ਵਾਸ਼ਿੰਗਟਨ : ਤਾਮਿਲਨਾਡੂ ਵਿੱਚ ਜੰਮੀ ਰਿਨੀ ਸੰਪਤ ਵਾਸ਼ਿੰਗਟਨ ਡੀ ਸੀ ਦੇ ਮੇਅਰ ਅਹੁਦੇ ਦੀ ਚੋਣ ਵਿੱਚ ਹਿੱਸਾ ਲੈਣ ਵਾਲੀ ਪਹਿਲੀ ਦੱਖਣੀ ਏਸ਼ੀਆਈ ਉਮੀਦਵਾਰ ਬਣ ਗਈ ਹੈ। ਡੈਮੋਕ੍ਰੇਟਿਕ ਪਾਰਟੀ ਦੀ 31 ਸਾਲਾ ਸਰਕਾਰੀ ਕੰਟਰੈਕਟਰ ਦੀ ਚੋਣ ਮੁਹਿੰਮ ‘ਬੁਨਿਆਦੀ ਚੀਜ਼ਾਂ ਨੂੰ ਠੀਕ ਕਰੋ’ ਦੇ ਵਿਸ਼ੇ ਅਤੇ ‘ਇੱਕ ਨਵੇਂ ਡੀ ਸੀ’ ਦੇ ਵਾਅਦੇ ‘ਤੇ ਅਧਾਰਤ ਹੈ। ਸੰਪਤ ਨੇ ਕਿਹਾ ਕਿ ਉਹ ਕੋਈ ਰਵਾਇਤੀ ਸਿਆਸਤਦਾਨ ਨਹੀਂ ਹੈ ਅਤੇ ਕਿਸੇ ਵਿਸ਼ੇਸ਼ ਹਿੱਤ ਸਮੂਹ ਨਾਲ ਉਸ ਦਾ ਕੋਈ ਸੰਬੰਧ ਨਹੀਂ, ਸਗੋਂ ਹੁਣ ਸਮਾਂ ਆ ਗਿਆ ਹੈ ਕਿ ਕੋਈ ਬਾਹਰੀ ਵਿਅਕਤੀ ਸ਼ਹਿਰ ਦੀਆਂ ਬੁਨਿਆਦੀ ਸੇਵਾਵਾਂ ਨੂੰ ਸੁਧਾਰਨ ‘ਤੇ ਪੂਰੀ ਤਰ੍ਹਾਂ ਧਿਆਨ ਕੇਂਦਰਤ ਕਰੇ। ਤਾਮਿਲਨਾਡੂ ਦੇ ਥੇਨੀ ਵਿੱਚ ਜੰਮੀ ਸੰਪਤ ਸੱਤ ਸਾਲ ਦੀ ਉਮਰ ਵਿੱਚ ਅਮਰੀਕਾ ਆ ਗਈ ਸੀ ਅਤੇ ਇੱਕ ਦਹਾਕੇ ਤੋਂ ਵੱਧ ਸਮੇਂ ਤੋਂ ਵਾਸ਼ਿੰਗਟਨ ਡੀ ਸੀ ਵਿੱਚ ਰਹਿ ਰਹੀ ਹੈ। ਵਾਸ਼ਿੰਗਟਨ ਡੀ ਸੀ ਵਿੱਚ ਡੈਮੋਕ੍ਰੇਟਸ ਦਾ ਦਬਦਬਾ ਹੈ ਅਤੇ 1975 ਤੋਂ ਬਾਅਦ ਇੱਥੇ ਕਦੇ ਵੀ ਰਿਪਬਲਿਕਨ ਪਾਰਟੀ ਦਾ ਕੋਈ ਮੇਅਰ ਨਹੀਂ ਰਿਹਾ। ਸੰਪਤ ਨੇ ਕਿਹਾ ਕਿ ਮੇਅਰ ਵਜੋਂ ਉਸ ਦੀ ਤਰਜੀਹ ਸੜਕਾਂ ਦੇ ਟੋਏ ਭਰਨਾ, ਪੋਟੋਮੈਕ ਨਦੀ ਵਿੱਚ ਗੰਦੇ ਪਾਣੀ ਦੇ ਰਿਸਾਅ ਨੂੰ ਰੋਕਣਾ, ਕੀਮਤਾਂ ਘਟਾਉਣਾ ਅਤੇ ਪੁਲਸ ਹੈਲਪਲਾਈਨ ਦੇ ਉਡੀਕ ਸਮੇਂ ਵਿੱਚ ਸੁਧਾਰ ਕਰਨਾ ਹੋਵੇਗੀ। ਪ੍ਰਾਇਮਰੀ ਚੋਣਾਂ 16 ਜੂਨ ਨੂੰ ਹੋਣੀਆਂ ਹਨ, ਜਦੋਂ ਕਿ ਆਮ ਚੋਣਾਂ 3 ਨਵੰਬਰ ਨੂੰ ਹੋਣਗੀਆਂ। ਮੇਅਰ ਦੀ ਦੌੜ ਵਿੱਚ ਜੇਨਿਸ ਲੂਈਸ ਜਾਰਜ, ਕੇਨਿਯਨ ਮੈਕਡਫੀ, ਗੈਰੀ ਗੁਡਵੇਦਰ, ਰੌਬਰਟ ਐਲ ਗ੍ਰਾਸ ਅਤੇ ਰੋਂਡਾ ਹੈਮਿਲਟਨ ਵੀ ਸ਼ਾਮਲ ਹਨ।
