ਚੰਡੀਗੜ੍ਹ : ਪੰਜਾਬ ਦੇ ਰਾਜਪਾਲ ਤੇ ਚੰਡੀਗੜ੍ਹ ਦੇ ਪ੍ਰਸ਼ਾਸਕ ਬਨਵਾਰੀ ਲਾਲ ਪੁਰੋਹਿਤ ਨੇ ਵੀਰਵਾਰ ਕਿਹਾ ਕਿ ਪਿਛਲੇ ਮਹੀਨੇ ਉਨ੍ਹਾ ਅਸਤੀਫਾ ਨਿੱਜੀ ਕਾਰਨ ਕਰਕੇ ਦਿੱਤਾ ਸੀ। ਫਿਲਹਾਲ ਉਨ੍ਹਾ ਨੂੰ ਕੰਮ ਕਰਦੇ ਰਹਿਣ ਲਈ ਕਿਹਾ ਗਿਆ ਹੈ। ਇਥੇ ਮੀਡੀਆ ਨਾਲ ਗੱਲਬਾਤ ਦੌਰਾਨ ਪੁਰੋਹਿਤ ਨੇ ਚੰਡੀਗੜ੍ਹ ਪ੍ਰਸ਼ਾਸਕ ਵਜੋਂ ਆਪਣੇ ਕਾਰਜਕਾਲ ਦੌਰਾਨ ਕੀਤੀਆਂ ਵੱਖ-ਵੱਖ ਪਹਿਲਕਦਮੀਆਂ ਬਾਰੇ ਵੀ ਗੱਲ ਕੀਤੀ। ਅਸਤੀਫੇ ਦੇ ਅਸਲ ਕਾਰਨ ਬਾਰੇ ਉਨ੍ਹਾ ਕਿਹਾਮੈਂ ਅਸਤੀਫਾ ਭੇਜ ਦਿੱਤਾ ਹੈ, ਪਰ ਉਹ ਮੈਨੂੰ ਨਹੀਂ ਛੱਡ ਰਹੇ ਅਤੇ ਮੈਨੂੰ ਕੰਮ ਜਾਰੀ ਰੱਖਣ ਲਈ ਕਿਹਾ ਹੈ।ਉਨ੍ਹਾ ਕਿਹਾ ਕਿ ਅਸਤੀਫੇ ਲਈ ਉਨ੍ਹਾ ਜੋ ਕਾਰਨ ਦਿੱਤੇ ਹਨ, ਉਹ ਸਿਰਫ ਉਨ੍ਹਾ ਦੇ ਪਰਵਾਰਕ ਅਤੇ ਨਿੱਜੀ ਹਨ। ਰਾਜਪਾਲ ਨੇ ਕਿਹਾਮੇਰੀ ਪਤਨੀ ਨਾਗਪੁਰ ਤੋਂ ਇੱਥੇ ਆਈ ਸੀ, ਪਰ 10 ਦਿਨਾਂ ਬਾਅਦ ਵਾਪਸ ਚਲੇ ਗਈ। ਮੇਰਾ ਪਰਵਾਰ ਮੈਨੂੰ ਚੇਤੇ ਕਰ ਰਿਹਾ ਹੈ। ਮੈਂ ਭਾਰਤੀ ਵਿਦਿਆ ਭਵਨ ਦਾ ਅੰਤਰਰਾਸ਼ਟਰੀ ਉਪ ਪ੍ਰਧਾਨ ਵੀ ਹਾਂ ਅਤੇ ਮੈਂ 1984 ’ਚ ਨਾਗਪੁਰ ਕੇਂਦਰ ਦੀ ਸ਼ੁਰੂਆਤ ਕੀਤੀ ਸੀ। ਪੁਰੋਹਿਤ ਨੇ ਪਿਛਲੇ ਮਹੀਨੇ ਨਿੱਜੀ ਕਾਰਨਾਂ ਦਾ ਹਵਾਲਾ ਦਿੰਦੇ ਹੋਏ ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਨੂੰ ਆਪਣਾ ਅਸਤੀਫਾ ਸੌਂਪਿਆ ਸੀ।
