ਮੁਆਫ਼ੀ ਮੰਗਣ ਦੀ ਬਜਾਏ ਮੋਦੀ ਵਿਕਟਮ ਕਾਰਡ ਖੇਡ ਰਹੇ : ਕਾਂਗਰਸ

ਨਵੀਂ ਦਿੱਲੀ : ਕਾਂਗਰਸ ਨੇ ਸਨਿੱਚਰਵਾਰ ਕਿਹਾ ਕਿ ਨਰਿੰਦਰ ਮੋਦੀ ਇਹ ਕਹਿ ਕੇ ਕਿ ਉਨ੍ਹਾ ਉਨ੍ਹਾਂ ਨੌਜਵਾਨਾਂ ਨੂੰ ਮਾਫ਼ ਕਰ ਦਿੱਤਾ ਹੈ, ਜਿਨ੍ਹਾਂ ਉਨ੍ਹਾ ਨੂੰ ਗਾਲ੍ਹਾਂ ਕੱਢੀਆਂ ਸਨ, ਵਿਕਟਮ ਕਾਰਡ ਖੇਡ ਰਹੇ ਹਨ। ਕਾਂਗਰਸ ਨੇ ਪ੍ਰਧਾਨ ਮੰਤਰੀ ਤੋਂ ਪ੍ਰਦਰਸ਼ਨ ਕਰ ਰਹੇ ਵਿਦਿਆਰਥੀਆਂ ‘ਤੇ ਕੀਤੀ ਗਈ ‘ਬਰਬਰਤਾ’ ਅਤੇ ਪੇਪਰ ਲੀਕ ਕਾਰਨ ਉਨ੍ਹਾਂ ਦੇ ਝੱਲੇ ਦੁੱਖ ਲਈ ਮੁਆਫ਼ੀ ਮੰਗਣ ਦੀ ਮੰਗ ਕੀਤੀ ਹੈ। ਵਿਰੋਧੀ ਪਾਰਟੀ ਨੇ ਇਹ ਵੀ ਦਾਅਵਾ ਕੀਤਾ ਕਿ ਪ੍ਰਧਾਨ ਮੰਤਰੀ ਦੀਆਂ ‘ਇੰਸਟਾਗ੍ਰਾਮ ਸਭਾਵਾਂ’, ਜਿਨ੍ਹਾਂ ਨੂੰ ਉਹਨਾ ‘ਸਰਵਉੱਚ ਸਵੈ-ਮੋਹ’ ਦੀ ਕਾਰਵਾਈ ਕਰਾਰ ਦਿੱਤਾ, ਕਿਸੇ ਨੂੰ ਵੀ ਮੂਰਖ ਨਹੀਂ ਬਣਾ ਰਹੀਆਂ ਹਨ।
ਕਾਂਗਰਸ ਜਨਰਲ ਸਕੱਤਰ ਜੈਰਾਮ ਰਮੇਸ਼ ਨੇ ‘ਐੱਕਸ’ ‘ਤੇ ਇੱਕ ਪੋਸਟ ਵਿੱਚ ਕਿਹਾ, ‘ਕੱਲ੍ਹ ਦੇਰ ਰਾਤ, ਸਰਵਉੱਚ ਸਵੈ-ਮੋਹ ਦੇ ਇੱਕ ਕਾਰਜ ਵਿੱਚ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਉਨ੍ਹਾ ਸਾਰੇ ਨੌਜਵਾਨਾਂ ਨੂੰ ਮਾਫ਼ ਕਰ ਦਿੱਤਾ ਹੈ। ਇਹ ਰਾਸ਼ਟਰ ਅਤੇ ਸਾਡੇ ਨੌਜਵਾਨਾਂ ਦਾ ਅਪਮਾਨ ਹੈ, ਜਿਨ੍ਹਾਂ ਉਨ੍ਹਾ ਦੀ ਸਰਕਾਰ ਹੇਠ ਦੁੱਖ ਝੱਲਿਆ ਹੈ ਅਤੇ ਜਾਇਜ਼ ਤੌਰ ‘ਤੇ ਉਨ੍ਹਾਂ ਤੋਂ ਮੁਆਫ਼ੀ ਦੀ ਮੰਗ ਕਰ ਰਹੇ ਹਨ। ਪ੍ਰਧਾਨ ਮੰਤਰੀ ਦੀਆਂ ਇੰਸਟਾਗ੍ਰਾਮ ਸਭਾਵਾਂ ਕਿਸੇ ਨੂੰ ਮੂਰਖ ਨਹੀਂ ਬਣਾ ਰਹੀਆਂ।’ ਸ਼ੁੱਕਰਵਾਰ ਰਾਤ ਪੋਸਟ ਕੀਤੀ ਗਈ ਇੱਕ ਇੰਸਟਾਗ੍ਰਾਮ ਵੀਡੀਓ ਵਿੱਚ ਮੋਦੀ ਨੇ ਕਿਹਾ ਕਿ ਇਸ ਨਾਲ ਉਨ੍ਹਾ ਨੂੰ ਦੁੱਖ ਹੋਇਆ ਹੈ ਕਿ ਜੰਤਰ-ਮੰਤਰ ਵਿਖੇ ਇੱਥੋਂ ਤੱਕ ਕਿ ਉਨ੍ਹਾ ਦੀ ਮਰਹੂਮ ਮਾਂ ਨੂੰ ਵੀ ‘ਭੱਦੀਆਂ ਗਾਲ੍ਹਾਂ’ ਕੱਢੀਆਂ ਗਈਆਂ ਅਤੇ ਅਫ਼ਸੋਸ ਪ੍ਰਗਟ ਕੀਤਾ ਕਿ ‘ਸਾਡੀਆਂ ਧੀਆਂ’ ਨੇ ਅਜਿਹੀ ਭਾਸ਼ਾ ਦੀ ਵਰਤੋਂ ਕੀਤੀ ਹੈ, ਨਾਲ ਹੀ ਉਨ੍ਹਾ ‘ਕੁਰਾਹੇ ਪਏ ਬੱਚਿਆਂ’ ਨੂੰ ਮਾਫ਼ ਕਰਨ ਦਾ ਸੱਦਾ ਵੀ ਦਿੱਤਾ। ਆਪਣੀ ਪੋਸਟ ਵਿੱਚ ਰਮੇਸ਼ ਨੇ ਕਿਹਾ, ‘ਸਵੈ-ਘੋਸ਼ਿਤ ਗੈਰ-ਜੀਵ ਵਿਗਿਆਨਕ ਪ੍ਰਧਾਨ ਮੰਤਰੀ ਵਿਕਟਮ ਕਾਰਡ ਖੇਡਣ ਦਾ ਆਨੰਦ ਲੈਂਦੇ ਹਨ।’ ਕਾਂਗਰਸ ਆਗੂ ਨੇ ਇਹ ਵੀ ਕਿਹਾ ਕਿ ਮੋਦੀ ਆਪਣੇ ਪੂਰਵਜ਼ਾਂ ਅਤੇ ਸਿਆਸੀ ਵਿਰੋਧੀਆਂ ਵਿਰੁੱਧ ‘ਘਿਣਾਉਣੇ ਵਿਅੰਗ’ ਦੀ ਵਰਤੋਂ ਕਰਦੇ ਹਨ। ਕਾਂਗਰਸੀ ਆਗੂ ਨੇ ਕਿਹਾ ਉਹ ਆਪਣੇ ਜਨਤਕ ਭਾਸ਼ਣਾਂ ਵਿੱਚ ਹੀ ਨਹੀਂ ਸਗੋਂ ਸੰਸਦ ਵਿੱਚ ਵੀ ਉਨ੍ਹਾਂ ਨੂੰ ਬਦਨਾਮ ਕਰਨ ਲਈ ਅਕਸਰ ਝੂਠ ਦਾ ਪ੍ਰਚਾਰ ਕਰਦੇ ਹਨ। ਉਹ ਸੰਸਦ ਦੇ ਅੰਦਰ ਅਤੇ ਬਾਹਰ ਗੰਦੀ ਜ਼ੁਬਾਨ ਵਾਲੇ ਅਪਰਾਧੀਆਂ ਦੀ ਇੱਕ ਫ਼ੌਜ ਛੱਡ ਦਿੰਦੇ ਹਨ ਅਤੇ ਉਨ੍ਹਾਂ ਨੂੰ ਪੂਰੀ ਸੁਰੱਖਿਆ ਦਿੰਦੇ ਹਨ।
ਉਨ੍ਹਾ ਕਿਹਾ, ‘ਪੂਰਾ ਦੇਸ਼ ਚਾਹੁੰਦਾ ਹੈ ਕਿ ਪ੍ਰਧਾਨ ਮੰਤਰੀ ਆਪਣੇ ਪੇਪਰ ਲੀਕ ਨਾਲ ਭਰੇ ਐੱਨ ਟੀ ਏ ਅਤੇ ਆਪਣੇ ਗ੍ਰਹਿ ਮੰਤਰਾਲੇ ਦੁਆਰਾ ਪ੍ਰਵਾਨਤ ਪ੍ਰਦਰਸ਼ਨਕਾਰੀ ਵਿਦਿਆਰਥੀਆਂ ‘ਤੇ ਕੀਤੀ ਗਈ ਬਰਬਰਤਾ ਰਾਹੀਂ ਲੱਖਾਂ ਨੌਜਵਾਨਾਂ ਨੂੰ ਦਿੱਤੇ ਗਏ ਦੁੱਖ ਲਈ ਮੁਆਫ਼ੀ ਮੰਗਣ।’ ਜੈਰਾਮ ਰਮੇਸ਼ ਨੇ ਕਿਹਾ, ”ਪੂਰਾ ਦੇਸ਼ ਪ੍ਰਧਾਨ ਮੰਤਰੀ ਤੋਂ ਰਾਮ ਮੰਦਰ ਟਰੱਸਟ ਦੁਆਰਾ ‘ਚੰਦਾ ਚੋਰੀ ਆਸਥਾ ਧੋਖਾ’ ਲਈ ਮੁਆਫ਼ੀ ਮੰਗਣ ਦੀ ਉਡੀਕ ਕਰ ਰਿਹਾ ਹੈ। ਪੂਰਾ ਦੇਸ਼ ਅਜੇ ਵੀ 8 ਨਵੰਬਰ, 2016 ਦੀ ਉਨ੍ਹਾ ਦੀ ਤੁਗਲਕੀ ਨੋਟਬੰਦੀ ਲਈ ਉਨ੍ਹਾ ਦੀ ਮੁਆਫ਼ੀ ਦੀ ਉਮੀਦ ਕਰ ਰਿਹਾ ਹੈ, ਜਿਸ ਨੇ ਕਰੋੜਾਂ ਦੀ ਰੋਜ਼ੀ-ਰੋਟੀ ਨੂੰ ਤਬਾਹ ਕਰ ਦਿੱਤਾ ਅਤੇ ਲੱਖਾਂ ਐੱਮ ਐੱਸ ਐੱਮ ਈ ਨੂੰ ਬੰਦ ਕਰ ਦਿੱਤਾ, ਸੂਚੀ ਬੇਅੰਤ ਹੈ।”