ਰਾਮਲੀਲ੍ਹਾ ਮੈਦਾਨ ‘ਚ ਇੰਡੀਆ ਬਲਾਕ ਦੀ ਰੈਲੀ ਅੱਜ, ਟਰੈਫਿਕ ਪਾਬੰਦੀਆਂ ਲਾਗੂ

ਨਵੀਂ ਦਿੱਲੀ (ਨ ਜ਼ ਸ)-ਇੰਡੀਆ ਬਲਾਕ ਵੱਲੋਂ ‘ਵੋਟ ਚੋਰੀ’ ਦੇ ਮੁੱਦੇ ‘ਤੇ ਰਾਮਲੀਲ੍ਹਾ ਮੈਦਾਨ ਵਿਖੇ ਪਹਿਲੀ ਨਵੰਬਰ ਨੂੰ ‘ਮੈਗਾ ਰੈਲੀ’ ਕੀਤੀ ਜਾ ਰਹੀ ਹੈ | ਮਿੰਟੋ ਰੋਡ-ਕਨਾਟ ਪਲੇਸ ਜੰਕਸ਼ਨ ਤੋਂ ਰਾਮਲੀਲ੍ਹਾ ਮੈਦਾਨ ਤੱਕ ਮਾਰਚ ਕੱਢਣ ਦੀ ਵੀ ਯੋਜਨਾ ਹੈ | ਬਲਾਕ ਵੱਲੋਂ ਵੋਟਰ ਸੂਚੀ ਬੇਨਿਯਮੀਆਂ ਨੂੰ ਲੈ ਕੇ ਮੁੱਖ ਚੋਣ ਕਮਿਸ਼ਨਰ (ਸੀ ਈ ਸੀ) ਗਿਆਨੇਸ਼ ਕੁਮਾਰ ਦੇ ਅਸਤੀਫੇ ਤੇ ਵਿਸ਼ੇਸ਼ ਵੋਟਰ ਸੁਧਾਈ (ਐੱਸ ਆਈ ਆਰ) ਰੱਦ ਕਰਨ ਦੀ ਮੰਗ ਨੂੰ ਲੈ ਕੇ ਅੰਦੋਲਨ ਚਲਾਇਆ ਜਾ ਰਿਹਾ ਹੈ | ਇੰਡੀਆ ਬਲਾਕ ਦੀ ਰੈਲੀ ਕਾਰਨ ਆਵਾਜਾਈ ਦੇ ਰੂਟ ਬਦਲੇ ਗਏ ਹਨ ਤੇ ਕੁਝ ਰੂਟਾਂ ‘ਤੇ ਟਰੈਫਿਕ ਪਾਬੰਦੀਆਂ ਲਾਗੂ ਕੀਤੀਆਂ ਗਈਆਂ ਹਨ | ਕੇਂਦਰੀ ਦਿੱਲੀ ਦੇ ਮੁੱਖ ਚੌਰਾਹਿਆਂ ‘ਤੇ ਟਰੈਫਿਕ ਡਾਇਵਰਸ਼ਨ ਲਾਗੂ ਕੀਤੇ ਜਾਣਗੇ, ਜਿਨ੍ਹਾਂ ਵਿੱਚ ਨੇਤਾ ਜੀ ਸੁਭਾਸ਼ ਮਾਰਗ ਟੀ-ਪੁਆਇੰਟ, ਰਾਜਘਾਟ, ਦਿੱਲੀ ਗੇਟ, ਆਈ ਟੀ ਓ ਏ-ਪੁਆਇੰਟ, ਅਜਮੇਰੀ ਗੇਟ ਰੈੱਡ ਲਾਈਟ, ਰਣਜੀਤ ਸਿੰਘ ਫਲਾਈਓਵਰ, ਝੰਡੇਵਾਲਨ ਚੌਕ, ਤੁਰਕਮਾਨ ਗੇਟ ਅਤੇ ਮੀਰਦਾੜ ਚੌਕ ਸ਼ਾਮਲ ਹਨ | ਪੁਲਸ ਨੇ ਕਿਹਾ ਕਿ ਰਾਮਲੀਲ੍ਹਾ ਮੈਦਾਨ ਵਿੱਚ ਇੰਡੀਆ ਬਲਾਕ ਰੈਲੀ ਦੇ ਮੱਦੇਨਜ਼ਰ 1 ਨਵੰਬਰ ਨੂੰ ਦਿੱਲੀ ਦੇ ਕੁਝ ਹਿੱਸਿਆਂ ਵਿੱਚ ਸਵੇਰੇ 10 ਵਜੇ ਤੋਂ ਸ਼ਾਮ 5 ਵਜੇ ਤੱਕ ਟਰੈਫਿਕ ਪਾਬੰਦੀਆਂ ਲਾਗੂ ਰਹਿਣਗੀਆਂ | ਦਿੱਲੀ ਟਰੈਫਿਕ ਪੁਲਸ ਨੇ ਕਿਹਾ ਕਿ ਆਈ ਟੀ ਓ ਅਤੇ ਦਿੱਲੀ ਗੇਟ ਦੇ ਵਿਚਕਾਰ ਬਹਾਦਰ ਸ਼ਾਹ ਜ਼ਫਰ ਮਾਰਗ, ਰਾਜਘਾਟ ਅਤੇ ਅਜਮੇਰੀ ਗੇਟ ਦੇ ਵਿਚਕਾਰ ਜਵਾਹਰ ਲਾਲ ਨਹਿਰੂ ਮਾਰਗ, ਅਰੁਣਾ ਆਸਫ ਅਲੀ ਰੋਡ, ਮਿੰਟੋ ਰੋਡ, ਦੇਸ਼ ਬੰਧੂ ਗੁਪਤਾ ਰੋਡ ਅਤੇ ਬਾਰਾਖੰਬਾ ਰੋਡ ਦੇ ਨਾਲ-ਨਾਲ ਕਮਲਾ ਮਾਰਕੀਟ ਅਤੇ ਹਮਦਰਦ ਚੌਕ ਦੇ ਆਲੇ-ਦੁਆਲੇ ਦੇ ਹਿੱਸਿਆਂ ‘ਤੇ ਭੀੜ ਦਾ ਸਾਹਮਣਾ ਕਰਨ ਦੀ ਸੰਭਾਵਨਾ ਹੈ | ਵਾਹਨਾਂ ਦੀ ਆਵਾਜਾਈ ਨੂੰ ਨਿਯਮਤ ਕਰਨ, ਯਾਤਰੀਆਂ ਨੂੰ ਨਿਰਧਾਰਤ ਪਾਰਕਿੰਗ ਖੇਤਰਾਂ ਵਿੱਚ ਮਾਰਗਦਰਸ਼ਨ ਕਰਨ ਅਤੇ ਸਥਾਨ ਦੇ ਆਲੇ-ਦੁਆਲੇ ਭੀੜ ਨੂੰ ਰੋਕਣ ਲਈ ਕੇਂਦਰੀ ਰੇਂਜ ਵਿੱਚ ਵਾਧੂ ਟਰੈਫਿਕ ਕਰਮਚਾਰੀ ਤਾਇਨਾਤ ਕੀਤੇ ਜਾਣਗੇ | ਐਮਰਜੈਂਸੀ ਵਾਹਨਾਂ ਲਈ ਲੋਕ ਨਾਇਕ ਜੈ ਪ੍ਰਕਾਸ਼ (ਐੱਲ ਐੱਨ ਜੇ ਪੀ) ਹਸਪਤਾਲ ਦੇ ਨੇੜੇ ਇੱਕ ਵੱਖਰਾ ਰਸਤਾ ਪ੍ਰਦਾਨ ਕੀਤਾ ਜਾਵੇਗਾ | ਉਨ੍ਹਾ ਕਿਹਾ ਕਿ ਹਸਪਤਾਲ ਦੇ ਸਾਹਮਣੇ ਰੇਲਵੇ ਪਾਰਕਿੰਗ ਏਰੀਆ, ਦਿੱਲੀ ਮੈਟਰੋ ਰੇਲ ਕਾਰਪੋਰੇਸ਼ਨ (ਡੀ ਐੱਮ ਆਰ ਸੀ) ਪਾਰਕਿੰਗ ਸਥਾਨਾਂ ਅਤੇ ਰਾਜਘਾਟ ‘ਤੇ ਪਾਰਕਿੰਗ ਦੇ ਪ੍ਰਬੰਧ ਕੀਤੇ ਗਏ ਹਨ | ਨਵੀਂ ਦਿੱਲੀ ਰੇਲਵੇ ਸਟੇਸ਼ਨ ਜਾਣ ਵਾਲੇ ਯਾਤਰੀਆਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਉਹ ਆਪਣੀ ਯਾਤਰਾ ਦੀ ਪਹਿਲਾਂ ਤੋਂ ਯੋਜਨਾ ਬਣਾਉਣ | ਡੀ ਬੀ ਜੀ ਰੋਡ ਵਾਲੇ ਪਾਸੇ ਤੋਂ ਸਟੇਸ਼ਨ ‘ਤੇ ਪਹੁੰਚਣ ਵਾਲੇ ਲੋਕ ਚੈਮਸਫੋਰਡ ਰੋਡ, ਕਨਾਟ ਪਲੇਸ ਦੇ ਆਊਟਰ ਸਰਕਲ, ਮਿੰਟੋ ਰੋਡ ਅਤੇ ਭਵਭੂਤੀ ਮਾਰਗ ਲੈ ਸਕਦੇ ਹਨ | ਪੂਰਬੀ ਦਿੱਲੀ ਤੋਂ ਆਉਣ ਵਾਲੇ ਯਾਤਰੀ ਸਟੇਸ਼ਨ ਤੱਕ ਪਹੁੰਚਣ ਲਈ ਆਈ ਟੀ ਓ, ਦੀਨ ਦਿਆਲ ਉਪਾਧਿਆਏ ਮਾਰਗ ਅਤੇ ਭਵਭੂਤੀ ਮਾਰਗ ਦੀ ਵਰਤੋਂ ਕਰ ਸਕਦੇ ਹਨ | ਮਿੰਟੋ ਰੋਡ-ਕਨਾਟ ਪਲੇਸ ਜੰਕਸ਼ਨ ਤੋਂ ਰਾਮਲੀਲ੍ਹਾ ਮੈਦਾਨ ਤੱਕ ਮਾਰਚ ਕੱਢਣ ਦੀ ਵੀ ਯੋਜਨਾ ਬਣਾਈ ਗਈ ਹੈ |