ਨਵੀਂ ਦਿੱਲੀ : ਸਾਬਕਾ ਰਾਜ ਸਭਾ ਮੈਂਬਰ ਨਰੇਸ਼ ਗੁਜਰਾਲ ਨਾਲ ਆਨ ਲਾਈਨ 7.8 ਕਰੋੜ ਰੁਪਏ ਦੀ ਠੱਗੀ ਮਾਰੀ ਗਈ ਹੈ। ਇਸ ਸੰਬੰਧੀ ਦਿੱਲੀ ਪੁਲਸ ਨੇ ਮਾਮਲਾ ਦਰਜ ਕਰ ਲਿਆ ਹੈ। ਪੁਲਸ ਅਨੁਸਾਰ ਇਹ ਧੋਖਾਧੜੀ 12 ਤੋਂ 16 ਜੂਨ ਦੇ ਵਿਚਕਾਰ ਹੋਈ। ਘੁਟਾਲੇਬਾਜ਼ਾਂ ਨੇ ਨਰੇਸ਼ ਗੁਜਰਾਲ ਦੀ ਡਿਸਪਲੇ ਤਸਵੀਰ ਦੀ ਵਰਤੋਂ ਕਰਕੇ ਇੱਕ ਆਨਲਾਈਨ ਮੈਸੇਜਿੰਗ ਪਲੇਟਫਾਰਮ ‘ਤੇ ਇੱਕ ਖਾਤਾ ਬਣਾਇਆ। ਘੁਟਾਲੇਬਾਜ਼ਾਂ ਨੇ ਉਨ੍ਹਾਂ ਦੇ ਇੱਕ ਕਰਮਚਾਰੀ ਨੂੰ ਰੀਅਲ-ਟਾਈਮ ਗ੍ਰਾਸ ਸੈਟਲਮੈਂਟ ਰਾਹੀਂ ਫੰਡ ਇੱਕ ਖਾਸ ਬੈਂਕ ਖਾਤੇ ਵਿੱਚ ਟਰਾਂਸਫਰ ਕਰਨ ਲਈ ਕਿਹਾ, ਜੋ ਕਿ ਜ਼ਰੂਰੀ ਕਾਰੋਬਾਰ ਨਾਲ ਸੰਬੰਧਤ ਉਦੇਸ਼ਾਂ ਲਈ ਜਾਪਦਾ ਸੀ। ਪੁਲਸ ਨੇ ਕਿਹਾ ਕਿ ਨਿਰਦੇਸ਼ਾਂ ਨੂੰ ਜਾਇਜ਼ ਮੰਨਦੇ ਹੋਏ, ਕਰਮਚਾਰੀ, ਜਿਸ ਨੂੰ ਗੁਜਰਾਲ ਦੁਆਰਾ ਵਿੱਤੀ ਪਹੁੰਚ ਦਾ ਅਧਿਕਾਰ ਦਿੱਤਾ ਗਿਆ ਸੀ, ਨੇ ਚਾਰ ਦਿਨਾਂ ਦੇ ਦੌਰਾਨ ਚਾਰ ਵੱਖ-ਵੱਖ ਆਰ ਟੀ ਜੀ ਐਸ ਲੈਣ-ਦੇਣ ਕੀਤੇ, ਜਿਸ ਦੇ ਨਤੀਜੇ ਵਜੋਂ 7.8 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ। ਇਹ ਘੁਟਾਲਾ 16 ਜੂਨ ਨੂੰ ਉਦੋਂ ਸਾਹਮਣੇ ਆਇਆ, ਜਦੋਂ ਲੈਣ-ਦੇਣ ਗੁਜਰਾਲ ਦੀ ਧੀ ਦੇ ਧਿਆਨ ਵਿੱਚ ਆਇਆ, ਜਿਸ ਨੇ ਤੁਰੰਤ ਆਪਣੇ ਪਿਤਾ ਨਾਲ ਗੱਲ ਕੀਤੀ। ਗੁਜਰਾਲ ਨੇ ਅਜਿਹੇ ਕੋਈ ਵੀ ਨਿਰਦੇਸ਼ ਜਾਰੀ ਕਰਨ ਤੋਂ ਇਨਕਾਰ ਕੀਤਾ ਅਤੇ ਪੈਸੇ ਦੇ ਟਰਾਂਸਫਰ ਹੋਣ ਬਾਰੇ ਕੋਈ ਜਾਣਕਾਰੀ ਹੋਣ ਤੋਂ ਇਨਕਾਰ ਕੀਤਾ। ਜਿਸ ਤੋਂ ਬਾਅਦ ਪਰਵਾਰ ਅਤੇ ਕੰਪਨੀ ਦੇ ਸਟਾਫ ਨੂੰ ਅਹਿਸਾਸ ਹੋਇਆ ਕਿ ਉਹ ਇੱਕ ਘੁਟਾਲੇ ਦਾ ਸ਼ਿਕਾਰ ਹੋ ਗਏ ਹਨ। ਅਧਿਕਾਰੀਆਂ ਨੇ ਫੁਰਤੀ ਵਰਤਦਿਆਂ ਧੋਖਾਧੜੀ ਨਾਲ ਜੁੜੇ ਕਈ ਖਾਤਿਆਂ ‘ਚ ਧੋਖਾਧੜੀ ਵਾਲੀ ਰਕਮ ਦੇ ਲੱਗਭੱਗ 4 ਕਰੋੜ ਰੁਪਏ ਨੂੰ ਫਰੀਜ਼ ਕਰਨ ਵਿੱਚ ਮਦਦ ਕੀਤੀ।
