ਕਾਰਾਂ ਦੀ ਟੱਕਰ ’ਚ ਬਜ਼ੁਰਗ ਜੋੜੇ ਦੀ ਮੌਤ, 9 ਜ਼ਖਮੀ

ਫਗਵਾੜਾ : ਵੀਰਵਾਰ ਦੇਰ ਰਾਤ ਫਗਵਾੜਾ-ਹੁਸ਼ਿਆਰਪੁਰ ਹਾਈਵੇ ’ਤੇ ਢੰਡੇ ਮੋੜ ਨੇੜੇ ਵਾਪਰੇ ਹਾਦਸੇ ’ਚ ਬਜ਼ੁਰਗ ਜੋੜੇ ਦੀ ਮੌਤ ਹੋ ਗਈ ਅਤੇ 9 ਲੋਕ ਜ਼ਖਮੀ ਹੋ ਗਏ। ਥਾਣਾ ਸਦਰ ਦੇ ਐੱਸ ਐੱਚ ਓ ਦਿਲਬਾਗ ਸਿੰਘ ਅਨੁਸਾਰ ਮਿ੍ਰਤਕਾਂ ਦੀ ਪਛਾਣ ਮੁਖਤਿਆਰ ਸਿੰਘ (70) ਅਤੇ ਉਨ੍ਹਾ ਦੀ ਪਤਨੀ ਧਰਮ ਕੌਰ ਦੋਵੇਂ ਵਾਸੀ ਫਗਵਾੜਾ ਨੇੜਲੇ ਪਿੰਡ ਜਗਜੀਤਪੁਰ ਵਜੋਂ ਹੋਈ ਹੈ।
ਹਾਦਸਾ ਉਸ ਸਮੇਂ ਵਾਪਰਿਆ, ਜਦੋਂ ਮੁਖਤਿਆਰ ਸਿੰਘ ਆਪਣੀ ਕਾਰ ਵਿੱਚ ਵਿਆਹ ਸਮਾਗਮ ਤੋਂ ਘਰ ਪਰਤ ਰਿਹਾ ਸੀ। ਜਦ ਉਹ ਢੰਡੇ-ਮੋੜ ਨੇੜੇ ਪਹੁੰਚੇ ਤਾਂ ਫਗਵਾੜਾ ਵਾਲੇ ਪਾਸੇ ਤੋਂ ਆ ਰਹੀ ਕਾਰ ਨੇ ਟੱਕਰ ਮਾਰ ਦਿੱਤੀ। ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਮੁਖਤਿਆਰ ਸਿੰਘ ਅਤੇ ਪਤਨੀ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਇਸ ਹਾਦਸੇ ’ਚ 9 ਹੋਰ ਲੋਕ ਜ਼ਖਮੀ ਹੋ ਗਏ, ਜਿਨ੍ਹਾਂ ਨੂੰ ਸਿਵਲ ਹਸਪਤਾਲ ਪਹੁੰਚਾਇਆ ਗਿਆ। ਜ਼ਖਮੀਆਂ ਵਿੱਚ ਸੁਖਵਿੰਦਰ ਸਿੰਘ (ਪੁੱਤਰ ਮੁਖਤਿਆਰ ਸਿੰਘ) ਅਤੇ ਉਸ ਦੇ ਬੱਚੇ ਨੈਨਾ ਦੇਵੀ, ਅਵਲੀਨ ਕੌਰ, ਸਮਰਵੀਰ ਅਤੇ ਗੁਰਲਾਜ ਕੌਰ ਤੋਂ ਇਲਾਵਾ ਕਾਰ ਵਿੱਚ ਸਵਾਰ ਮੋਹਨ ਲਾਲ, ਬਿੰਦਰ, ਮਮਤਾ ਅਤੇ ਬਰਖਾ ਸ਼ਾਮਲ ਹਨ। ਮੁੱਢਲੀ ਜਾਂਚ ਵਿੱਚ ਇਹ ਹਾਦਸਾ ਬਰਸਾਤ ਕਾਰਨ ਵਾਪਰਿਆ ਜਾਪਦਾ ਹੈ।