ਬੀਜਾਪੁਰ : ਛੱਤੀਸਗੜ੍ਹ ਦੇ ਬੀਜਾਪੁਰ ਜ਼ਿਲ੍ਹੇ ’ਚ ਪੱਤਰਕਾਰ ਦੀ ਹੱਤਿਆ ਦੇ ਮੁੱਖ ਮੁਲਜ਼ਮ ਸੁਰੇਸ਼ ਚੰਦਰਾਕਰ ਨੂੰ ਵਿਸ਼ੇਸ਼ ਜਾਂਚ ਟੀਮ (ਸਿਟ) ਨੇ ਹੈਦਰਾਬਾਦ ਤੋਂ ਗਿ੍ਰਫਤਾਰ ਕਰ ਲਿਆ ਹੈ। ਇਸੇ ਦੌਰਾਨ ਚੰਦਰਾਕਰ ਵੱਲੋਂ ਬੀਜਾਪੁਰ-ਗੰਗਾਲੂਰ ਰੋਡ ਕੰਢੇ ਜੰਗਲਾਤ ਦੀ ਜ਼ਮੀਨ ’ਤੇ ਕਬਜ਼ਾ ਕਰਕੇ ਬਣਾਏ ਗਏ ਯਾਰਡ ਨੂੰ ਢਾਹ ਦਿੱਤਾ ਗਿਆ ਹੈ। ਪੁਲਸ ਨੇ ਸੁਰੇਸ਼ ਚੰਦਰਾਕਰ ਤੇ ਹੋਰ ਮੁਲਜ਼ਮਾਂ ਦੇ ਬੈਂਕ ਖਾਤਿਆਂ ਨੂੰ ਫਰੀਜ਼ ਕਰਨ ਦੀ ਪ੍ਰਕਿਰਿਆ ਵੀ ਸ਼ੁਰੂ ਕਰ ਦਿੱਤੀ ਹੈ। ਫਿਲਹਾਲ ਸੁਰੇਸ਼ ਚੰਦਰਾਕਰ ਦੇ ਤਿੰਨ ਖਾਤਿਆਂ ਨੂੰ ਹੋਲਡ ’ਤੇ ਰੱਖਿਆ ਗਿਆ ਹੈ।
ਪੇਸ਼ੇ ਤੋਂ ਠੇਕੇਦਾਰ ਸੁਰੇਸ਼ ਚੰਦਰਾਕਰ, ਪੱਤਰਕਾਰ ਮੁਕੇਸ਼ ਚੰਦਰਾਕਰ ਦੀ ਹੱਤਿਆ ਦੇ ਬਾਅਦ ਤੋਂ ਹੀ ਫਰਾਰ ਸੀ। ਬਸਤਰ ਖੇਤਰ ਦੇ ਆਈ ਜੀ ਸੁੰਦਰਰਾਜ ਨੇ ਦੱਸਿਆ ਕਿ ਸਿਟ ਨੇ ਐਤਵਾਰ ਦੇਰ ਰਾਤ ਹੈਦਰਾਬਾਦ ਤੋਂ ਸੁਰੇਸ਼ ਚੰਦਰਾਕਰ ਨੂੰ ਹਿਰਾਸਤ ’ਚ ਲਿਆ। ਉਸ ਨੂੰ ਸੋਮਵਾਰ ਸਵੇਰੇ ਬੀਜਾਪੁਰ ਲਿਆਂਦਾ ਗਿਆ ਅਤੇ ਉਸ ਕੋਲੋਂ ਪੁੱਛ-ਪੜਤਾਲ ਕੀਤੀ ਜਾ ਰਹੀ ਹੈ। ਸੁਰੇਸ਼ ਚੰਦਰਾਕਰ ਦੇ ਭਰਾਵਾਂ ਰਿਤੇਸ਼ ਚੰਦਰਾਕਰ ਤੇ ਦਿਨੇਸ਼ ਚੰਦਰਾਕਰ ਅਤੇ ਸੁਪਰਵਾਈਜ਼ਰ ਮਹਿੰਦਰ ਰਾਮਟੇਕੇ ਨੂੰ ਪਹਿਲਾਂ ਹੀ ਗਿ੍ਰਫਤਾਰ ਕੀਤਾ ਜਾ ਚੁੱਕਾ ਹੈ।
ਫ੍ਰੀਲਾਂਸ ਪੱਤਰਕਾਰ ਮੁਕੇਸ਼ ਚੰਦਰਾਕਰ (33) ਪਹਿਲੀ ਜਨਵਰੀ ਨੂੰ ਲਾਪਤਾ ਹੋ ਗਿਆ ਸੀ। ਪੁਲਸ ਨੇ ਪਹਿਲਾਂ ਦੱਸਿਆ ਸੀ ਕਿ ਉਸ ਦੀ ਲਾਸ਼ 3 ਜਨਵਰੀ ਨੂੰ ਬੀਜਾਪੁਰ ਸ਼ਹਿਰ ਦੇ ਚੱਟਾਨਪਾਰਾ ਬਸਤੀ ’ਚ ਸੁਰੇਸ਼ ਚੰਦਰਾਕਰ ਦੀ ਸੰਪਤੀ ’ਤੇ ਬਣੇ ਸੈਪਟਿਕ ਟੈਂਕ ’ਚ ਮਿਲੀ ਸੀ।
ਪੱਤਰਕਾਰ ਚੰਦਰਾਕਰ ਐੱਨ ਡੀ ਟੀ ਵੀ ਨਿਊਜ਼ ਚੈਨਲ ਲਈ ਫ੍ਰੀਲਾਂਸ ਪੱਤਰਕਾਰ ਵਜੋਂ ਕੰਮ ਕਰਦਾ ਸੀ ਅਤੇ ਯੂ-ਟਿਊਬ ਚੈਨਲ ‘ਬਸਤਰ ਜੰਕਸ਼ਨ’ ਵੀ ਚਲਾਉਂਦਾ ਸੀ, ਜਿਸ ਦੇ ਕਰੀਬ 1.59 ਲੱਖ ਸਬਸਕ੍ਰਾਈਬਰ ਹਨ।
ਐੱਨ ਡੀ ਟੀ ਵੀ ’ਤੇ 25 ਦਸੰਬਰ ਨੂੰ ਦਿਖਾਈ ਗਈ ਬੀਜਾਪੁਰ ’ਚ ਸੜਕ ਨਿਰਮਾਣ ਕਾਰਜ ’ਚ ਕਥਿਤ ਭਿ੍ਰਸ਼ਟਾਚਾਰ ਨੂੰ ਉਜਾਗਰ ਕਰਨ ਵਾਲੀ ਇਕ ਖਬਰ ਨੂੰ ਮੁਕੇਸ਼ ਚੰਦਰਾਕਰ ਦੀ ਹੱਤਿਆ ਦਾ ਕਾਰਨ ਮੰਨਿਆ ਜਾ ਰਿਹਾ ਹੈ। ਉਸ ਨਿਰਮਾਣ ਕਾਰਜ ਦਾ ਸੰਬੰਧ ਠੇਕੇਦਾਰ ਸੁਰੇਸ਼ ਚੰਦਰਾਕਰ ਨਾਲ ਸੀ। ਛੱਤੀਸਗੜ੍ਹ ਦੇ ਉਪ ਮੁੱਖ ਮੰਤਰੀ ਵਿਜੈ ਸ਼ਰਮਾ ਨੇ ਦਾਅਵਾ ਕੀਤਾ ਸੀ ਕਿ ਸੁਰੇਸ਼ ਚੰਦਰਾਕਰ ਕਾਂਗਰਸੀ ਆਗੂ ਸੀ। ਹਾਲਾਂਕਿ ਵਿਰੋਧੀ ਧਿਰ ਨੇ ਦਾਅਵਾ ਕੀਤਾ ਕਿ ਮੁਲਜ਼ਮ ਹਾਲ ਹੀ ’ਚ ਸੱਤਾਧਾਰੀ ਭਾਜਪਾ ’ਚ ਸ਼ਾਮਲ ਹੋ ਗਏ ਸਨ। ਉੱਧਰ, ਮਹਾਰ ਸਮਾਜ ਦੇ ਮੈਂਬਰਾਂ ਨੇ ਐਤਵਾਰ ਪੱਤਰਕਾਰ ਦੀ ਹੱਤਿਆ ਦੀ ਨਿਖੇਧੀ ਕਰਨ ਲਈ ਮੋਮਬੱਤੀ ਮਾਰਚ ਕੱਢਿਆ ਤੇ ਮੁਲਜ਼ਮਾਂ ਨੂੰ ਮੌਤ ਦੀ ਸਜ਼ਾ ਦੇਣ ਦੀ ਮੰਗ ਕੀਤੀ। ਸ਼ਨਿੱਚਰਵਾਰ ਪੱਤਰਕਾਰਾਂ ਨੇ ਰਾਏਪੁਰ ਪ੍ਰੈੱਸ ਕਲੱਬ ’ਚ ਵਿਰੋਧ ਪ੍ਰਦਰਸ਼ਨ ਕਰਕੇ ਮੁਲਜ਼ਮਾਂ ਖਿਲਾਫ ਸਖਤ ਕਾਰਵਾਈ ਦੀ ਮੰਗ ਕੀਤੀ ਸੀ।
