ਸਤਲੁਜ ’ਚ ਵਧਿਆ ਪਾਣੀ ਦਾ ਪੱਧਰ, ਲੋਕ ਮੁੜ ਘਰ ਛੱਡਣ ਲਈ ਮਜਬੂਰ

ਫਿਰੋਜ਼ਪੁਰ : ਸਤਲੁਜ ਵਿੱਚ ਪਾਣੀ ਵਧਣ ਕਾਰਨ ਪਿੰਡਾਂ ਵਿੱਚ ਮੁੜ ਸਹਿਮ ਦਾ ਮਾਹੌਲ ਬਣ ਗਿਆ। ਇੱਥੋਂ ਦੇ ਖੇਤ ਪਹਿਲਾਂ ਹੀ ਪਾਣੀ ਵਿੱਚ ਡੁੱਬੇ ਹੋਏ ਸਨ। ਪ੍ਰਭਾਵਿਤ ਪਿੰਡਾਂ ਵਿੱਚ ਨਵੀਂ ਗੱਟੀ ਰਾਜੋਕੇ, ਟੈਂਡੀਵਾਲਾ, ਕਾਲੂਵਾਲਾ, ਨਿਹਾਲਾ ਕਿਲਚਾ, ਨਿਹਾਲਾ ਲਵੇਰਾ, ਧੀਰਾ ਘਾਰਾ ਅਤੇ ਬੰਡਾਲਾ ਸ਼ਾਮਲ ਹਨ। ਸਤਲੁਜ ਵਿੱਚ ਪਾਣੀ ਦੇ ਵਹਾਅ ਦੀ ਗਤੀ ਐਨੀ ਵਧ ਗਈ ਹੈ ਕਿ ਦਰਿਆ ਦੇ ਕਿਨਾਰੇ ਖੁਰਨ ਲੱਗ ਪਏ ਹਨ, ਜਿਸ ਨਾਲ ਵਸਨੀਕ ਚਿੰਤਤ ਹਨ। ਉਹ ਡਰੇ ਹੋਏ ਹਨ ਕਿ ਦਰਿਆ ਆਪਣਾ ਰਾਹ ਬਦਲ ਕੇ ਪਿੰਡਾਂ ਵੱਲ ਨਾ ਆ ਜਾਵੇ। ਲੱਗਭੱਗ 250 ਵਸਨੀਕਾਂ ਨੂੰ ਜੋ ਹਾਲ ਹੀ ਦੇ ਹੜ੍ਹਾਂ ਤੋਂ ਬਾਅਦ ਮੁਸ਼ਕਿਲ ਨਾਲ ਮੁੜ ਵਸੇ ਸਨ, ਪਾਣੀ ਦਾ ਪੱਧਰ ਵਧਣ ਕਾਰਨ ਦੁਬਾਰਾ ਘਰ ਛੱਡਣ ਲਈ ਮਜਬੂਰ ਹੋਣਾ ਪਿਆ ਹੈ। ਇਹ ਪਰਵਾਰ ਨੇੜਲੇ ਲੰਗਿਆਣਾ ਪਿੰਡ ਵੱਲ ਚਲੇ ਗਏ ਹਨ, ਜੋ ਕਿ ਤਰਪਾਲਾਂ ਦੇ ਅਸਥਾਈ ਆਸਰਿਆਂ ਹੇਠ ਰਹਿ ਰਹੇ ਹਨ ਅਤੇ ਸਰਕਾਰੀ ਸਹਾਇਤਾ ਦੀ ਉਡੀਕ ਕਰ ਰਹੇ ਹਨ। ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਉਨ੍ਹਾਂ ਦੇ ਟਿਊਬਵੈੱਲ ਅਤੇ ਬੋਰਵੈੱਲ ਅਜੇ ਵੀ ਖਰਾਬ ਪਏ ਹਨ ਅਤੇ ਹੜ੍ਹਾਂ ਦੌਰਾਨ ਡਿੱਗੇ ਬਿਜਲੀ ਦੇ ਖੰਭੇ ਅਜੇ ਠੀਕ ਨਹੀਂ ਹੋਏ ਹਨ। ਜਿਸ ਨਾਲ ਇਲਾਕੇ ਵਿੱਚ ਪੂਰਾ ਹਨੇਰਾ ਛਾਇਆ ਹੋਇਆ ਹੈ।