ਮਰੀ ਹੋਈ ਧੀ ਨਿਕਲੀ ਜਿਊਂਦੀ

ਫਿਰੋਜ਼ਪੁਰ (ਗੁਰਬਚਨ ਸਿੰਘ)- ਕਰੀਬ ਸਵਾ ਦੋ ਮਹੀਨੇ ਪਹਿਲਾਂ ਪਿਓ ਵੱਲੋਂ ਧੀ ਨੂੰ ਨਹਿਰ ਵਿਚ ਧੱਕਾ ਦੇ ਕੇ ਮਾਰ ਦੇਣ ਤੋਂ ਬਾਅਦ ਐਤਵਾਰ ਨੂੰ ਧੀ ਨੇ ਆਪਣੇ ਆਪ ਨੂੰ ਜਿਊਂਦੀ ਦੱਸਿਆ ਹੈ। ਸੋਸ਼ਲ ਮੀਡੀਆ ਉਤੇ ਚੱਲ ਰਹੀ ਇਕ ਇਟਰਵਿਊ ਵਿਚ ਕਥਿਤ ਮਿ੍ਰਤਕ ਲੜਕੀ ਨੇ ਜਿਊਂਦੇ ਹੋਣ ਦਾ ਦਾਅਵਾ ਕੀਤਾ ਹੈ। ਦੱਸ ਦਈਏ ਕਿ ਕਰੀਬ ਸਵਾ ਦੋ ਮਹੀਨੇ ਪਹਿਲਾਂ ਇਕ ਬਾਪ ਵੱਲੋਂ ਆਪਣੀ ਧੀ ਪ੍ਰੀਤ ਦੇ ਚਾਲ ਚੱਲਣ ਉਤੇ ਸ਼ੱਕ ਕਰਦਿਆਂ ਉਸ ਨੂੰ ਨਹਿਰ ਵਿਚ ਧੱਕਾ ਦੇ ਦਿੱਤਾ ਸੀ। ਜਿਸ ਦੀ ਉਸ ਨੇ ਇਕ ਵੀਡਿਓ ਵੀ ਬਣਾਈ ਸੀ। ਫ਼ਿਰੋਜ਼ਪੁਰ ਪੁਲਿਸ ਵਲੋਂ ਮਾਮਲਾ ਦਰਜ ਕਰ ਕੇ ਲੜਕੀ ਦੇ ਬਾਪ ਨੂੰ ਗਿ੍ਰਫ਼ਤਾਰ ਕਰ ਲਿਆ ਗਿਆ ਸੀ। ਐਤਵਾਰ ਨੂੰ ਸ਼ੋਸ਼ਲ ਮੀਡੀਆ ਉਤੇ ਇੰਟਰਵੀਊ ਦਿੰਦਿਆਂ ਇਹ ਪ੍ਰੀਤ ਨਾਂਅ ਦੀ ਲੜਕੀ ਨੇ ਦੱਸਿਆ ਕਿ ਜਦ ਉਸ ਦੇ ਬਾਪ ਨੇ ਨਹਿਰ ਵਿਚ ਧੱਕਾ ਦਿੱਤਾ ਤਾਂ ਉਹ ਨਹਿਰ ਵਿਚ ਰੁੜਨ ਲੱਗੀ ਤਾਂ ਕਿਸਮਤ ਨਾਲ ਉਸ ਦਾ ਹੱਥ ਨਹਿਰ ਵਿਚ ਲੱਗੇ ਇਕ ਸਰੀਏ ਨੂੰ ਪੈ ਗਿਆ ਅਤੇ ਉਹ ਨਹਿਰ ਵਿਚੋਂ ਬਾਹਰ ਆ ਗਈ। ਲੜਕੀ ਪ੍ਰੀਤ ਨੇ ਦੱਸਿਆ ਕਿ ਉਸ ਨੂੰ ਨਹਿਰ ਵਿਚ ਧੱਕਾ ਦੇਣ ਲਈ ਉਸ ਦੀ ਮਾਂ ਵੀ ਜਿੰਮੇਵਾਰ ਹੈ। ਪਰ ਹੁਣ ਉਹ ਉਸ ਦੇ ਜੇਲ੍ਹ ’ਚ ਬੈਠੇ ਪਿਓ ਨੂੰ ਬਚਾਉਣਾ ਚਹੁੰਦੀ ਹੈ। ਓਧਰ ਪੁਲਿਸ ਲੜਕੀ ਦੇ ਜਿਉਂਦੇ ਹੋਣ ਦੀ ਖ਼ਬਰ ਤੋਂ ਬਾਅਦ ਲੜਕੀ ਦੀ ਭਾਲ ਕਰ ਰਹੀ ਹੈ।