ਮੁਆਵਜ਼ੇ ਦੀ ਥਾਂ ਚੰਗਾ ਸਕੂਲ ਬਣਾਉਣ ਲਈ ਲੋਕਾਂ ਨੂੰ ਦਾਨ ਦੀ ਅਪੀਲ

ਕੋਲਕਾਤਾ (ਨ ਜ਼ ਸ)
ਕਾਕਰੋਚ ਜਨਤਾ ਪਾਰਟੀ (ਸੀ ਜੇ ਪੀ) ਨੇ ਸ਼ੇਖ ਅਬਦੁੱਲ ਹਫੀਜ਼ ਲਈ 50 ਲੱਖ ਰੁਪਏ ਦਾ ਫੰਡ ਇਕੱਠਾ ਕਰਨ ਦੀ ਅਪੀਲ ਕੀਤੀ ਹੈ, ਜਿਸ ਦੇ ਪਿਤਾ ਜਨਾਬ ਮਾਫ਼ਿਕ ਦੀ 15 ਅਗਸਤ ਨੂੰ ਸੀ ਜੇ ਪੀ ਦੀ ‘ਸਕੂਲ ਠੀਕ ਕਰੋ ਮੁਹਿੰਮ’ ਦੇ ਤਹਿਤ ਬਾਂਕੁੜਾ ਇਲਾਕੇ ਦੇ ਕਰੀਸੁੰਡਾ ਪਿੰਡ ‘ਚ ਮੌਤ ਹੋ ਗਈ ਸੀ। 25 ਸਾਲਾ ਅਬਦੁੱਲ ਨੇ ਕਿਸੇ ਵੀ ਤਰ੍ਹਾਂ ਦੇ ਸਰਕਾਰੀ ਮੁਆਵਜ਼ੇ ਤੋਂ ਇਨਕਾਰ ਕਰਦਿਆਂ ਕਿਹਾ ਸੀ, ‘ਮੈਨੂੰ ਮੁਆਵਜ਼ਾ ਨਹੀਂ ਚਾਹੀਦਾ। ਇਸ ਦੀ ਬਜਾਏ, ਇੱਕ ਵਿਸ਼ਵ ਪੱਧਰੀ ਸਕੂਲ ਬਣਾਓ ਅਤੇ ਇਸ ਦਾ ਨਾਂਅ ਮੇਰੇ ਪਿਤਾ ਦੇ ਨਾਂਅ ‘ਤੇ ਰੱਖੋ।’ ਸੀ ਜੇ ਪੀ ਨੇ ਜਾਰੀ ਕੀਤੇ ਪੋਸਟਰ ਵਿੱਚ ਕਿਹਾ ਹੈ, ‘ਅਬਦੁੱਲ ਨੂੰ ਸਾਡੀ ਮਦਦ ਦੀ ਲੋੜ ਹੈ। ਅਬਦੁੱਲ ਨੇ ਆਪਣੇ ਪਿੰਡ ਵਿੱਚ ਬਿਹਤਰ ਸਰਕਾਰੀ ਸਕੂਲ ਲਈ ਆਵਾਜ਼ ਬੁਲੰਦ ਕੀਤੀ ਹੈ। 13 ਅਗਸਤ ਨੂੰ ਉਸ ‘ਤੇ ਅਤੇ ਉਸ ਦੇ ਪਿਤਾ ‘ਤੇ ਭਾਜਪਾ ਦੇ ਗੁੰਡਿਆਂ ਨੇ ਉਨ੍ਹਾਂ ਦੇ ਘਰ ਹਮਲਾ ਕੀਤਾ। 15 ਅਗਸਤ ਨੂੰ ਉਸ ਨੇ ਆਪਣੇ ਪਿਤਾ ਨੂੰ ਗੁਆ ਦਿੱਤਾ।’
ਸੀ ਜੇ ਪੀ ਦੇ ਬਾਨੀ ਅਭਿਜੀਤ ਦੀਪਕੇ ਨੇ ਇੱਕ ਵੱਖਰੇ ਟਵੀਟ ਵਿੱਚ ਕਿਹਾ, ‘ਅਬਦੁੱਲ ਦੇ ਪਿਤਾ ਦਾ ਕਤਲ ਬਿਹਤਰ ਸਕੂਲਾਂ ਦੀ ਮੰਗ ਕਰਨ ‘ਤੇ ਕੀਤਾ ਗਿਆ ਸੀ। ਲੋਕਾਂ ਨੂੰ ਅਪੀਲ ਹੈ ਕਿ ਉਹ ਜੋ ਵੀ ਕਰ ਸਕਦੇ ਹਨ, ਦਾਨ ਕਰਨ। ਪਰਵਾਰ ਨੇ ਸਰਕਾਰ ਤੋਂ ਮੁਆਵਜ਼ਾ ਲੈਣ ਤੋਂ ਇਨਕਾਰ ਕਰ ਦਿੱਤਾ ਹੈ ਅਤੇ ਇਸ ਦੀ ਬਜਾਏ ਸਿਰਫ ਇੱਕ ਚੀਜ਼ ਮੰਗੀ ਹੈ : ਬੱਚਿਆਂ ਲਈ ਇੱਕ ਚੰਗਾ ਸਕੂਲ।’
ਅਬਦੁੱਲ ਦੇ ਪਿਤਾ ਦੀ 15 ਅਗਸਤ ਨੂੰ ਕੋਲਕਾਤਾ ਤੋਂ ਲਗਭਗ 200 ਕਿਲੋਮੀਟਰ ਦੂਰ ਇੰਦਾਸ ਪੁਲਸ ਸਟੇਸ਼ਨ ਅਧੀਨ ਆਉਂਦੇ ਬਾਂਕੁੜਾ ਦੇ ਕਰੀਸੁੰਡਾ ਪਿੰਡ ਵਿੱਚ ਪਰਵਾਰ ਦੇ ਘਰ ‘ਤੇ ਹੋਏ ਹਮਲੇ ਦੌਰਾਨ ਸਿਰ ਵਿੱਚ ਗੰਭੀਰ ਸੱਟਾਂ ਲੱਗਣ ਕਾਰਨ ਮੌਤ ਹੋ ਗਈ ਸੀ। ਅਬਦੁੱਲ ਨੇ 13 ਅਗਸਤ ਨੂੰ ਆਪਣੇ ਪਿੰਡ ਦੇ ਸਰਕਾਰੀ ਸਕੂਲ ਦਾ ਦੌਰਾ ਕਰਕੇ ਉਸ ਦੀ ਹਾਲਤ ਦਾ ਜਾਇਜ਼ਾ ਲਿਆ ਅਤੇ ਇਸ ਦੇ ਬੁਨਿਆਦੀ ਢਾਂਚੇ ਵਿੱਚ ਕਮੀਆਂ ਨੂੰ ਉਜਾਗਰ ਕੀਤਾ। ਸਥਾਨਕ ਭਾਜਪਾ ਵਰਕਰਾਂ ਵਜੋਂ ਪਛਾਣੇ ਗਏ ਹਥਿਆਰਬੰਦਾਂ ਨੇ ਉਸ ਦੇ ਘਰ ਵਿੱਚ ਦਾਖਲ ਹੋ ਕੇ ਹਮਲਾ ਕਰ ਦਿੱਤਾ, ਜਿਸ ਨਾਲ ਉਹ ਤੇ ਪਿਤਾ ਜ਼ਖਮੀ ਹੋ ਗਏ। ਸੀ ਜੇ ਪੀ ਨੇ ਦੋਸ਼ ਲਗਾਇਆ ਕਿ ਹਮਲਾਵਰਾਂ ਨੇ ਅਬਦੁੱਲ ਤੋਂ ਮੁਆਫੀ ਮੰਗਣ ਲਈ ਇੱਕ ਵੀਡੀਓ ਰਿਕਾਰਡ ਕਰਨ ਦੀ ਮੰਗ ਕੀਤੀ ਕਿ ਉਸ ਨੇ ਬਾਹਰੀ ਪ੍ਰਭਾਵ ਹੇਠ ਕੰਮ ਕੀਤਾ ਹੈ। ਜਦੋਂ ਉਸ ਨੇ ਇਨਕਾਰ ਕਰ ਦਿੱਤਾ, ਤਾਂ ਹਮਲਾ ਕਰ ਦਿੱਤਾ ਗਿਆ।