ਗਾਜ਼ੀਆਬਾਦ ਵਿੱਚ ਇੱਕ ਮੁਸਲਿਮ ਮੁੰਡੇ ਵੱਲੋਂ ਇੱਕ ਹਿੰਦੂ ਮੁੰਡੇ ਦਾ ਕਤਲ ਮੁਸਲਮਾਨਾਂ ਵਿਰੁੱਧ ਨਫਰਤ ਦੀ ਨਵੀਂ ਮੁਹਿੰਮ ਦਾ ਤਾਜ਼ਾ ਬਹਾਨਾ ਬਣ ਗਿਆ ਹੈ। ਸੂਰੀਆ ਦੀ ਹੱਤਿਆ ਦੇ ‘ਦੋਸ਼ੀ’ ਅਸਦ ਨੂੰ ਪੁਲਸ ਨੇ ਤੁਰੰਤ ‘ਮੁਕਾਬਲੇ’ ਵਿੱਚ ਮਾਰ ਦਿੱਤਾ। ਫਿਰ ਵੀ ਇਸ ਮੁਕਾਬਲੇ ਨੇ ਕੁਝ ਹਿੰਦੂਆਂ ਵਿੱਚ ਮੁਸਲਮਾਨਾਂ ਦੇ ਖੂਨ ਦੀ ਪਿਆਸ ਨੂੰ ਸੰਤੁਸ਼ਟ ਨਹੀਂ ਕੀਤਾ। ਹੁਣ ਇਹ ਮੰਗ ਕੀਤੀ ਜਾ ਰਹੀ ਹੈ ਕਿ ਜਿਸ ਪਰਵਾਰ ਵਿੱਚ ਅਸਦ ਪੈਦਾ ਹੋਇਆ ਸੀ, ਉਸ ਨੂੰ ਸਜ਼ਾ ਦਿੱਤੀ ਜਾਵੇ। ਉਸ ਦੇ ਭਰਾ ਅਤੇ ਪਿਤਾ ਗ੍ਰਿਫਤਾਰ ਹਨ, ਪਰ ਇਹ ਕਾਫੀ ਨਹੀਂ ਹੈ। ਅਸਦ ਦੇ ਘਰ ਨੂੰ ਢਾਹੁਣ ਲਈ ਇੱਕ ਨੋਟਿਸ ਜਾਰੀ ਕੀਤਾ ਗਿਆ ਹੈ। ‘ਪੂਰੇ ਪਰਵਾਰ ਦਾ ਮੁਕਾਬਲਾ’ ਅਜੇ ਜਾਇਜ਼ ਨਹੀਂ ਠਹਿਰਾਇਆ ਜਾ ਸਕੇਗਾ। ਉਹ ਸਮਾਂ ਵੀ ਸ਼ਾਇਦ ਛੇਤੀ ਆ ਜਾਵੇ, ਪਰ ਪੂਰੇ ਪਰਵਾਰ ਨੂੰ ਤਬਾਹ ਜ਼ਰੂਰ ਕੀਤਾ ਜਾ ਸਕਦਾ ਹੈ। ਉਸ ਨੂੰ ਬੇਘਰ ਕੀਤਾ ਜਾ ਸਕਦਾ ਹੈ। ਵੱਖ-ਵੱਖ ਮਾਮਲਿਆਂ ਵਿੱਚ ਫਸਾ ਕੇ ਪੂਰੇ ਪਰਵਾਰ ਦੀ ਜ਼ਿੰਦਗੀ ਬਰਬਾਦ ਕੀਤੀ ਜਾ ਸਕਦੀ ਹੈ।
ਪਰ ਇਹ ਵੀ ਕਾਫੀ ਨਹੀਂ ਹੈ। ਉਸ ਭਾਈਚਾਰੇ ਨੂੰ ਸਜ਼ਾ ਦੇਣ ਦੀ ਮੰਗ ਕੀਤੀ ਜਾ ਰਹੀ ਹੈ, ਅਸਦ ਜਿਸ ਦਾ ਮੈਂਬਰ ਸੀ, ਯਾਨੀ ਮੁਸਲਮਾਨਾਂ ਨੂੰ। ਇਹ ਕਿਵੇਂ ਹੋਵੇਗਾ? ਇਲਾਕੇ ਦੇ ਮਦਰੱਸਿਆਂ ਨੂੰ ਸੀਲ ਕਰ ਦਿੱਤਾ ਗਿਆ ਹੈ। ਆਖਰਕਾਰ, ਪ੍ਰਸ਼ਾਸਨ ਅਤੇ ਹਿੰਦੂ ਸਮਾਜ ਦੀਆਂ ਨਜ਼ਰਾਂ ਵਿੱਚ ਮਦਰੱਸੇ ਹੀ ਅਸਦ ਵਰਗੇ ਲੋਕ ਪੈਦਾ ਕਰਦੇ ਹਨ! ਪਰ ਇਹ ਵੀ ਕਾਫੀ ਨਹੀਂ ਹੈ। ਕੁਝ ਹਿੰਦੂ ਗਰੁੱਪ ਸੜਕਾਂ ‘ਤੇ ਘੁੰਮ ਕੇ ਮੁਸਲਮਾਨਾਂ ਦਾ ਕਤਲੇਆਮ ਕਰਨ ਦੀ ਧਮਕੀ ਦੇ ਰਹੇ ਹਨ। ਇਸ ਨੂੰ ਹਿੰਦੂ ਗੁੱਸੇ ਦਾ ਇੱਕ ਕੁਦਰਤੀ ਪ੍ਰਗਟਾਵਾ ਮੰਨਦੇ ਹੋਏ, ਪ੍ਰਸ਼ਾਸਨ ਨੇ ਇਸ ਨਫਰਤੀ ਪ੍ਰਚਾਰ ਨੂੰ ਖੁੱਲ੍ਹੀ ਛੁੱਟੀ ਦੇ ਦਿੱਤੀ ਹੈ। ਹਿੰਦੂ ਔਰਤਾਂ ਮੰਗ ਕਰ ਰਹੀਆਂ ਹਨ ਕਿ ਮੁਸਲਿਮ ਔਰਤਾਂ ਨੂੰ ਨੰਗਾ ਕਰਕੇ ਉਨ੍ਹਾਂ ਨਾਲ ਬਲਾਤਕਾਰ ਕੀਤਾ ਜਾਵੇ।
ਮੁਸਲਮਾਨਾਂ ਨੂੰ ਸਿਰਫ ਇਸ ਨਫਰਤੀ ਪ੍ਰਚਾਰ ਦਾ ਹੀ ਸਾਹਮਣਾ ਨਹੀਂ ਕਰਨਾ ਪੈ ਰਿਹਾ। ਅਜਿਹੇ ਯੂਟਿਊਬਰਾਂ ਦੀ ਇੱਕ ਫੌਜ ਉੱਭਰੀ ਹੈ, ਜੋ ਰਿਪੋਰਟਿੰਗ ਦੇ ਨਾਂਅ ‘ਤੇ ਮੁਸਲਮਾਨਾਂ ਨੂੰ ਫੜ ਕੇ ਉਨ੍ਹਾਂ ਤੋਂ ਅਸ਼ਲੀਲ ਅਤੇ ਭੜਕਾਊ ਸਵਾਲ ਪੁੱਛਦੇ ਹਨ। ਇਨ੍ਹਾਂ ਯੂਟਿਊਬਰਾਂ ਵਿੱਚ ਵੱਡੀ ਗਿਣਤੀ ਔਰਤਾਂ ਦੀ ਹੈ। ਉਹ ਮੁਸਲਮਾਨਾਂ ਨੂੰ ਬਹੁਤ ਹਮਲਾਵਰ ਢੰਗ ਨਾਲ ਜ਼ਬਰਦਸਤੀ ਰੋਕਦੀਆਂ ਹਨ ਅਤੇ ਉਨ੍ਹਾਂ ਦੇ ਮੂੰਹ ਵਿੱਚ ਮਾਈਕ੍ਰੋਫੋਨ ਧੱਕ ਦਿੰਦੀਆਂ ਹਨ। ਕੁੜੀਆਂ ਜਾਂ ਔਰਤਾਂ ਹੋਣ ਕਰਕੇ ਉਨ੍ਹਾਂ ਨੂੰ ਇਹ ਫਾਇਦਾ ਮਿਲਦਾ ਹੈ ਕਿ ਲੋਕ ਉਨ੍ਹਾਂ ਦੇ ਹਮਲੇ ਦਾ ਮੁਕਾਬਲਾ ਨਹੀਂ ਕਰ ਸਕਦੇ। ਉਨ੍ਹਾਂ ਨੂੰ ਰੋਕਣਾ ਔਰਤ ਦੀ ਇੱਜ਼ਤ ‘ਤੇ ਹਮਲਾ ਮੰਨਿਆ ਜਾਵੇਗਾ। ਜੇ ਲੋਕ ਗੱਲ ਨਹੀਂ ਕਰਨਾ ਚਾਹੁੰਦੇ, ਤਾਂ ਉਹ ਉਨ੍ਹਾਂ ‘ਤੇ ਹਮਲਾ ਕਰ ਦਿੰਦੀਆਂ ਹਨ। ਮੁਸਲਮਾਨ ਉਨ੍ਹਾਂ ਨੂੰ ਰੋਕਣ ਵਿੱਚ ਅਸਮਰੱਥ ਹਨ। ਉਨ੍ਹਾਂ ਦੇ ਸਵਾਲ ਕੀ ਹੁੰਦੇ ਹਨ, ਇਸ ਨੂੰ ਮੁਸਲਮਾਨਾਂ ਵਿਰੁੱਧ ਨਫਰਤ ਦੀ ਬਾਰਿਸ਼ ਸਮਝ ਸਕਦੇ ਹੋ।
ਮੁਸਲਮਾਨ ਇਸ ਹਿੰਸਾ ਅਤੇ ਨਫਰਤ ਦੇ ਚੌਤਰਫਾ ਹਮਲੇ ਦਾ ਸਾਹਮਣਾ ਕਿਵੇਂ ਕਰਨ। ਇਹ ਸਵਾਲ ਇੱਕ ਤਰ੍ਹਾਂ ਨਾਲ ਬੇਲੋੜਾ ਹੋ ਗਿਆ ਹੈ, ਕਿਉਂਕਿ ਉਨ੍ਹਾਂ ਨੇ ਹੁਣ ਇਹ ਮੰਨ ਲਿਆ ਹੈ ਕਿ ਮੁਸਲਮਾਨਾਂ ਵਿਰੁੱਧ ਨਫਰਤ ਸਿਰਫ ਭਾਰਤੀ ਜਨਤਾ ਪਾਰਟੀ ਜਾਂ ਰਾਸ਼ਟਰੀ ਸੋਇਮ ਸੇਵਕ ਸੰਘ ਤੱਕ ਸੀਮਤ ਨਹੀਂ ਹੈ। ਮੁਸਲਮ ਵਿਰੋਧੀ ਯੂਟਿਊਬਰ ਨੂੰ ਵਿਸ਼ਵਾਸ ਹੈ ਕਿ ਉਨ੍ਹਾਂ ਦੀਆਂ ਹਰਕਤਾਂ ਨੂੰ ਵੱਡੀ ਗਿਣਤੀ ਵਿੱਚ ਹਿੰਦੂ ਖੁਸ਼ੀ ਨਾਲ ਦੇਖ ਰਹੇ ਹਨ। ਇਸ ਨਾਲ ਉਨ੍ਹਾਂ ਨੂੰ ਆਮਦਨ ਹੁੰਦੀ ਹੈ। ਮੁਸਲਿਮ ਵਿਰੋਧੀ ਨਫਰਤ ਹੁਣ ਨਾ ਸਿਰਫ ਸਿਆਸੀ ਤੌਰ ‘ਤੇ ਲਾਭਦਾਇਕ ਹੈ, ਸਗੋਂ ਆਰਥਿਕ ਤੌਰ ‘ਤੇ ਵੀ ਲਾਭਦਾਇਕ ਹੈ। ਬਦਕਿਸਮਤੀ ਨਾਲ ਪ੍ਰਸ਼ਾਸਨ ਇਸ ਨੂੰ ਨਹੀਂ ਰੋਕ ਰਿਹਾ। ਮੁਸਲਮਾਨਾਂ ਵਿਰੁੱਧ ਖੁੱਲ੍ਹ ਕੇ ਬੋਲਣ ਵਾਲੇ ਅਧਿਕਾਰੀਆਂ, ਪੁਲਸ ਅਧਿਕਾਰੀਆਂ ਅਤੇ ਜੱਜਾਂ ਦੀ ਗਿਣਤੀ ਵਧ ਰਹੀ ਹੈ। ਬਹੁਤੀਆਂ ਸਿਆਸੀ ਪਾਰਟੀਆਂ ਇਸ ਦੀ ਖੁੱਲ੍ਹ ਕੇ ਆਲੋਚਨਾ ਨਹੀਂ ਕਰ ਰਹੀਆਂ। ਮੁਸਲਮਾਨਾਂ ਤੋਂ ਵੋਟਾਂ ਮੰਗਣ ਵਾਲੇ ਵੀ ਚੁੱਪ ਹਨ। ਉਨ੍ਹਾਂ ਕੋਲ ਆਪਣੇ ਹਿੰਦੂ ਵੋਟਰਾਂ ਨੂੰ ਇਹ ਦੱਸਣ ਦੀ ਹਿੰਮਤ ਨਹੀਂ ਹੈ ਕਿ ਇਹ ਨਫਰਤ ਅਤੇ ਹਿੰਸਾ ਸਵੀਕਾਰ ਕਰਨ ਯੋਗ ਨਹੀਂ ਹੈ।
