਕਿ ਜਾਸੂਸੀ ਦੇ ਦੋਸ਼ਾਂ ਵਿੱਚ ਗਿ੍ਰਫ਼ਤਾਰ ਯੂਟਿਊਬਰ ਜਿਓਤੀ ਮਲਹੋਤਰਾ ਨੂੰ ਕੇਰਲਾ ਸਰਕਾਰ ਵੱਲੋਂ ਰਾਜ ਵਿੱਚ ਸੈਰ-ਸਪਾਟੇ ਨੂੰ ਉਤਸ਼ਾਹਤ ਕਰਨ ਲਈ ਸੱਦਾ ਦਿੱਤਾ ਗਿਆ ਸੀ। ਸੀ ਪੀ ਆਈ ਦੇ ਸੰਸਦ ਮੈਂਬਰ ਪੀ ਸੰਤੋਸ਼ ਕੁਮਾਰ ਨੇ ਇੱਕ ਬਿਆਨ ਵਿੱਚ ਕਿਹਾ, ‘ਭਾਰਤੀ ਕਮਿਊਨਿਸਟ ਪਾਰਟੀ ਜਿਓਤੀ ਮਲਹੋਤਰਾ ਜਾਸੂਸੀ ਮਾਮਲੇ ਵਿੱਚ ਭਾਜਪਾ ਵੱਲੋਂ ਕੇਰਲਾ ਸਰਕਾਰ ਨੂੰ ਘੜੀਸਣ ਦੀ ਕੋਸ਼ਿਸ਼ ਦੀ ਸਖਤ ਨਿੰਦਾ ਕਰਦੀ ਹੈ, ਇਹ ਇਸ ਲਈ ਕੀਤਾ ਜਾ ਰਿਹਾ ਹੈ ਤਾਂ ਜੋ ਕੌਮੀ ਸੁਰੱਖਿਆ ’ਤੇ ਆਪਣੀਆਂ ਗੰਭੀਰ ਅਸਫਲਤਾਵਾਂ ਨੂੰ ਛੁਪਾਇਆ ਜਾ ਸਕੇ।’
ਕਾਮਰੇਡ ਕੁਮਾਰ ਨੇ ਕਿਹਾ ਕਿ ਇਹ ਸੁਝਾਅ ਦੇਣਾ ਬੇਤੁਕੀ ਗੱਲ ਹੈ ਕਿ ਇੱਕ ਰਾਜ ਸਰਕਾਰ ਇੱਕ ਯੂਟਿਊਬਰ ਦੇ ਪਾਕਿਸਤਾਨ ਦੌਰੇ ਲਈ ਜ਼ਿੰਮੇਵਾਰ ਸੀ, ਜਦੋਂਕਿ ਪਾਸਪੋਰਟ ਜਾਰੀ ਕਰਨਾ, ਵੀਜ਼ਾ ਕਲੀਅਰੈਂਸ ਅਤੇ ਖੁਫੀਆ ਨਿਗਰਾਨੀ ਸਭ ਕੇਂਦਰ ਸਰਕਾਰ ਦੇ ਨਿਯੰਤਰਣ ਅਧੀਨ ਹਨ। ਉਨ੍ਹਾ ਸਵਾਲ ਕਰਦਿਆਂ ਕਿਹਾ, ‘ਕੀ ਕੇਰਲਾ ਸਰਕਾਰ ਨੇ ਉਸ ਦੇ ਪਾਕਿਸਤਾਨ ਦੌਰਿਆਂ ਨੂੰ ਮਨਜ਼ੂਰੀ ਦਿੱਤੀ? ਕੀ ਉਸ ਨੇ ਉਸ ਨੂੰ ਦਿੱਲੀ ਵਿੱਚ ਆਈ ਐੱਸ ਆਈ ਹੈਂਡਲਰਾਂ ਦੇ ਸੰਪਰਕ ਵਿੱਚ ਰੱਖਿਆ? ਇਹ ਇੱਕ ਨਿਰਾਸ਼ਾਜਨਕ ਅਤੇ ਰਾਜਨੀਤਕ ਤੌਰ ’ਤੇ ਭਟਕਾਉਣ ਨਾਲ ਪ੍ਰੇਰਤ ਹੈ।’
ਸੰਸਦ ਮੈਂਬਰ ਨੇ ਕਿਹਾ ਕਿ ਭਾਜਪਾ ਕੋਲ ਜਾਸੂਸੀ ਅਤੇ ਅੱਤਵਾਦ ਨਾਲ ਜੁੜੇ ਆਪਣੇ ਮੈਂਬਰਾਂ ਦੀ ਸ਼ਰਮਿੰਦਗੀ-ਭਰੀ ਇੱਕ ਲੰਮੀ ਸੂਚੀ ਹੈ। ਉਨ੍ਹਾ ਕਿਹਾ, ‘ਭੋਪਾਲ ਵਿੱਚ ਇਨ੍ਹਾਂ ਦੇ ਆਈ ਟੀ ਸੈੱਲ ਤੋਂ ਧਰੁਵ ਸਕਸੈਨਾ, ਬਜਰੰਗ ਦਲ ਦਾ ਬਲਰਾਮ ਸਿੰਘ, ਐੱਲ ਈ ਟੀ ਅੱਤਵਾਦੀ ਤਾਲਿਬ ਸ਼ਾਹ, ਜਿਸ ਨੂੰ ਭਾਜਪਾ ਘੱਟ ਗਿਣਤੀ ਮੋਰਚਾ ਆਈ ਟੀ ਮੁਖੀ ਨਿਯੁਕਤ ਕੀਤਾ ਗਿਆ ਸੀ ਅਤੇ ਸਾਬਕਾ ਭਾਜਪਾ ਨੇਤਾ ਤਾਰਿਕ ਮੀਰ, ਜਿਸ ਨੂੰ ਅੱਤਵਾਦੀਆਂ ਨੂੰ ਹਥਿਆਰਾਂ ਦੀ ਸਪਲਾਈ ਲਈ ਗਿ੍ਰਫਤਾਰ ਕੀਤਾ ਗਿਆ ਸੀ। ਇੱਥੋਂ ਤੱਕ ਕਿ ਡੀ ਐੱਸ ਪੀ ਦਵਿੰਦਰ ਸਿੰਘ, ਜਿਸ ਨੂੰ ਰਾਸ਼ਟਰਪਤੀ ਮੈਡਲ ਨਾਲ ਸਨਮਾਨਤ ਕੀਤਾ ਗਿਆ ਸੀ, ਨੂੰ ਹਿਜ਼ਬੁਲ ਅੱਤਵਾਦੀਆਂ ਨੂੰ ਸੁਰੱਖਿਆ ਪ੍ਰਦਾਨ ਕਰਦੇ ਫੜਿਆ ਗਿਆ ਸੀ ਅਤੇ ਬਾਅਦ ਵਿੱਚ ਪਾਕਿਸਤਾਨੀ ਹੈਂਡਲਰਾਂ ਨਾਲ ਜੁੜਿਆ ਲੱਭਿਆ ਸੀ। ਇਹ ਭਾਜਪਾ ਦਾ ਅਸਲ ਰਾਸ਼ਟਰੀ ਸੁਰੱਖਿਆ ਰਿਕਾਰਡ ਹੈ।’
ਉਹਨਾ ਕਿਹਾ, ‘ਜ਼ਿੰਮੇਵਾਰੀ ਲੈਣ ਦੀ ਬਜਾਏ ਭਾਜਪਾ ਹੁਣ ਇੱਕ ਰੁਟੀਨ ਸੈਰ-ਸਪਾਟਾ ਸਮਾਗਮ ਨੂੰ ਲੈ ਕੇ ਕੇਰਲਾ ਨੂੰ ਨਿਸ਼ਾਨਾ ਬਣਾ ਰਹੀ ਹੈ, ਜਿਸ ਵਿੱਚ ਮਲਹੋਤਰਾ ਨੇ ਇੱਕ ਵਾਰ ਹਿੱਸਾ ਲਿਆ ਸੀ, ਹਾਲਾਂਕਿ ਉਸ ਦਾ ਉਸ ਸਮਾਗਮ ਅਤੇ ਉਸ ਦੀ ਆਈ ਐੱਸ ਆਈ ਭਰਤੀ ਵਿਚਕਾਰ ਕੋਈ ਸੰਬੰਧ ਨਹੀਂ ਹੈ। ਰਿਪੋਰਟਾਂ ਵਿੱਚ ਇੱਕ ਆਰ ਟੀ ਆਈ ਜਵਾਬ ਦਾ ਹਵਾਲਾ ਦਿੱਤਾ ਗਿਆ ਹੈ, ਜਿਸ ਵਿੱਚ ਕਿਹਾ ਗਿਆ ਹੈ ਕਿ ਮਲਹੋਤਰਾ ਉਨ੍ਹਾਂ ਲੋਕਾਂ ਵਿੱਚੋਂ ਸੀ, ਜਿਨ੍ਹਾਂ ਨੂੰ ਕੇਰਲਾ ਸਰਕਾਰ ਦੁਆਰਾ ਇੱਕ ਰਾਜ-ਸੰਚਾਲਤ ਪ੍ਰਭਾਵਕ ਸਹਿਯੋਗ ਪ੍ਰੋਗਰਾਮ ਲਈ ਸੱਦਾ ਦਿੱਤਾ ਗਿਆ ਸੀ।
