ਵਾਸ਼ਿੰਗਟਨ : ਖਰਬਪਤੀ ਉਦਯੋਗਪਤੀ ਐਲਨ ਮਸਕ ਨੇ ਸਨਿੱਚਰਵਾਰ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਵਿਆਪਕ ਟੈਕਸ ਤੇ ਖਰਚ ਕਟੌਤੀ ਬਿੱਲ ਨੂੰ ਲੈ ਕੇ ਮੁੜ ਨਾਰਾਜ਼ਗੀ ਜਤਾਉਂਦਿਆਂ ਕਿਹਾ ਕਿ ਜਿਸ ਬਿੱਲ ਨੂੰ ਲੈ ਕੇ ਰਿਪਬਲਿਕਨ ਪਾਰਟੀ ਦੇ ਸੰਸਦ ਮੈਂਬਰ ਤਰਲੋਮੱਛੀ ਹੋ ਰਹੇ ਹਨ, ਉਸ ਨਾਲ ਨੌਕਰੀਆਂ ਖਤਮ ਤੇ ਉਭਰਦੀਆਂ ਸਨਅਤਾਂ ਠੱਪ ਹੋ ਜਾਣਗੀਆਂ।
ਮਸਕ ਨੇ ‘ਐੱਕਸ’ ਉੱਤੇ ਲਿਖਿਆ, ‘ਸੈਨੇਟ ਦਾ ਨਵਾਂ ਖਰੜਾ ਬਿੱਲ ਅਮਰੀਕਾ ਵਿਚ ਲੱਖਾਂ ਨੌਕਰੀਆਂ ਖਤਮ ਕਰ ਦੇਵੇਗਾ ਤੇ ਸਾਡੇ ਦੇਸ਼ ਨੂੰ ਵੱਡਾ ਰਣਨੀਤਕ ਨੁਕਸਾਨ ਪੁੱਜੇਗਾ।’ ਮਸਕ ਨੇ ਇਹ ਗੱਲ ਅਜਿਹੇ ਮੌਕੇ ਕਹੀ ਹੈ, ਜਦੋਂ ਸੈੈਨੇਟ ਨੇ ਕਰੀਬ 1000 ਸਫਿਆਂ ਵਾਲੇ ਬਿੱਲ ’ਤੇ ਖੁੱਲ੍ਹੀ ਬਹਿਸ ਲਈ ਵੋਟਿੰਗ ਕਰਵਾਉਣੀ ਸੀ। ਉਨ੍ਹਾ ਕਿਹਾ, ‘ਇਸ ਨਾਲ ਪੁਰਾਣੇ ਉਦਯੋਗਾਂ ਨੂੰ ਤਾਂ ਲਾਭ ਹੋਵੇਗਾ, ਪਰ ਇਸ ਨਾਲ ਨਵੇਂ ਤੇ ਉਭਰਦੇ ਉਦਯੋਗਾਂ ਨੂੰ ਗੰਭੀਰ ਨੁਕਸਾਨ ਪਹੁੰਚੇਗਾ।’
ਟੈਸਲਾ ਤੇ ਸਪੇਸਐੱਕਸ ਦੇ ਸੀ ਈ ਓ ਨੇ ਮਗਰੋਂ ਇਕ ਪੋਸਟ ਵਿੱਚ ਲਿਖਿਆ, ‘ਇਹ ਬਿੱਲ ਰਿਪਬਲਿਕਨ ਪਾਰਟੀ ਲਈ ਸਿਆਸੀ ਖੁਦਕੁਸ਼ੀ’ ਹੋਵੇਗੀ। ਮਸਕ ਨੇ ਟਰੰਪ ’ਤੇ ਨਵੇਂ ਸਿਰੇ ਤੋਂ ਹੱਲਾ ਬੋਲਿਆ ਹੈ। ਹਾਲ ਹੀ ਵਿੱਚ ਮਸਕ ਨੇ ਟਰੰਪ ਪ੍ਰਸ਼ਾਸਨ ਦੇ ਸਕਿੱਲ ਵਿਭਾਗ ਨੂੰ ਛੱਡਦਿਆਂ ਉਨ੍ਹਾ ਉੱਤੇ ਗੰਭੀਰ ਦੋਸ਼ ਲਾਏ ਸਨ। ਅਮਰੀਕੀ ਸੰਸਦ ਦੇ ਉਪਰਲੇ ਸਦਨ ਸੈਨੇਟ ਵਿੱਚ ਟੈਕਸ ਛੋਟ, ਖਰਚਿਆਂ ’ਚ ਕਟੌਤੀ ਤੇ ਡਿਪੋਰਟੇਸ਼ਨ ਫੰਡ ਵਿੱਚ ਵਾਧੇ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਬਿੱਲ ਨੇ ਇਕ ਅਹਿਮ ਅਮਲੀ ਪੜਾਅ ਨੂੰ ਪੂਰਾ ਕਰ ਲਿਆ ਹੈ। ਇਸ ਬਿੱਲ ਨੂੰ ਪਾਸ ਕਰਨ ਦੀ ਨਿਰਧਾਰਤ ਮਿਆਦ 4 ਜੁਲਾਈ ਹੈ। ਸਨਿੱਚਰਵਾਰ ਦੇਰ ਰਾਤ ਤੱਕ ਚੱਲੀ ਸੈਨੇਟ ਦੀ ਬੈਠਕ ਦੌਰਾਨ ਅਮਲੀ ਪੜਾਅ ਵਿੱਚ ਹੋਈ ਵੋਟਿੰਗ ’ਚ ਬਿੱਲ ਦੇ ਪੱਖ ਵਿਚ 51 ਤੇ ਵਿਰੋਧ ’ਚ 49 ਵੋਟ ਪਏ। ਦੋਵੇਂ ਵੋਟ ਬਰਾਬਰ ਰਹਿਣ ਦੀ ਸੂਰਤ ਵਿਚ ‘ਟਾਈਬ੍ਰੇਕ’ ਲਈ ਉਪ ਰਾਸ਼ਟਰਪਤੀ ਜੇ ਡੀ ਵਾਂਸ ਸਦਨ ਵਿੱਚ ਮੌਜੂਦ ਸਨ। ਵਿਰੋਧੀ ਧਿਰ ਦੇ ਸੰਸਦ ਮੈਂਬਰ ਗੱਲਬਾਤ ਲਈ ਇਕੱਠੇ ਹੋਏ ਤਾਂ ਸਦਨ ’ਚ ਤਣਾਅ ਵਾਲੀ ਸਥਿਤੀ ਬਣ ਗਈ ਤੇ ਜਮੂਦ ਬਣਨ ਕਰਕੇ ਘੰਟਿਆਂਬੱਧੀ ਵੋਟਿੰਗ ਰੁਕੀ ਰਹੀ।
