ਪੰਜਾਬ ਦੇ 14 ਜ਼ਿਲ੍ਹਿਆਂ ‘ਚ ਲਿੰਗ ਅਨੁਪਾਤ ‘ਚ ਗਿਰਾਵਟ

ਜਲੰਧਰ : ਪੰਜਾਬ ਵਿੱਚ ਜਨਮ ਸਮੇਂ ਲਿੰਗ ਅਨੁਪਾਤ ਵਿੱਚ ਇਸ ਸਾਲ ਮਾਮੂਲੀ ਸੁਧਾਰ ਦੇਖਣ ਨੂੰ ਮਿਲਿਆ ਹੈ, ਜੋ ਸਾਲ 2024 ਵਿੱਚ ਪ੍ਰਤੀ 1,000 ਲੜਕਿਆਂ ਪਿੱਛੇ 922 ਲੜਕੀਆਂ ਤੋਂ ਵਧ ਕੇ ਸਾਲ 2025 ਵਿੱਚ 924 ਹੋ ਗਿਆ ਹੈ, ਪਰ ਇਸ ਸੁਧਾਰ ਦੇ ਬਾਵਜੂਦ ਸਮੁੱਚੀ ਸਥਿਤੀ ਚਿੰਤਾਜਨਕ ਬਣੀ ਹੋਈ ਹੈ, ਕਿਉਂਕਿ ਸੂਬੇ ਦੇ 23 ਜ਼ਿਲ੍ਹਿਆਂ ਵਿੱਚੋਂ 14 ਜ਼ਿਲ੍ਹਿਆਂ ਵਿੱਚ ਇਸ ਸਾਲ ਲਿੰਗ ਅਨੁਪਾਤ ਵਿੱਚ ਵੱਡੀ ਗਿਰਾਵਟ ਦਰਜ ਕੀਤੀ ਗਈ ਹੈ।
ਪੰਜਾਬ ਸਿਹਤ ਵਿਭਾਗ ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ ਦੋਆਬਾ ਖੇਤਰ ਦੇ ਜ਼ਿਲ੍ਹੇ ਨਵਾਂਸ਼ਹਿਰ (ਸ਼ਹੀਦ ਭਗਤ ਸਿੰਘ ਨਗਰ) ਅਤੇ ਹੁਸ਼ਿਆਰਪੁਰ ਨੇ ਸੂਬੇ ਵਿੱਚ ਸਭ ਤੋਂ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ। ਨਵਾਂਸ਼ਹਿਰ ਵਿੱਚ ਪ੍ਰਤੀ 1,000 ਲੜਕਿਆਂ ਪਿੱਛੇ 964 ਅਤੇ ਹੁਸ਼ਿਆਰਪੁਰ ਵਿੱਚ 962 ਲੜਕੀਆਂ ਦਰਜ ਕੀਤੀਆਂ ਗਈਆਂ ਹਨ। ਹਾਲਾਂ ਕਿ ਪੰਜਾਬ ਹਾਲੇ ਵੀ 928 ਲੜਕੀਆਂ ਦੀ ਰਾਸ਼ਟਰੀ ਔਸਤ ਨਾਲੋਂ ਕਾਫੀ ਪਿੱਛੇ ਚੱਲ ਰਿਹਾ ਹੈ। ਸਰਹੱਦੀ ਜ਼ਿਲ੍ਹਿਆਂ ਵਿੱਚੋਂ ਫ਼ਾਜ਼ਿਲਕਾ 932 ਦੇ ਅੰਕੜੇ ਨਾਲ ਸਭ ਤੋਂ ਅੱਗੇ ਰਿਹਾ, ਜਿਸ ਵਿੱਚ ਪਿਛਲੇ ਸਾਲ ਦੇ ਮੁਕਾਬਲੇ ਕੋਈ ਬਦਲਾਅ ਨਹੀਂ ਹੋਇਆ। ਪਠਾਨਕੋਟ ਵਿੱਚ ਜ਼ਿਕਰਯੋਗ ਸੁਧਾਰ ਦੇਖਿਆ ਗਿਆ, ਜਿੱਥੇ ਇਹ ਅੰਕੜਾ 2024 ਵਿੱਚ 911 ਤੋਂ ਵਧ ਕੇ ਇਸ ਸਾਲ 926 ਹੋ ਗਿਆ। ਫ਼ਿਰੋਜ਼ਪੁਰ ਵਿੱਚ 923 ਅਤੇ ਗੁਰਦਾਸਪੁਰ ਵਿੱਚ ਇਹ ਅੰਕੜਾ 910 ਦਰਜ ਕੀਤਾ ਗਿਆ। ਅੰਮ੍ਰਿਤਸਰ ਪਿਛਲੇ ਸਾਲ ਦੇ 917 ਤੋਂ ਘਟ ਕੇ 915 ਅਤੇ ਤਰਨ ਤਾਰਨ 908 ਤੋਂ ਘਟ ਕੇ 903 ‘ਤੇ ਆ ਗਿਆ ਹੈ। ਇਸ ਸਾਲ ਜਿਨ੍ਹਾਂ 14 ਜ਼ਿਲ੍ਹਿਆਂ ਵਿੱਚ ਲਿੰਗ ਅਨੁਪਾਤ ਘਟਿਆ ਹੈ, ਉਨ੍ਹਾਂ ਵਿੱਚੋਂ 10 ਜ਼ਿਲ੍ਹੇ ਇਕੱਲੇ ਮਾਲਵਾ ਖੇਤਰ ਦੇ ਹਨ। ਲੁਧਿਆਣਾ, ਪਟਿਆਲਾ, ਬਰਨਾਲਾ, ਮੋਗਾ ਅਤੇ ਮਾਨਸਾ ਵਰਗੇ ਪ੍ਰਮੁੱਖ ਜ਼ਿਲ੍ਹਿਆਂ ਵਿੱਚ ਅੰਕੜਿਆਂ ਦਾ ਡਿੱਗਣਾ ਖੇਤਰ ਵਿੱਚ ਡੂੰਘੀ ਚਿੰਤਾ ਨੂੰ ਜਨਮ ਦਿੰਦਾ ਹੈ। ਸੂਬੇ ਦੇ ਇੱਕੋ-ਇੱਕ ਮੁਸਲਿਮ ਬਹੁਗਿਣਤੀ ਜ਼ਿਲ੍ਹੇ ਮਾਲੇਰਕੋਟਲਾ ਵਿੱਚ ਵੀ ਗਿਰਾਵਟ ਦਰਜ ਕੀਤੀ ਗਈ ਹੈ, ਜਿੱਥੇ ਇਹ ਅੰਕੜਾ 2024 ਵਿੱਚ 956 ਤੋਂ ਘਟ ਕੇ 2025 ਵਿੱਚ 952 ਰਹਿ ਗਿਆ ਹੈ।