ਲੁਧਿਆਣਾ ਰਹਿੰਦੇ ਹਰੀਸ਼ ਸਿੰਘ ’ਤੇ ਯੂ ਪੀ ’ਚ ਧਰਮ ਪਰਿਵਰਤਨ ਕਰਾਉਣ ਦਾ ਕੇਸ

ਸ਼ਰਾਵਸਤੀ : ਇਥੋਂ ਦੇ ਇਕਾਉਨਾ ਇਲਾਕੇ ਦੇ ਇੱਕ ਵਿਅਕਤੀ ’ਤੇ ਧਰਮ ਪਰਿਵਰਤਨ ਦੀ ਕਥਿਤ ਕੋਸ਼ਿਸ਼ ਦੇ ਦੋਸ਼ ਵਿਚ ਮਾਮਲਾ ਦਰਜ ਕੀਤਾ ਗਿਆ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਮੁਲਜ਼ਮ ਹਰੀਸ਼ ਸਿੰਘ ਫਿਲਹਾਲ ਫਰਾਰ ਹੈ। ਉਹ ਕੁਝ ਸਾਲਾਂ ਤੋਂ ਲੁਧਿਆਣਾ ਵਿੱਚ ਰਹਿ ਰਿਹਾ ਹੈ ਅਤੇ ਅਕਸਰ ਭਗਵਾਨਪੁਰ ਬੰਕਟਵਾ ਲੋਨਪੁਰਵਾ ਪਿੰਡ ਆਉਂਦਾ ਸੀ। ਐੱਸ ਪੀ ਘਨਸ਼ਿਆਮ ਚੌਰਸੀਆ ਨੇ ਕਿਹਾਉਹ ਹਾਲ ਹੀ ਵਿੱਚ ਪਿੰਡ ਵਿੱਚ ਸੀ ਅਤੇ ਕਥਿਤ ਤੌਰ ’ਤੇ ਇੱਕ ਝੌਂਪੜੀ ਵਿੱਚ ਯਿਸੂ ਮਸੀਹ ਦਾ ਨਾਂਅ ਲੈ ਕੇ ਬਿਮਾਰੀਆਂ ਦੇ ਇਲਾਜ ਲਈ ਸੈਸ਼ਨ ਚਲਾ ਰਿਹਾ ਸੀ। ਜ਼ਿਆਦਾਤਰ ਹਾਜ਼ਰ ਲੋਕ ਪਿੰਡ ਤੋਂ ਬਾਹਰ ਦੇ ਸਨ। ਐੱਸ ਪੀ ਨੇ ਦੱਸਿਆ ਕਿ ਵਿਸ਼ਵ ਹਿੰਦੂ ਪ੍ਰੀਸ਼ਦ ਦੇ ਕਾਰਕੁੰਨਾਂ ਵੱਲੋਂ ਮੁਹੱਈਆ ਕਰਵਾਏ ਗਏ ਵੀਡੀਓ ਦੇ ਆਧਾਰ ’ਤੇ ਪੁਲਸ ਨੇ ਜਾਂਚ ਕੀਤੀ। ਕਾਰਕੁੰਨਾਂ ਨੇ ਗੈਰ-ਕਾਨੂੰਨੀ ਤਰੀਕੇ ਨਾਲ ਧਰਮ ਪਰਿਵਰਤਨ ਦਾ ਦੋਸ਼ ਲਗਾਇਆ ਸੀ। ਚੌਰਸੀਆ ਨੇ ਕਿਹਾ ਕਿ ਹੋ ਸਕਦਾ ਹੈ ਕਿ ਉਹ ਪੰਜਾਬ ਭੱਜ ਗਿਆ ਹੋਵੇ, ਉੱਥੇ ਇੱਕ ਪੁਲਸ ਟੀਮ ਭੇਜੀ ਜਾਵੇਗੀ।