ਸ੍ਰੀਨਗਰ : ਕਸ਼ਮੀਰੀ ਮਹਿਮਾਨਨਿਵਾਜ਼ੀ ਦੇ ਦਿਲ ਨੂੰ ਛੂਹ ਲੈਣ ਵਾਲੇ ਮੁਜ਼ਾਹਰੇ ’ਚ ਸ੍ਰੀਨਗਰ-ਸੋਨਮਰਗ ਹਾਈਵੇ ’ਤੇ ਗੁੰਡ ਦੇ ਸਥਾਨਕ ਲੋਕਾਂ ਨੇ ਸ਼ੁੱਕਰਵਾਰ ਸੋਨਮਰਗ ਤੋਂ ਵਾਪਸ ਆਉਂਦੇ ਸਮੇਂ ਭਾਰੀ ਬਰਫਬਾਰੀ ’ਚ ਫਸ ਗਏ ਪੰਜਾਬ ਦੇ ਇੱਕ ਦਰਜਨ ਦੇ ਕਰੀਬ ਸੈਲਾਨੀਆਂ ਨੂੰ ਪਨਾਹ ਦੇਣ ਲਈ ਮਸਜਿਦ ਦੇ ਦਰਵਾਜ਼ੇ ਖੋਲ੍ਹ ਦਿੱਤੇ। ਅਧਿਕਾਰੀਆਂ ਨੇ ਕਿਹਾ ਕਿ ਸੈਲਾਨੀਆਂ ਦੇ ਵਾਹਨ ਬਰਫ ’ਚ ਫਸ ਗਏ ਅਤੇ ਨੇੜਲੇ ਹੋਟਲ ਤੇ ਸਥਾਨਕ ਘਰ ਉਨ੍ਹਾਂ ਨੂੰ ਸਾਂਭਣ ਲਈ ਬਹੁਤ ਛੋਟੇ ਹੋਣ ਕਰਕੇ ਗੁੰਡ ਨਿਵਾਸੀਆਂ ਨੇ ਉਨ੍ਹਾਂ ਲਈ ਜਾਮੀਆ ਮਸਜਿਦ ਦੇ ਦਰਵਾਜੇ ਖੋਲ੍ਹ ਦਿੱਤੇ, ਜਿਸ ਨਾਲ ਸੈਲਾਨੀਆਂ ਨੇ ਯਖ਼ ਠੰਢੀ ਰਾਤ ਇਨਸਾਨੀਅਤ ਦੇ ਨਿੱਘ ਵਿੱਚ ਕੱਟੀ।
ਬਸ਼ੀਰ ਅਹਿਮਦ ਨੇ ਕਿਹਾ ਕਿ ਇਹੋ ਸਭ ਤੋਂ ਵਧੀਆ ਸੰਭਵ ਹੱਲ ਸੀ, ਕਿਉਂਕਿ ਮਸਜਿਦ ’ਚ ਇੱਕ ਹਮਾਮ ਹੈ, ਜੋ ਰਾਤ-ਭਰ ਗਰਮ ਰਹਿੰਦਾ ਹੈ। ਗੁੰਡ ਵਿਖੇ ਜਾਮੀਆ ਮਸਜਿਦ ਗਗਨਗੀਰ ’ਚ ਹੋਏ ਅੱਤਵਾਦੀ ਹਮਲੇ ਵਾਲੀ ਥਾਂ ਤੋਂ 10 ਕਿਲੋਮੀਟਰ ਤੋਂ ਵੀ ਘੱਟ ਦੂਰੀ ’ਤੇ ਸਥਿਤ ਹੈ, ਜਿੱਥੇ ਇਸ ਸਾਲ ਅਕਤੂਬਰ ’ਚ ਛੇ ਲੋਕ (ਪੰਜ ਗੈਰ-ਮੁਕਾਮੀ ਮਜ਼ਦੂਰ ਅਤੇ ਇੱਕ ਸਥਾਨਕ ਡਾਕਟਰ) ਮਾਰੇ ਗਏ ਸਨ।
ਮਸਜਿਦ ਦੇ ਅੰਦਰ ਰਾਤ ਬਿਤਾਉਣ ਵਾਲੇ ਸੈਲਾਨੀਆਂ ਦਾ ਇੱਕ ਵੀਡੀਓ ਸੋਸ਼ਲ ਮੀਡੀਆ ਉਤੇ ਵਾਇਰਲ ਹੋ ਗਿਆ ਹੈ। ਸੈਲਾਨੀਆਂ ਨੇ ਸਥਾਨਕ ਲੋਕਾਂ ਦੀ ਮਦਦ ਲਈ ਉਨ੍ਹਾਂ ਦਾ ਧੰਨਵਾਦ ਕੀਤਾ। ਇਕ ਸੈਲਾਨੀ ਆਖ ਰਿਹਾ ਹੈਅਸੀਂ ਬਰਫ ’ਚ ਫਸ ਗਏ ਸੀ ਅਤੇ ਤੁਸੀਂ ਸਾਡੀ ਮਦਦ ਲਈ ਆਏ। ਅਸੀਂ ਤੁਹਾਡੇ ਸਾਰਿਆਂ ਦੇ ਬਹੁਤ ਧੰਨਵਾਦੀ ਹਾਂ। ਇੱਕ ਹੋਰ ਸੈਲਾਨੀ ਨੇ ਕਿਹਾਹਰ ਕਿਸੇ ਨੂੰ ਕਸ਼ਮੀਰ ਦੀ ਮਹਿਮਾਨਨਿਵਾਜ਼ੀ ਮਾਨਣ ਲਈ ਜਾਣਾ ਚਾਹੀਦਾ ਹੈ। ਇੱਥੇ ਹਰ ਕੋਈ ਦਿਆਲੂ ਹੈ ਅਤੇ ਉਥੇ ਜਾਣਾ ਸੁਰੱਖਿਅਤ ਹੈ। ਕਿਰਪਾ ਕਰਕੇ ਧਰਤੀ ’ਤੇ ਇਸ ਸਵਰਗ ’ਚ ਆਓ।
ਹੁਰੀਅਤ ਕਾਨਫਰੰਸ ਦੇ ਚੇਅਰਮੈਨ ਮੀਰਵਾਇਜ਼ ਉਮਰ ਫਾਰੂਕ ਨੇ ਵੀ ਕਿਹਾ ਕਿ ਫਸੇ ਸੈਲਾਨੀਆਂ ਲਈ ਆਪਣੀਆਂ ਮਸਜਿਦਾਂ ਅਤੇ ਘਰ ਖੋਲ੍ਹਦੇ ਦੇਖਣਾ ਦਿਲ ਨੂੰ ਛੂਹ ਗਿਆ। ਨਿੱਘ ਅਤੇ ਇਨਸਾਨੀਅਤ ਦੀ ਇਹ ਕਾਰਵਾਈ ਮਹਿਮਾਨਨਿਵਾਜ਼ੀ ਅਤੇ ਲੋੜ ਦੇ ਸਮੇਂ ਦੂਜਿਆਂ ਦੀ ਮਦਦ ਕਰਨ ਦੀ ਸਾਡੀ ਮੁੱਦਤਾਂ ਤੋਂ ਚੱਲੀ ਆ ਰਹੀ ਰਵਾਇਤ ਨੂੰ ਦਰਸਾਉਂਦੀ ਹੈ।
ਪੀ ਡੀ ਪੀ ਨੇਤਾ ਇਲਤਿਜ਼ਾ ਮੁਫਤੀ ਨੇ ਵੀ ਸਥਾਨਕ ਲੋਕਾਂ ਵੱਲੋਂ ਨਿਭਾਏ ਗਏ ਇਨਸਾਨੀ ਫ਼ਰਜ਼ ਦੀ ਸ਼ਲਾਘਾ ਕਰਦਿਆਂ ਕਿਹਾਗੰਦਰਬਲ ’ਚ ਫਸੇ ਸੈਲਾਨੀਆਂ ਨੂੰ ਕੱਲ੍ਹ ਰਾਤ ਇੱਕ ਮਸਜਿਦ ’ਚ ਅਚਾਨਕ, ਪਰ ਨਿੱਘੀ ਪਨਾਹ ਮਿਲੀ। ਕਸ਼ਮੀਰੀ ਸਿਰਫ ਇਨਸਾਨ ਹੀ ਨਹੀਂ, ਸਗੋਂ ਇਨਸਾਨੀਅਤ ਵਾਲੇ ਵੀ ਹਨ। ਮੈਂ ਚਾਹੁੰਦੀ ਹਾਂ ਕਿ ਮੀਡੀਆ ਉਨ੍ਹਾਂ ਰੂੜ੍ਹੀਵਾਦੀ ਧਾਰਨਾਵਾਂ ਨੂੰ ਪ੍ਰਚਾਰਨਾ ਬੰਦ ਕਰ ਦੇਵੇ, ਜੋ ਅੱਖਾਂ ਵਿਚ ਰੜਕਦੀਆਂ ਹਨ ਅਤੇ ਇਸ ਦੀ ਬਜਾਏ ਇਹ ਉਜਾਗਰ ਕਰੇ ਕਿ ਕਸ਼ਮੀਰੀ ਸੱਚਮੁੱਚ ਕਿੰਨੇ ਮਹਿਮਾਨਨਿਵਾਜ਼ ਹਨ।
ਸੋਸ਼ਲ ਮੀਡੀਆ ’ਤੇ ਵਾਇਰਲ ਇੱਕ ਹੋਰ ਵੀਡੀਓ ’ਚ ਗੰਦਰਬਲ ਜ਼ਿਲ੍ਹੇ ਦੇ ਕੰਗਨ ਖੇਤਰ ’ਚ ਇੱਕ ਪਰਵਾਰ ਵੱਲੋਂ ਔਰਤਾਂ ਅਤੇ ਬੱਚਿਆਂ ਸਮੇਤ ਕਈ ਸੈਲਾਨੀ ਪਰਵਾਰਾਂ ਦੀ ਮੇਜ਼ਬਾਨੀ ਕੀਤੀ ਜਾ ਰਹੀ ਹੈ, ਜਦੋਂ ਉਹ ਬਰਫਬਾਰੀ ਕਾਰਨ ਫਸ ਗਏ ਸਨ। ਸੈਲਾਨੀ ਆਪਣੇ ਮੇਜ਼ਬਾਨਾਂ ਦੀ ਪ੍ਰਸੰਸਾ ਨਾਲ ਭਰੇ ਹੋਏ ਇਹ ਕਹਿੰਦੇ ਦੇਖੇ ਗਏਉਨ੍ਹਾਂ ਇਸ ਮੁਸ਼ਕਲ ਸਮੇਂ ’ਚ ਸਾਡੀ ਮਦਦ ਕੀਤੀ। ਉਹ ਸਾਡੇ ਲਈ ਦੇਵਤਿਆਂ ਵਾਂਗ ਹਨ। ਸਨਿੱਚਰਵਾਰ ਵੀ ਕਸ਼ਮੀਰ ਭਰ ਵਿਚ ਭਾਰੀ ਬਰਫਬਾਰੀ ਜਾਰੀ ਰਹੀ। ਇਸ ਕਾਰਨ ਸੈਂਕੜੇ ਸੈਲਾਨੀ ਸ੍ਰੀਨਗਰ-ਜੰਮੂ ਹਾਈਵੇ ਅਤੇ ਦੁੱਧਪਥਰੀ ਵਰਗੇ ਸੈਰ-ਸਪਾਟਾ ਕੇਂਦਰਾਂ ’ਤੇ ਫਸੇ ਹੋਏ ਦੱਸੇ ਜਾਂਦੇ ਹਨ। ਪੁਲਸ ਅਤੇ ਸਿਵਲ ਪ੍ਰਸ਼ਾਸਨ ਨੇ ਉਨ੍ਹਾਂ ਤੱਕ ਪਹੁੰਚਣਾ ਸ਼ੁਰੂ ਕਰ ਦਿੱਤਾ ਹੈ, ਉਨ੍ਹਾਂ ਨੂੰ ਗਰਮ ਪੀਣ ਵਾਲੇ ਪਦਾਰਥ ਅਤੇ ਹੋਰ ਜ਼ਰੂਰੀ ਚੀਜ਼ਾਂ ਪ੍ਰਦਾਨ ਕੀਤੀਆਂ ਜਾ ਰਹੀਆਂ ਹਨ। ਇਸ ਤੋਂ ਇਲਾਵਾ ਸੜਕਾਂ ਤੋਂ ਬਰਫ ਨੂੰ ਸਾਫ ਕਰਨ ਦਾ ਕੰਮ ਵੀ ਜੰਗੀ ਪੱਧਰ ’ਤੇ ਜਾਰੀ ਹੈ।
