ਗੌਰਵ ਯਾਦਵ ਕੇਂਦਰੀ ਬਲ ਦੇ ਡੀ ਜੀ ਵਾਲੇ ਪੈਨਲ ’ਚ

ਚੰਡੀਗੜ੍ਹ : ਪੰਜਾਬ ਦੇ ਡੀ ਜੀ ਪੀ ਗੌਰਵ ਯਾਦਵ ਨੂੰ ਕੇਂਦਰੀ ਸੁਰੱਖਿਆ ਬਲ/ਏਜੰਸੀ ਦੇ ਡਾਇਰੈਕਟਰ ਜਨਰਲ ਦੀ ਪੋਸਟ ਲਈ ਪੈਨਲ ਵਿੱਚ ਸ਼ਾਮਲ ਕੀਤਾ ਗਿਆ ਹੈ।
ਕੇਂਦਰੀ ਕੈਬਨਿਟ ਦੀ ਨਿਯੁਕਤੀਆਂ ਬਾਰੇ ਕਮੇਟੀ ਨੇ ਸੋਮਵਾਰ ਕੇਂਦਰ ’ਚ ਸਿਖਰਲੇ ਅਹੁਦਿਆਂ ’ਤੇ ਰਹਿਣ ਲਈ ਪੰਜ ਆਈ ਪੀ ਐੱਸ ਅਧਿਕਾਰੀਆਂ ਦੀ ਸੂਚੀ ਨੂੰ ਮਨਜ਼ੂਰੀ ਦਿੱਤੀ ਹੈ। ਭਾਰਤ ਸਰਕਾਰ ਵਿੱਚ ਡਾਇਰੈਕਟਰ ਜਨਰਲ (ਡੀ ਜੀ) ਅਤੇ ਡੀ ਜੀ ਦੇ ਬਰਾਬਰ ਦੀਆਂ ਅਸਾਮੀਆਂ ਲਈ ਪੈਨਲ ਕੀਤੇ ਗਏ ਅਧਿਕਾਰੀਆਂ ਦੀ ਸੂਚੀ ਵਿਚ ਨੁਜ਼ਤ ਹਸਨ (ਆਈ ਪੀ ਐੱਸ : 1991: ਏ ਜੀ ਐੱਮ ਯੂ ਟੀ), ਗੌਰਵ ਯਾਦਵ (ਆਈ ਪੀ ਐੱਸ : 1992 : ਪੰਜਾਬ), ਡੀ ਜੀ ਬਰਾਬਰ : ਚੌਧਰੀ ਡੀ ਤਿਰੁਮਾਲਾ ਰਾਓ (ਆਈ ਪੀ ਐੱਸ : 1989 : ਆਂਧਰਾ ਪ੍ਰਦੇਸ਼), ਆਦਿਤਿਆ ਮਿਸ਼ਰ (ਆਈ ਪੀ ਐੱਸ : 1989 : ਯੂ ਪੀ) ਅਤੇ ਇਦਸ਼ਿਸ਼ਾ ਨੌਂਗਰਾਂਗ (ਆਈ ਪੀ ਐੱਸ : 1992 : ਮਨੀਪੁਰ) ਸ਼ਾਮਲ ਹਨ। ਇਸ ਤੋਂ ਪਹਿਲਾਂ ਯਾਦਵ ਪੰਜਾਬ ਵਿਚ ਕਈ ਆਈ ਪੀ ਐੱਸ ਅਧਿਕਾਰੀਆਂ ਨੂੰ ਪਿੱਛੇ ਛੱਡ ਕੇ ਪੰਜਾਬ ਦੇ ਡੀ ਜੀ ਪੀ ਬਣੇ ਸਨ। ਇਸ ਨਵੀਂ ਪੇਸ਼ਕਦਮੀ ਨਾਲ ਯਾਦਵ ਨੇ ਸੂਬਾ ਤੇ ਕੇਂਦਰ ਸਰਕਾਰ ਵਿੱਚ ਸਿਖਰਲੇ ਅਹੁਦਿਆਂ ਲਈ ਕਈ ਅਧਿਕਾਰੀਆਂ ਨੂੰ ਪਿੱਛੇ ਛੱਡ ਦਿੱਤਾ ਹੈ। ਇਸ ਨਾਲ ਪੰਜਾਬ ਪੁਲਸ ਦੇ ਮੁਖੀ ਵਜੋਂ ਉਨ੍ਹਾ ਦੀ ਸਥਿਤੀ ਮਜ਼ਬੂਤ ਹੋਈ ਹੈ। ਯਾਦਵ ਦੀ ਡੀ ਜੀ ਪੀ ਪੰਜਾਬ ਵਜੋਂ ਨਿਯੁਕਤੀ ਕੇਂਦਰੀ ਲੋਕ ਸੇਵਾ ਕਮਿਸ਼ਨ (ਯੂ ਪੀ ਐੱਸ ਸੀ) ਵੱਲੋਂ ਪੈਨਲ ਸੂਚੀਬੱਧ ਕਰਨ ਦੇ ਅਮਲ ਵਿੱਚੋਂ ਲੰਘੇ ਬਿਨਾਂ ਕੀਤੀ ਗਈ ਸੀ।