ਪਤਨੀ ਨੇ ਸਾਬਕਾ ਡੀ ਜੀ ਪੀ ’ਤੇ ਪਹਿਲਾਂ ਮਿਰਚਾਂ ਧੂੜੀਆਂ ਤੇ ਫਿਰ ਮਾਰ-ਮੁਕਾਇਆ!

ਬੇਂਗਲੂਰੂ : ਕਰਨਾਟਕ ਦੇ ਸਾਬਕਾ ਡੀ ਜੀ ਪੀ ਓਮ ਪ੍ਰਕਾਸ਼ ਦੇ ਕਤਲ ਮਾਮਲੇ ਦੀ ਜਾਂਚ ਕਰ ਰਹੀ ਪੁਲਸ ਨੂੰ ਪਤਾ ਲੱਗਾ ਹੈ ਕਿ ਉਨ੍ਹਾ ਦੀ ਪਤਨੀ ਪੱਲਵੀ ਨੇ ਚਾਕੂ ਮਾਰ ਕੇ ਹੱਤਿਆ ਕਰਨ ਤੋਂ ਪਹਿਲਾਂ ਉਨ੍ਹਾ ਦੇ ਚਿਹਰੇ ’ਤੇ ਲਾਲ ਮਿਰਚਾਂ ਧੂੜੀਆਂ ਸਨ। ਪੁਲਸ ਨੇ ਪੱਲਵੀ ਨੂੰ ਹਿਰਾਸਤ ਵਿੱਚ ਲੈ ਲਿਆ ਹੈ, ਕਿਉਂਕਿ ਉਹ ਕਤਲ ਕੇਸ ਦੀ ਮੁੱਖ ਮਸ਼ਕੂਕ ਹੈ। ਪੁਲਸ ਨੇ ਸਾਬਕਾ ਡੀ ਜੀ ਪੀ ਦੀ ਧੀ ਕਿ੍ਰਤੀ ਨੂੰ ਵੀ ਹਿਰਾਸਤ ਵਿੱਚ ਲਿਆ ਹੈ। ਓਮ ਪ੍ਰਕਾਸ਼, ਜੋ ਬਿਹਾਰ ਦੇ ਚੰਪਾਰਨ ਦੇ ਰਹਿਣ ਵਾਲੇ ਤੇ 1981 ਬੈਚ ਦੇ ਆਈ ਪੀ ਐੱਸ ਅਧਿਕਾਰੀ ਸਨ, ਐਤਵਾਰ ਸ਼ਹਿਰ ਦੇ ਪਾਸ਼ ਐੱਚ ਐੱਸ ਆਰ ਲੇਅਆਊਟ ਵਿੱਚ ਆਪਣੇ ਤਿੰਨ ਮੰਜ਼ਲਾ ਘਰ ਦੀ ਜ਼ਮੀਨੀ ਮੰਜ਼ਲ ’ਤੇ ਮਿ੍ਰਤਕ ਮਿਲੇ ਸਨ। ਸੂਤਰਾਂ ਨੇ ਦਾਅਵਾ ਕੀਤਾ ਕਿ ਜੋੜੇ ਦਰਮਿਆਨ ਤਲਖ-ਕਲਾਮੀ ਤੋਂ ਬਾਅਦ ਪੱਲਵੀ ਨੇ ਪ੍ਰਕਾਸ਼ ਦੀਆਂ ਅੱਖਾਂ ਵਿਚ ਲਾਲ ਮਿਰਚਾਂ ਧੂੜ ਦਿੱਤੀਆਂ ਸਨ। ਉਹ ਅੱਖਾਂ ਵਿੱਚ ਜਲਣ ਤੋਂ ਰਾਹਤ ਪਾਉਣ ਲਈ ਭੱਜ ਰਹੇ ਸਨ ਤਾਂ ਪੱਲਵੀ ਨੇ ਚਾਕੂ ਨਾਲ ਕਈ ਵਾਰ ਕੀਤੇ, ਜਿਸ ਨਾਲ ਉਨ੍ਹਾ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਇਸ ਉਪਰੰਤ ਪੱਲਵੀ ਨੇ ਆਪਣੀ ਸਹੇਲੀ ਨੂੰ ਵੀਡੀਓ ਕਾਲ ਕੀਤੀ ਅਤੇ ਕਥਿਤ ਤੌਰ ’ਤੇ ਕਿਹਾ, ‘ਮੈਂ ਉਸ ਰਾਖਸ਼ ਨੂੰ ਮਾਰ ਦਿੱਤਾ ਹੈ।’ ਸੂਤਰਾਂ ਨੇ ਦੱਸਿਆ ਕਿ ਇਹ ਕਤਲ ਜੋੜੇ ਵਿਚਕਾਰ ਅਕਸਰ ਹੋਣ ਵਾਲੇ ਝਗੜਿਆਂ ਦਾ ਸਿੱਟਾ ਸੀ। ਇਹ ਵੀ ਪਤਾ ਲੱਗਾ ਹੈ ਕਿ ਕਰਨਾਟਕ ਦੇ ਡਾਂਡੇਲੀ ਵਿੱਚ ਇੱਕ ਜ਼ਮੀਨ ਨਾਲ ਸੰਬੰਧਤ ਵਿਵਾਦ ਸੀ। ਕੁਝ ਮਹੀਨੇ ਪਹਿਲਾਂ ਪੱਲਵੀ ਨੇ ਸ਼ਿਕਾਇਤ ਦਰਜ ਕਰਵਾਉਣ ਲਈ ਐੱਚ ਐੱਸ ਆਰ ਲੇਆਊਟ ਪੁਲਸ ਥਾਣੇ ਵਿਚ ਸੰਪਰਕ ਕੀਤਾ ਸੀ। ਜਦੋਂ ਥਾਣੇ ਦੇ ਸਟਾਫ ਨੇ ਸਹਿਮਤੀ ਨਹੀਂ ਦਿੱਤੀ, ਤਾਂ ਉਸ ਨੇ ਪੁਲਸ ਸਟੇਸ਼ਨ ਦੇ ਸਾਹਮਣੇ ਧਰਨਾ ਪ੍ਰਦਰਸ਼ਨ ਕੀਤਾ। ਇਹ ਵੀ ਪਤਾ ਲੱਗਾ ਹੈ ਕਿ ਪੱਲਵੀ ਨੂੰ ਸਕਾਈਜ਼ੋਫਰੀਨੀਆ ਦਾ ਪਤਾ ਲੱਗਿਆ ਸੀ ਅਤੇ ਉਹ ਦਵਾਈ ਵੀ ਲੈ ਰਹੀ ਸੀ।