ਕਦਰਾਂ-ਕੀਮਤਾਂ ਬਚਾਉਣ ਦੀ ਲੜਾਈ

0
1

ਵਰਤਮਾਨ ਹਾਕਮ ਵੋਟਰ ਸੂਚੀਆਂ ਤੋਂ ਆਪਣੇ ਵਿਰੋਧੀਆਂ ਦੇ ਨਾਂਅ ਮਿਟਾਉਣਾ ਚਾਹੁੰਦੇ ਹਨ, ਤਾਂ ਜੋ ਉਹ ਚੋਣਾਂ ਜਿੱਤਦੇ ਰਹਿ ਸਕਣ, ਭਾਵੇਂ ਉਨ੍ਹਾਂ ਦੀ ਪ੍ਰਸਿੱਧੀ ਕਿੰਨੀ ਵੀ ਘਟ ਜਾਵੇ | ਵੋਟਰਾਂ ਨੂੰ ਛਾਂਗਣ ਲਈ ਵੋਟਰ ਸੂਚੀਆਂ ਦੀ ਡੂੰਘੀ ਸੁਧਾਈ (ਐੱਸ ਆਈ ਆਰ) ਨੂੰ ਜਾਇਜ਼ ਠਹਿਰਾਉਣ ਲਈ ਭਾਜਪਾ, ਇਸ ਦੀਆਂ ਸਰਕਾਰਾਂ ਅਤੇ ਨੇਤਾ ਉੱਚੀ ਆਵਾਜ਼ ਵਿੱਚ ਦਾਅਵੇ ਕਰ ਰਹੇ ਹਨ ਕਿ ਵੱਡੀ ਗਿਣਤੀ ਵਿੱਚ ਬੰਗਲਾਦੇਸ਼ੀ ਘੁਸਪੈਠੀਏ ਭਾਰਤ ਵਿੱਚ ਰਹਿ ਰਹੇ ਹਨ | ਹਾਲਾਂਕਿ ਤੱਥ ਉਨ੍ਹਾਂ ਦੇ ਦਾਅਵਿਆਂ ਨਾਲ ਮੇਲ ਨਹੀਂ ਖਾਂਦੇ |
ਭਾਰਤ ਦੀ ਸੱਤਾਧਾਰੀ ਪਾਰਟੀ ਪਹਿਲਾਂ ਹੀ ਨਿਆਂਪਾਲਿਕਾ ਵਿੱਚ ਘੁਸਪੈਠ ਕਰ ਚੁੱਕੀ ਹੈ | ਇਸ ਨੇ ਇਸ ਨੂੰ ਡੂੰਘਾ ਪ੍ਰਭਾਵਤ ਕੀਤਾ ਹੈ | ਇਸ ਨੇ ਕਈ ਖੁਦਮੁਖਤਿਆਰ ਸੰਸਥਾਵਾਂ ਨੂੰ ਕਠਪੁਤਲੀਆਂ ਵਿੱਚ ਬਦਲ ਦਿੱਤਾ ਹੈ ਅਤੇ ਲੋਕਾਂ ਦੇ ਜਮਹੂਰੀ ਅਧਿਕਾਰਾਂ ਨੂੰ ਹਰ ਤਰ੍ਹਾਂ ਨਾਲ ਖਤਮ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ | ਅਜਿਹੀ ਸਥਿਤੀ ਵਿੱਚ ਆਪੋਜ਼ੀਸ਼ਨ ਪਾਰਟੀਆਂ, ਖਾਸਕਰ ਖੱਬੀਆਂ ਪਾਰਟੀਆਂ ਦਾ ਉਸ ਨੂੰ ਫਾਸ਼ੀਵਾਦੀ ਕਹਿਣਾ ਬੇਤੁਕਾ ਨਹੀਂ ਜਾਪਦਾ | ਭਾਜਪਾ ਨੂੰ ਪੈਦਾ ਕਰਨ ਵਾਲੇ ਰਾਸ਼ਟਰੀ ਸੋਇਮਸੇਵਕ ਸੰਘ (ਆਰ ਐੱਸ ਐੱਸ) ਦੀ ਸਥਾਪਨਾ ਸਮਾਜ ਦੇ ਉਨ੍ਹਾਂ ਹਿੱਸਿਆਂ ਵੱਲੋਂ ਕੀਤੀ ਗਈ ਸੀ, ਜੋ ਬਿ੍ਟਿਸ਼ ਸ਼ਾਸਨ ਦੌਰਾਨ ਸ਼ੁਰੂ ਹੋਏ ਲੋਕਤੰਤਰ-ਪੱਖੀ ਅੰਦੋਲਨਾਂ ਦਾ ਵਿਰੋਧ ਕਰਦੇ ਸਨ | ਇਹ ਵਿਅਕਤੀ ਜਗੀਰੂ, ਜ਼ਿਮੀਂਦਾਰ ਅਤੇ ਪੁਜਾਰੀ ਵਰਗ ਨਾਲ ਸੰਬੰਧਤ ਸਨ, ਜੋ ਜਗੀਰੂ ਦਰਜਾਬੰਦੀ ਦੀਆਂ ਕਦਰਾਂ-ਕੀਮਤਾਂ ਨੂੰ ਸੁਰੱਖਿਅਤ ਰੱਖਣਾ ਚਾਹੁੰਦੇ ਸਨ | ਇਹ ਵਿਅਕਤੀ ਨਾ ਸਿਰਫ ਬਿ੍ਟਿਸ਼ ਵਿਰੋਧੀ ਸੰਘਰਸ਼ ਤੋਂ ਦੂਰ ਰਹੇ, ਸਗੋਂ ਸਮਾਜਿਕ ਅਤੇ ਲੋਕਤੰਤਰੀ ਸੁਧਾਰ ਅੰਦੋਲਨਾਂ ਦਾ ਵੀ ਵਿਰੋਧ ਕਰਦੇ ਸਨ | ਉਹ ਨਹੀਂ ਚਾਹੁੰਦੇ ਸਨ ਕਿ ਮਜ਼ਦੂਰਾਂ ਨੂੰ ਯੂਨੀਅਨਾਂ ਬਣਾਉਣ ਦਾ ਅਧਿਕਾਰ ਮਿਲੇ ਅਤੇ ਉਹ ਨਹੀਂ ਚਾਹੁੰਦੇ ਸਨ ਕਿ ਦਲਿਤਾਂ ਅਤੇ ਔਰਤਾਂ ਨੂੰ ਸਿੱਖਿਆ ਮਿਲੇ | ਇੰਡੀਅਨ ਨੈਸ਼ਨਲ ਕਾਂਗਰਸ ਨੇ ਆਜ਼ਾਦੀ ਅਤੇ ਲੋਕਤੰਤਰ ਪ੍ਰਾਪਤ ਕਰਨ ਲਈ ਇੱਕ ਲੰਮੀ ਲੜਾਈ ਲੜਦੇ ਹੋਏ, ਰਾਸ਼ਟਰੀ ਅੰਦੋਲਨ ਨੂੰ ਆਕਾਰ ਦੇਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ | ਇੱਕ ਪਾਸੇ ਮੁਸਲਿਮ ਲੀਗ ਅਤੇ ਦੂਜੇ ਪਾਸੇ ਆਰ ਐੱਸ ਐੱਸ-ਹਿੰਦੂ ਮਹਾਂਸਭਾ ਨੇ ਆਪਣੇ-ਆਪਣੇ ਧਰਮਾਂ ਦੇ ਨਾਂਅ ‘ਤੇ ਵੱਖਰੇ ਰਾਸ਼ਟਰਾਂ ਦੀ ਮੰਗ ਕੀਤੀ | ਬਾਅਦ ਵਿੱਚ ਆਰ ਐੱਸ ਐੱਸ ਨੇ ਭਾਰਤੀ ਸੰਵਿਧਾਨ ਅਤੇ ਤਿਰੰਗੇ ਝੰਡੇ ਦਾ ਵਿਰੋਧ ਕੀਤਾ, ਮਨੂੰ ਸਿਮਰਤੀ ਦੇ ਮੁੱਲਾਂ ਨੂੰ ਬਰਕਰਾਰ ਰੱਖਿਆ ਅਤੇ ਭਾਰਤੀ ਸੰਵਿਧਾਨ ਵਿੱਚ ਦਰਜ ਆਜ਼ਾਦੀ, ਸਮਾਨਤਾ ਅਤੇ ਭਾਈਚਾਰੇ ਦੇ ਮੁੱਲਾਂ ਦਾ ਵਿਰੋਧ ਕੀਤਾ | ਆਰ ਐੱਸ ਐੱਸ ਦੇ ਦੂਜੇ ਸਰਸੰਘਚਾਲਕ ਐੱਮ ਐੱਸ ਗੋਲਵਲਕਰ ਨੇ ਹਿੰਦੂ ਰਾਸ਼ਟਰਵਾਦੀ ਰਾਜਨੀਤੀ ਦੇ ਦੋ ਬੁਨਿਆਦੀ ਸਿਧਾਂਤ ਸਥਾਪਤ ਕੀਤੇ, ਜੋ ਅੱਜ ਦੀ ਭਾਜਪਾ ਰਾਜਨੀਤੀ ਦਾ ਆਧਾਰ ਬਣਦੇ ਹਨ | ਪਹਿਲਾ, ਉਸ ਨੇ ਮੁਸਲਮਾਨਾਂ, ਈਸਾਈਆਂ ਅਤੇ ਕਮਿਊਨਿਸਟਾਂ ਨੂੰ ਦੇਸ਼ ਦੇ ਅੰਦਰੂਨੀ ਦੁਸ਼ਮਣ ਐਲਾਨਿਆ ਅਤੇ ਦੂਜਾ, ਉਸ ਨੇ ਮਨੂੰ ਸਿਮਰਤੀ ਅਤੇ ਇਸ ਦੀ ਅੰਦਰੂਨੀ ਜਾਤੀ ਅਤੇ ਲਿੰਗ ਦਰਜਾਬੰਦੀ ਦੀ ਵਡਿਆਈ ਕੀਤੀ | ਭਾਰਤ ਦਾ ਫਾਸ਼ੀਵਾਦ ਜਰਮਨੀ ਤੋਂ ਥੋੜ੍ਹਾ ਵੱਖਰਾ ਹੈ, ਜਦੋਂ ਕਿ ਜਰਮਨੀ ਵਿੱਚ ਨਫਰਤ ਫੈਲਾਉਣ ਲਈ ਨਸਲ ਨੂੰ ਇੱਕ ਹਥਿਆਰ ਵਜੋਂ ਵਰਤਿਆ ਜਾਂਦਾ ਸੀ, ਭਾਰਤ ਵਿੱਚ ਇਸ ਉਦੇਸ਼ ਲਈ ਧਾਰਮਿਕ ਪਛਾਣ ਦੀ ਵਰਤੋਂ ਕੀਤੀ ਜਾ ਰਹੀ ਹੈ | ਰਾਮ ਮੰਦਰ, ਪਵਿੱਤਰ ਗਊ ਅਤੇ ਲਵ ਜੇਹਾਦ ਵਰਗੇ ਮੁੱਦਿਆਂ ਨੇ ਹਿੰਦੂ ਰਾਸ਼ਟਰਵਾਦ ਨੂੰ ਮਜ਼ਬੂਤ ਕਰਨ ਵਿੱਚ ਵੱਡੀ ਭੂਮਿਕਾ ਨਿਭਾਈ ਹੈ | ਮਹਾਤਮਾ ਗਾਂਧੀ ਨੇ ਆਰ ਐੱਸ ਐੱਸ ਨੂੰ ‘ਤਾਨਾਸ਼ਾਹੀ ਮਾਨਸਿਕਤਾ ਵਾਲਾ ਫਿਰਕੂ ਸੰਗਠਨ’ ਦੱਸਿਆ ਸੀ |
ਅੱਜ ਜਦੋਂ ਅਸੀਂ ਐੱਸ ਆਈ ਆਰ ਦੇ ਵਿਰੁੱਧ ਖੜ੍ਹੇ ਹਾਂ, ਸਾਨੂੰ ਇਹ ਸਮਝਣਾ ਚਾਹੀਦਾ ਹੈ ਕਿ ਭਾਜਪਾ ਸਰਕਾਰ ਕੋਈ ਆਮ ਸਰਕਾਰ ਨਹੀਂ ਹੈ | ਇਸ ਨੇ ਸੱਤਾ ਵਿੱਚ ਆਉਣ ਲਈ ਹਰ ਸੰਭਵ ਹੱਥਕੰਡੇ ਵਰਤੇ ਹਨ ਅਤੇ ਹੁਣ ਅਣਮਿੱਥੇ ਸਮੇਂ ਲਈ ਸੱਤਾ ਵਿੱਚ ਬਣੇ ਰਹਿਣਾ ਚਾਹੁੰਦੀ ਹੈ | ਇਹ ਇਸ ਤੱਥ ਦੇ ਬਾਵਜੂਦ ਹੈ ਕਿ ਇਸ ਦੀਆਂ ਲੋਕ ਵਿਰੋਧੀ ਨੀਤੀਆਂ ਕਾਰਨ ਵੱਡੀ ਗਿਣਤੀ ਵਿੱਚ ਲੋਕ ਇਸ ਦੇ ਵਿਰੁੱਧ ਹੋ ਗਏ ਹਨ | ਐੱਸ ਆਈ ਆਰ ਭਾਰਤੀ ਲੋਕਤੰਤਰ ਲਈ ਸਭ ਤੋਂ ਵੱਡਾ ਖਤਰਾ ਹੈ ਕਿਉਂਕਿ ਇਹ ਵੱਡੀ ਗਿਣਤੀ ਵਿੱਚ ਉਨ੍ਹਾਂ ਲੋਕਾਂ ਨੂੰ ਵਾਂਝੇ ਕਰ ਰਹੀ ਹੈ, ਜੋ ਭਾਜਪਾ ਦੇ ਵਿਰੁੱਧ ਵੋਟ ਪਾਉਂਦੇ ਹਨ | ਸੰਵਿਧਾਨ ਅਤੇ ਆਜ਼ਾਦੀ ਅੰਦੋਲਨ ਦੀਆਂ ਕਦਰਾਂ-ਕੀਮਤਾਂ ਅੱਜ ਗੰਭੀਰ ਖਤਰੇ ਵਿੱਚ ਹਨ, ਪਰ ਸਾਨੂੰ ਉਮੀਦ ਨਹੀਂ ਛੱਡਣੀ ਚਾਹੀਦੀ | ਸਾਨੂੰ ਭਰੋਸਾ ਰੱਖਣਾ ਚਾਹੀਦਾ ਹੈ ਕਿ ਸਾਡੇ ਯਤਨ ਲੋਕਤੰਤਰੀ ਸਿਧਾਂਤਾਂ ਨੂੰ ਬਹਾਲ ਕਰਨਗੇ |