ਮਹਾਰਾਸ਼ਟਰ ’ਚ ਯੂ ਪੀ ਦੇ ਸਾਧੂ ਕੁੱਟੇ

ਸਾਂਗਲੀ : ਮਹਾਰਾਸ਼ਟਰ ਦੇ ਸਾਂਗਲੀ ਜ਼ਿਲ੍ਹੇ ’ਚ ਬੱਚੇ ਚੋਰੀ ਕਰਨ ਵਾਲਿਆਂ ਦੇ ਸ਼ੱਕ ਹੇਠ ਲੋਕਾਂ ਨੇ ਚਾਰ ਸਾਧੂਆਂ ’ਤੇ ਹਮਲਾ ਕਰ ਦਿੱਤਾ। ਹਾਲਾਂਕਿ ਸਾਧੂਆਂ ਨੇ ਮੰਗਲਵਾਰ ਨੂੰ ਵਾਪਰੀ ਇਸ ਘਟਨਾ ਦੀ ਵੀਡੀਓ ਵਾਇਰਲ ਹੋਣ ਦੇ ਬਾਅਦ ਵੀ ਕੋਈ ਸ਼ਿਕਾਇਤ ਦਰਜ ਨਹੀਂ ਕਰਾਈ ਹੈ। ਇਹ ਘਟਨਾ ਜਾਟ ਤਹਿਸੀਲ ਦੇ ਲਵੰਗਾ ਪਿੰਡ ’ਚ ਉਦੋਂ ਵਾਪਰੀ ਜਦੋਂ ਯੂ ਪੀ ਦੇ ਚਾਰ ਸਾਧੂ ਇਕ ਕਾਰ ’ਚ ਕਰਨਾਟਕ ਦੇ ਬੀਜਾਪੁਰ ਤੋਂ ਪੰਢਰਪੁਰ ਸ਼ਹਿਰ ਵੱਲ ਜਾ ਰਹੇ ਸਨ। ਪੁਲਸ ਅਧਿਕਾਰੀ ਨੇ ਦੱਸਿਆ ਕਿ ਇਹ ਸੋਮਵਾਰ ਨੂੰ ਪਿੰਡ ਦੇ ਇਕ ਮੰਦਰ ’ਚ ਰੁਕੇ ਸਨ ਅਤੇ ਮੰਗਲਵਾਰ ਨੂੰ ਅੱਗੇ ਜਾਣ ਤੋਂ ਪਹਿਲਾਂ ਇਨ੍ਹਾਂ ਨੇ ਇਕ ਬੱਚੇ ਤੋਂ ਰਾਹ ਪੁੱਛਿਆ ਸੀ। ਇਸ ਤੋਂ ਕੁਝ ਸਥਾਨਕ ਲੋਕਾਂ ਨੂੰ ਸ਼ੱਕ ਹੋਇਆ ਕਿ ਉਹ ਬੱਚਿਆਂ ਨੂੰ ਅਗਵਾ ਕਰਨ ਵਾਲੇ ਗਰੋਹ ਦੇ ਮੈਂਬਰ ਹਨ। ਲੋਕਾਂ ਨੇ ਡੰਡਿਆਂ ਨਾਲ ਇਨ੍ਹਾਂ ਦੀ ਕੁੱਟਮਾਰ ਕੀਤੀ।