ਅੰਮਿ੍ਰਤਸਰ : ਕਿ੍ਰਕਟ ਖਿਡਾਰੀ ਤੋਂ ਸਿਆਸਤਦਾਨ ਬਣੇ ਨਵਜੋਤ ਸਿੰਘ ਸਿੱਧੂ ਹੁਣ ਇੱਕ ਚਿੰਤਕ ਦੇ ਰੂਪ ਵਿਚ ਨਜ਼ਰ ਆਉਣਗੇ। ਉਨ੍ਹਾ ਬੁੱਧਵਾਰ ਆਪਣਾ ਨਵਾਂ ਯੂਟਿਊਬ ਚੈਨਲ ‘ਨਵਜੋਤ ਸਿੱਧੂ ਆਫੀਸ਼ਿਅਲ’ ਸ਼ੁਰੂ ਕਰ ਦਿੱਤਾ। ਇਸ ਯੂਟਿਊਬ ਚੈਨਲ ’ਤੇ ਉਹ ਲੋਕਾਂ ਨਾਲ ਪ੍ਰੇਰਨਾਦਾਇਕ/ਹੌਸਲਾਵਧਾਊ, ਸਿਹਤ, ਆਪਣੇ ਸੁੰਦਰ ਕੱਪੜਿਆਂ ਦਾ ਰਾਜ਼, ਕਿ੍ਰਕਟ, ਮੈਡੀਟੇਸ਼ਨ ਸਮੇਤ ਹੋਰ ਅਜਿਹੀਆਂ ਗੱਲਾਂ ਕਰਦੇ ਨਜ਼ਰ ਆਉਣਗੇ। ਆਪਣੀ ਕੋਠੀ ਵਿਖੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਉਨ੍ਹਾ ਕਿਹਾ ਕਿ ਚੈਨਲ ਦਾ ਸੰਚਾਲਨ ਉਨ੍ਹਾ ਦੀ ਧੀ ਅਤੇ ਇੱਕ ਹੋਰ ਨੇੜਲੇ ਸਾਥੀ ਵੱਲੋਂ ਕੀਤਾ ਜਾਵੇਗਾ। ਇਸ ਚੈਨਲ ’ਤੇ ਰੋਜ਼ਾਨਾ ਨਵਜੋਤ ਸਿੱਧੂ ਨਾਲ ਸੰਬੰਧਤ ਇਕ ਵੀਡੀਓ ਅਪਲੋਡ ਕੀਤੀ ਜਾਵੇਗੀ। ਇਸ ਚੈਨਲ ਰਾਹੀਂ ਉਹ ਲੋਕਾਂ ਦੇ ਸਨਮੁੱਖ ਹੋਣਗੇ ਅਤੇ ਉਨ੍ਹਾਂ ਨਾਲ ਗੱਲਬਾਤ ਵੀ ਕਰਨਗੇ।
ਸਿਆਸਤ ਤੋਂ ਦੂਰ ਹੋਣ ਸੰਬੰਧੀ ਸਵਾਲ ਬਾਰੇ ਉਨ੍ਹਾਂ ਸਪੱਸ਼ਟ ਜਵਾਬ ਦੇਣ ਦੀ ਥਾਂ ਆਪਣੇ ਰਵਾਇਤੀ ਅੰਦਾਜ਼ ਵਿੱਚ ਗੋਲਮੋਲ ਜਵਾਬ ਦਿੱਤਾ, ਪਰ ਉਨ੍ਹਾ ਸਾਫ ਕੀਤਾ ਹੈ ਕਿ ਉਨ੍ਹਾ ਦੀ ਪਤਨੀ ਡਾ. ਨਵਜੋਤ ਕੌਰ ਸਿੱਧੂ ਸਰਗਰਮ ਸਿਆਸਤ ਦਾ ਹਿੱਸਾ ਬਣੇ ਰਹਿਣਗੇ।
