ਰਾਮਾਂ ਮੰਡੀ : ਪਿੰਡ ਮਲਕਾਣਾ ਦੀ ਸੰਦੋਹਾ ਬ੍ਰਾਂਚ ਨਹਿਰ ‘ਚ ਨਹਿਰੂ ਨਵੋਦਿਆ ਸਕੂਲ ਨੇੜੇ ਬੁੱਧਵਾਰ ਸਵੇਰੇ 35-40 ਫੁੱਟ ਚੌੜਾ ਪਾੜ ਪੈਣ ਨਾਲ ਸਕੂਲ ਦੇ ਹੋਸਟਲ ਦੇ ਕਮਰੇ ਪਾਣੀ ਵਿਚ ਡੁੱਬ ਗਏ | ਪਿੰਡ ਦੀਆਂ ਗਲੀਆਂ ‘ਚ ਵੀ ਕਈ ਫੁੱਟ ਪਾਣੀ ਭਰ ਗਿਆ |
ਸੂਚਨਾ ਮਿਲਦੇ ਹੀ ਤਹਿਸੀਲਦਾਰ ਰਮਨਦੀਪ ਕੌਰ ਤਲਵੰਡੀ ਸਾਬੋ ਅਤੇ ਨਹਿਰੀ ਵਿਭਾਗ ਦੇ ਅਧਿਕਾਰੀ ਮੌਕੇ ‘ਤੇ ਪਹੁੰਚੇ ਅਤੇ ਪਿੱਛੋਂ ਪਾਣੀ ਬੰਦ ਕਰਵਾਇਆ | ਵੱਡੀ ਗਿਣਤੀ ਵਿਚ ਪਿੰਡ ਵਾਸੀਆਂ ਨੇ ਪਹੁੰਚ ਕੇ ਕਾਫੀ ਮਿਹਨਤ ਤੋਂ ਬਾਅਦ ਪਾੜ ਬੰਦ ਕੀਤਾ | ਲੋਕਾਂ ਨੇ ਤਹਿਸੀਲਦਾਰ ਨੂੰ ਕਿਹਾ ਕਿ ਰਜਵਾਹਿਆਂ ‘ਚ ਵਾਰ-ਵਾਰ ਪਾੜ ਪੈਣ ਦੀ ਸਮੱਸਿਆ ਦੇ ਹੱਲ ਲਈ ਸਮੂਹ ਨਹਿਰਾਂ ਅਤੇ ਰਜਵਾਹਿਆਂ ਦੇ ਕਿਨਾਰੇ ਮਜ਼ਬੂਤ ਕੀਤੇ ਜਾਣ |
