ਜਲੰਧਰ (ਕੇਸਰ)-ਦੇਸ਼ ਭਗਤ ਯਾਦਗਾਰ ਕਮੇਟੀ ਦੀ ਜਨਰਲ ਬਾਡੀ ਮੀਟਿੰਗ ’ਚ ਸਨਿੱਚਰਵਾਰ 33ਵਾਂ ਮੇਲਾ ਗ਼ਦਰੀ ਬਾਬਿਆਂ ਦਾ-2024 ਸੰਬੰਧੀ ਮੇਲਾ ਪ੍ਰਬੰਧਕੀ ਕਮੇਟੀਆਂ, ਸੱਭਿਆਚਾਰਕ ਵਿੰਗ ਦੀ ਮੀਟਿੰਗ, ਮੇਲਾ ਦੀਆਂ ਸਹਿਯੋਗੀ ਸੰਸਥਾਵਾਂ ਅਤੇ ਸਮੂਹ ਕਮੇਟੀ ਮੈਂਬਰਾਂ ਵੱਲੋਂ ਮੇਲਾ ਪ੍ਰੇਮੀਆਂ ਦੀਆਂ ਰਾਵਾਂ, ਸੁਝਾਅ ਇਕੱਠੇ ਕਰਨ ਉਪਰੰਤ ਸਾਹਮਣੇ ਆਏ ਸਭਨਾਂ ਪੱਖਾਂ ਉਪਰ ਗੰਭੀਰ ਚਰਚਾ ਕੀਤੀ, ਤਾਂ ਜੋ 34ਵਾਂ ਮੇਲਾ-2025 ਨੂੰ ਹੋਰ ਵੀ ਬੁਲੰਦੀਆਂ ਉਪਰ ਪਹੁੰਚਾਉਣ ਲਈ ਇਸ ਪੜਚੋਲਵੀਂ ਨਜ਼ਰ ਉਪਰੰਤ ਠੋਸ ਕਦਮ ਚੁੱਕੇ ਜਾਣ।
ਮੀਟਿੰਗ ਨੇ ਕੁਇਜ਼, ਭਾਸ਼ਣ, ਗਾਇਨ ਅਤੇ ਚਿੱਤਰਕਲਾ ਮੁਕਾਬਲੇ, ਕਵੀ ਦਰਬਾਰ, ਵਿਚਾਰ-ਚਰਚਾ, ਚਿੱਤਰ ਤੇ ਫੋਟੋ ਕਲਾ ਪ੍ਰਦਰਸ਼ਨੀ ਅਤੇ ਪੁਸਤਕ ਪ੍ਰਦਰਸ਼ਨੀ ਦੇ ਅਨੇਕਾਂ ਪੱਖਾਂ ਉਪਰ ਉਸਾਰੂ ਆਲੋਚਨਾਤਮਕ ਦਿ੍ਰਸ਼ਟੀ ਤੋਂ ਝਾਤ ਮਾਰਦੇ ਹੋਏ ਇਹਨਾਂ ਮੁਕਾਬਲਿਆਂ ਬਾਰੇ ਗਹਿਰਾਈ ’ਚ ਵਿਚਾਰਿਆ, ਤਾਂ ਜੋ ਅਗਲੇ ਮੇਲੇ ਦੀ ਰੂਪ-ਰੇਖਾ ਉਲੀਕਣ ਸਮੇਂ ਇਹਨਾਂ ਪੱਖਾਂ ਨੂੰ ਧਿਆਨ ’ਚ ਰੱਖਿਆ ਜਾਏ।ਨਾਟਕ, ਗੀਤ-ਸੰਗੀਤ, ਕਾਰਪੋਰੇਟ ਅਤੇ ਫਾਸ਼ੀ ਹੱਲੇ ਵਿਰੁੱਧ ਜੂਝਦੀਆਂ ਲਹਿਰਾਂ ਨੂੰ ਮੇਲਾ ਸਮਰਪਤ ਕਰਨ, ਇਤਿਹਾਸਕ ਘਟਨਾਵਾਂ ਅਤੇ ਨਾਇਕਾਂ ਨੂੰ ਮੇਲੇ ’ਚ ਸਨਮਾਨਤ ਥਾਂ ਦੇਣ ਅਤੇ ਉਹਨਾਂ ਦੀ ਇਤਿਹਾਸਕ ਪ੍ਰਸੰਗਕਤਾ ਉਭਾਰਨ ਪੱਖੋਂ ਮੇਲਾ ਸਫ਼ਲ ਰਿਹਾ। ਮੁਲਕ ਦੇ ਨਾਮਵਰ ਵਿਦਵਾਨਾਂ, ਦੇਸ਼-ਵਿਦੇਸ਼ ਤੋਂ ਆਏ ਲੋਕਾਂ ਖਾਸ ਕਰਕੇ ਚੜ੍ਹਦੀ ਜੁਆਨੀ ਦੀ ਹਾਜ਼ਰੀ ਪੱਖੋਂ ਮੇਲਾ ਸਿਖਰਲੇ ਦਿਨ ਜਿੱਥੇ ਸਫ਼ਲ ਰਿਹਾ, ਓਥੇ ਮੁਕਾਬਲਿਆਂ ਵਿੱਚ ਰੜਕਵੀਂ ਘਾਟ ਬਹੁਤ ਕੁਝ ਵਿਚਾਰਨ ਦੀ ਮੰਗ ਕਰਦੀ ਹੈ। ਇਹ ਨੋਟ ਕਰਦੇ ਹੋਏ ਕਮੇਟੀ ਨੇ ਭਵਿੱਖ਼ ਵਿੱਚ ਇਸ ਕਾਰਜ ਨੂੰ ਸੰਬੋਧਤ ਹੋਣ ਬਾਰੇ ਵੀ ਕਦਮ ਚੁੱਕਣ ਲਈ ਵਿਚਾਰਿਆ।ਦੇਸ਼ ਭਗਤ ਯਾਦਗਾਰ ਹਾਲ ਦੇ ਜੀ ਟੀ ਰੋਡ ਤਰਫ਼ ਦੇ ਮੁੱਖੜੇ ਨੂੰ ਹੋਰ ਵੀ ਇਤਿਹਾਸਕ ਪੱਖੋਂ ਖਿੱਚ ਭਰਪੂਰ ਬਣਾਉਣ ਅਤੇ ਸ਼ਾਮ-ਸਵੇਰੇ ਅਤੇ ਢੁਕਵੇਂ ਮੌਕਿਆਂ ’ਤੇ ਗ਼ਦਰੀ ਗੂੰਜਾਂ ਸਮੇਤ ਲੋਕ-ਪੱਖੀ ਗੀਤ-ਸੰਗੀਤ, ਪੁਸਤਕਾਂ, ਲਾਇਬ੍ਰੇਰੀ ਅਤੇ ਮਿਊਜ਼ੀਅਮ ਵਿੱਚ ਲੋਕਾਂ ਦੇ ਆਉਣ ਲਈ ਪ੍ਰਭਾਵਸ਼ਾਲੀ ਮਾਹੌਲ ਸਿਰਜਣ ਦਾ ਫੈਸਲਾ ਕੀਤਾ ਗਿਆ।
ਮੀਟਿੰਗ ਦਾ ਆਗਾਜ਼ ਬੀਤੇ ਦਿਨੀਂ ਵਿਛੜੇ ਸ਼ਿਆਮ ਬੈਨੇਗਲ, ਤਪਨ ਘੋਸ਼, ਗੁਰਬਖ਼ਸ਼ ਕੌਰ ਸੰਘਾ, ਬਸੰਤ ਕੋਠਾ ਗੁਰੂ, ਕਰਮ ਕੋਠਾ ਗੁਰੂ ਅਤੇ ਕੋਠਾ ਗੁਰੂ ਦੀਆਂ ਹੀ ਤਿੰਨ ਔਰਤਾਂ ਸਰਬਜੀਤ ਕੌਰ, ਬਲਬੀਰ ਕੌਰ, ਜਸਵੀਰ ਕੌਰ, ਡਾ. ਮਨਮੋਹਨ ਸਿੰਘ, ਹਰਪਾਲ ਬਰਾੜ, ਤਰਲੋਚਨ ਸਿੰਘ ਝੋਰੜਾਂ, ਬਲਵੰਤ ਸਿੰਘ ਬਾਘਾ ਪੁਰਾਣਾ, ਬਲਵੰਤ ਸਿੰਘ ਦੇ ਸਪੁੱਤਰ ਅਤੇ ਜੁਆਈ, ਬਲਜਿੰਦਰ ਸਿੰਘ ਲੁਧਿਆਣਾ, ਚੈਂਚਲ ਰਾਮ ਗੁਣਾਚੌਰ, ਬਲਬੀਰ ਕੌਰ ਹੱਪੋਵਾਲ, ਜਸਪਾਲ ਬਰਮੀ ਨੂੰ ਖੜ੍ਹੇ ਹੋ ਕੇ ਸ਼ਰਧਾਂਜਲੀ ਦੇਣ ਨਾਲ ਹੋਇਆ।
ਦੇਸ਼ ਭਗਤ ਯਾਦਗਾਰ ਕਮੇਟੀ ਦੇ ਪ੍ਰਧਾਨ ਅਜਮੇਰ ਸਿੰਘ, ਜਨਰਲ ਸਕੱਤਰ ਪਿ੍ਰਥੀਪਾਲ ਸਿੰਘ ਮਾੜੀਮੇਘਾ ਅਤੇ ਸੱਭਿਆਚਾਰਕ ਵਿੰਗ ਦੇ ਕਨਵੀਨਰ ਅਮੋਲਕ ਸਿੰਘ ਨੇ ਮੀਟਿੰਗ ਦੇ ਫੈਸਲਿਆਂ ਅਤੇ ਵਿਚਾਰ-ਚਰਚਾ ਬਾਰੇ ਪ੍ਰੈੱਸ ਨਾਲ ਜਾਣਕਾਰੀ ਸਾਂਝੀ ਕਰਦਿਆਂ ਦੱਸਿਆ ਕਿ ਮੀਟਿੰਗ ’ਚ ਮੀਤ ਪ੍ਰਧਾਨ ਕੁਲਵੰਤ ਸਿੰਘ ਸੰਧੂ, ਸਹਾਇਕ ਸਕੱਤਰ ਚਰੰਜੀ ਲਾਲ ਕੰਗਣੀਵਾਲ, ਵਿੱਤ ਸਕੱਤਰ ਸੀਤਲ ਸਿੰਘ ਸੰਘਾ ਤੋਂ ਇਲਾਵਾ ਜਨਰਲ ਬਾਡੀ ਦੇ ਮੈਂਬਰ ਸ਼ਾਮਲ ਸਨ।
ਦੇਸ਼ ਭਗਤ ਯਾਦਗਾਰ ਹਾਲ ਕੰਪਲੈਕਸ ’ਚ ਵੱਜਿਆ ਕਰੇਗਾ ਰਸਭਿੰਨਾ ਸੰਗੀਤ
