ਬਾਹਰਲੀ ਜਾਇਦਾਦ ਤੇ ਕਮਾਈ ਨਾ ਦੱਸੀ ਤਾਂ 10 ਲੱਖ ਜੁਰਮਾਨਾ

ਨਵੀਂ ਦਿੱਲੀ : ਆਮਦਨ ਕਰ ਵਿਭਾਗ ਨੇ ਕਰਦਾਤਿਆਂ ਨੂੰ ਖਬਰਦਾਰ ਕੀਤਾ ਹੈ ਕਿ ਆਈ ਟੀ ਆਰ ’ਚ ਵਿਦੇਸ਼ ’ਚ ਸਥਿਤ ਸੰਪਤੀ ਜਾਂ ਵਿਦੇਸ਼ਾਂ ਵਿੱਚੋਂ ਹੁੰਦੀ ਆਮਦਨ ਦਾ ਖੁਲਾਸਾ ਨਾ ਕਰਨ ’ਤੇ ਕਾਲਾ ਧਨ ਵਿਰੋਧੀ ਕਾਨੂੰਨ ਤਹਿਤ 10 ਲੱਖ ਰੁਪਏ ਦਾ ਜੁਰਮਾਨਾ ਲੱਗ ਸਕਦਾ ਹੈ। ਵਿਭਾਗ ਨੇ ਹਾਲ ਹੀ ’ਚ ਸ਼ੁਰੂ ਕੀਤੀ ਗਈ ਪਾਲਣਾ ਸਹਿ ਜਾਗਰੂਕਤਾ ਮੁਹਿੰਮ ਤਹਿਤ ਸਨਿੱਚਰਵਾਰ ਨੂੰ ਇਕ ਜਨਤਕ ਐਡਵਾਇਜ਼ਰੀ ਜਾਰੀ ਕੀਤੀ, ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਕਰਦਾਤਾ ਮੁਲਾਂਕਣ ਸਾਲ 2024-25 ਲਈ ਆਪਣੀ ਆਮਦਨ ਰਿਟਰਨ (ਆਈ ਟੀ ਆਰ) ’ਚ ਅਜਿਹੀ ਜਾਣਕਾਰੀ ਦਰਜ ਕਰਨ। ਐਡਵਾਇਜ਼ਰੀ ’ਚ ਸਪੱਸ਼ਟ ਕੀਤਾ ਗਿਆ ਹੈ ਕਿ ਪਿਛਲੇ ਸਾਲ ’ਚ ਭਾਰਤ ਦੇ ਕਰਦਾਤਾ ਲਈ ਵਿਦੇਸ਼ੀ ਸੰਪਤੀ ’ਚ ਬੈਂਕ ਖਾਤੇ, ਨਕਦ ਰਾਸ਼ੀ, ਬੀਮਾ ਆਦਿ ਤੋਂ ਇਲਾਵਾ ਵਿਦੇਸ਼ ’ਚ ਰੱਖੀ ਗਈ ਕੋਈ ਪੂੰਜੀਗਤ ਸੰਪਤੀ ਸ਼ਾਮਲ ਹਨ।
ਵਿਭਾਗ ਨੇ ਕਿਹਾ ਕਿ ਇਸ ਮਾਪਦੰਡ ਅਧੀਨ ਆਉਣ ਵਾਲੇ ਕਰਦਾਤਾਤਿਆਂ ਨੂੰ ਆਪਣੀ ਆਈ ਟੀ ਆਰ ਵਿੱਚ ਵਿਦੇਸ਼ੀ ਸੰਪਤੀ ਜਾਂ ਵਿਦੇਸ਼ੀ ਸਰੋਤ ਤੋਂ ਆਮਦਨ ਅਨੁਸੂਚੀ ਨੂੰ ਜ਼ਰੂਰੀ ਤੌਰ ’ਤੇ ਭਰਨਾ ਹੋਵੇਗਾ, ਭਾਵੇਂ ਉਸ ਦੀ ਆਮਦਨ ‘ਟੈਕਸ ਯੋਗ ਸੀਮਾ ਤੋਂ ਘੱਟ’ ਹੋਵੇ ਜਾਂ ਵਿਦੇਸ਼ ’ਚ ਸੰਪਤੀ ‘ਪ੍ਰਗਟ ਸਰੋਤਾਂ ਨਾਲ ਬਣਾਈ ਗਈ ਹੋਵੇ।’