ਜਲੰਧਰ : ਚਾਰੇ ਪਾਸੇ ਹਨੇਰਾ ਅਤੇ ਕੜਾਕੇ ਦੀ ਠੰਢ ਪੈ ਰਹੀ ਹੈ, ਇਸ ਸਰਦੀ ਦੇ ਸੀਜ਼ਨ ਵਿੱਚ ਪਾਰਾ 5 ਡਿਗਰੀ ਤੋਂ ਵੀ ਹੇਠਾਂ ਡਿੱਗ ਗਿਆ ਹੈ, ਪਰ ਸ਼ਹਿਰ ਦੇ ਤਿੰਨ ਰੈਣ-ਬਸੇਰਿਆਂ ਵਿੱਚ ਰਹਿਣ ਦੀ ਬਜਾਏ ਬੇਘਰੇ ਲੋਕ ਰੇਲਵੇ ਸਟੇਸ਼ਨ, ਬੱਸ ਸਟੈਂਡ ਦੇ ਬਾਹਰ, ਫਲਾਈਓਵਰਾਂ ਦੇ ਹੇਠਾਂ ਅਤੇ ਸੜਕਾਂ ਦੇ ਕਿਨਾਰੇ ਖੁੱਲ੍ਹੇ ਵਿੱਚ ਸੌਂ ਰਹੇ ਹਨ | ਦਰਅਸਲ ਉਨ੍ਹਾਂ ਕੋਲ ਆਧਾਰ ਕਾਰਡ ਨਹੀਂ ਹਨ, ਜੋ ਕਿ ਰੈਣ ਬਸੇਰਿਆਂ ਵਿੱਚ ਰਹਿਣ ਲਈ ਲਾਜ਼ਮੀ ਕੀਤੇ ਗਏ ਹਨ | ਨਗਰ ਨਿਗਮ ਵੱਲੋਂ ਦਮੋਰੀਆ ਅੰਡਰਬਿ੍ਜ ਹੇਠਾਂ ਚਲਾਏ ਜਾ ਰਹੇ 20 ਬਿਸਤਰਿਆਂ ਵਾਲੇ ਰੈਣ ਬਸੇਰੇ ਵਿੱਚ ਸਿਰਫ਼ ਇੱਕ ਹੀ ਵਿਅਕਤੀ ਮੌਜੂਦ ਸੀ | ਪਿਛਲੇ ਲੱਗਪੱਗ ਤਿੰਨ ਹਫ਼ਤਿਆਂ ਵਿੱਚ ਨਿਗਮ ਦੇ ਰਜਿਸਟਰ ਵਿੱਚ ਸਭ ਤੋਂ ਵੱਧ ਮੌਜੂਦਗੀ 29 ਦਸੰਬਰ ਨੂੰ ਦਰਜ ਕੀਤੀ ਗਈ ਸੀ, ਜਦੋਂ ਰਾਜਸਥਾਨ ਦੇ ਪੰਜ ਵਿਅਕਤੀ ਉੱਥੇ ਰੁਕੇ ਸਨ, ਜਦ ਕਿ ਬਾਕੀ ਦਿਨਾਂ ਵਿੱਚ ਇਹ ਗਿਣਤੀ ਜ਼ੀਰੋ ਤੋਂ ਤਿੰਨ ਦੇ ਵਿਚਕਾਰ ਰਹੀ ਹੈ | ਰੈਣ-ਬਸੇਰੇ ਦੇ ਬਿਲਕੁਲ ਬਾਹਰ ਸੌਂ ਰਹੇ ਸੂਰਜ ਨਾਂਅ ਦੇ ਵਿਅਕਤੀ ਨੇ ਦੱਸਿਆ ਕਿ ਉਹ ਅੰਦਰ ਸੌਣਾ ਚਾਹੁੰਦਾ ਸੀ, ਪਰ ਉਸ ਨੂੰ ਇਜਾਜ਼ਤ ਨਹੀਂ ਦਿੱਤੀ ਗਈ, ਕਿਉਂਕਿ ਉਸ ਕੋਲ ਆਧਾਰ ਕਾਰਡ ਨਹੀਂ ਹੈ ਅਤੇ ਸਟਾਫ਼ ਬਿਨਾਂ ਕਾਰਡ ਦੇ ਅੰਦਰ ਨਹੀਂ ਜਾਣ ਦਿੰਦਾ, ਹਾਲਾਂਕਿ ਉਹ ਪਿਛਲੇ ਇੱਕ ਦਹਾਕੇ ਤੋਂ ਜਲੰਧਰ ਰਹਿ ਰਿਹਾ ਹੈ | ਨਗਰ ਨਿਗਮ ਦੇ ਸੁਪਰਡੈਂਟ ਇੰਜੀਨੀਅਰ ਰਾਹੁਲ ਧਵਨ ਨੇ ਕਿਹਾ ਕਿ ਉਹ ਪਛਾਣ ਦੇ ਸਬੂਤ ਵਜੋਂ ਸਰਕਾਰੀ ਨਿਯਮਾਂ ਦੀ ਪਾਲਣਾ ਕਰ ਰਹੇ ਹਨ, ਕਿਉਂਕਿ ਸੁਰੱਖਿਆ ਦਾ ਮੁੱਦਾ ਹੋ ਸਕਦਾ ਹੈ ਅਤੇ ਰੁਕਣ ਵਾਲੇ ਕੋਲ ਘੱਟੋ-ਘੱਟ ਇੱਕ ਸਰਕਾਰੀ ਮਾਨਤਾ ਪ੍ਰਾਪਤ ਸ਼ਨਾਖਤੀ ਕਾਰਡ ਹੋਣਾ ਚਾਹੀਦਾ ਹੈ, ਨਾਲ ਹੀ ਉਨ੍ਹਾ ਕਿਹਾ ਕਿ ਨਸ਼ਿਆਂ ਦੀ ਮਨਾਹੀ ਕਾਰਨ ਵੀ ਕਈ ਲੋਕ ਉੱਥੇ ਆਉਣ ਤੋਂ ਗੁਰੇਜ਼ ਕਰਦੇ ਹਨ | ਦੂਜੇ ਪਾਸੇ ਯੂਥ ਕਾਂਗਰਸੀ ਆਗੂ ਅੰਗਦ ਦੱਤਾ ਨੇ ਕਿਹਾ ਕਿ ਡਿਫੈਂਸ ਕਾਲੋਨੀ ਨੇੜਲੇ ਰੈਣ ਬਸੇਰੇ ਵਿੱਚ ਰੋਜ਼ਾਨਾ ਪੰਜ-ਛੇ ਲੋਕ ਆਉਂਦੇ ਹਨ, ਜੋ ਉੱਥੇ ਪੱਕੇ ਤੌਰ ‘ਤੇ ਰਹਿ ਰਹੇ ਹਨ, ਪਰ ਉਨ੍ਹਾਂ ਦੀ ਐਂਟਰੀ ਰਿਕਾਰਡ ਵਿੱਚ ਨਹੀਂ ਪਾਈ ਜਾਂਦੀ, ਜਦ ਕਿ ਬਸਤੀ ਸ਼ੇਖ ਦੇ ਰੈਣ ਬਸੇਰੇ ਦੇ ਇੰਚਾਰਜ ਰਜਨੀਸ਼ ਡੋਗਰਾ ਨੇ ਦੱਸਿਆ ਕਿ ਉਨ੍ਹਾਂ ਕੋਲ 30-35 ਬਿਸਤਰੇ ਹਨ, ਪਰ ਖ਼ਰਾਬ ਮੌਸਮ ਵਿੱਚ ਵੀ ਗਿਣਤੀ ਘੱਟ ਰਹਿੰਦੀ ਹੈ | ਰੇਲਵੇ ਸਟੇਸ਼ਨ ਦੇ ਬਾਹਰ ਖਾਣ-ਪੀਣ ਦੀਆਂ ਵਸਤੂਆਂ ਵੇਚਣ ਵਾਲੇ ਇੱਕ ਦੁਕਾਨਦਾਰ ਨੇ ਦੱਸਿਆ ਕਿ ਲੋਕ ਖੁੱਲ੍ਹੇ ਵਿੱਚ ਸੌਣਾ ਪਸੰਦ ਕਰਦੇ ਹਨ, ਕਿਉਂਕਿ ਉੱਥੇ ਦਾਨੀ ਸੱਜਣ ਰਾਤ ਨੂੰ ਕੰਬਲ, ਗਰਮ ਕੱਪੜੇ ਅਤੇ ਰੋਟੀ ਵੰਡਣ ਆਉਂਦੇ ਹਨ |
