ਰਾਹੁਲ ਦਾ ਦਾਅਵਾ ਨਿਰਾ ਝੂਠ : ਰਾਜਨਾਥ

ਨਵੀਂ ਦਿੱਲੀ : ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਕਾਂਗਰਸ ਆਗੂ ਰਾਹੁਲ ਗਾਂਧੀ ਦੇ ਇਸ ਦਾਅਵੇ ਕਿ ‘ਚੀਨ ਸਾਡੀ ਸਰਜ਼ਮੀਨ ਉੱਤੇ ਬੈਠਾ ਹੈ’ ਨੂੰ ਸਿਰੇ ਤੋਂ ਖਾਰਜ ਕਰਦਿਆਂ ਮੰਗਲਵਾਰ ਕਿਹਾ ਕਿ ਕਾਂਗਰਸ ਆਗੂ ਦਾ ਇਹ ਦਾਅਵਾ ਨਿਰਾ ਝੂਠ ਹੈ। ਉਨ੍ਹਾ ਕਿਹਾ ਕਿ ਰਾਹੁਲ ਜਿਹੜੇ ਸ਼ਬਦ ਭਾਰਤੀ ਥਲ ਸੈਨਾ ਦੇ ਮੁਖੀ ਜਨਰਲ ਉਪੇਂਦਰ ਸਿੰਘ ਦੇ ਮੂੰਹ ਵਿੱਚ ਪਾਉਣਾ ਚਾਹੁੰਦੇ ਹਨ, ਉਹ ਗੱਲ ਉਨ੍ਹਾ (ਫੌਜ ਮੁਖੀ) ਨੇ ਕਦੇ ਵੀ ਨਹੀਂ ਕਹੀ। ਰਾਹੁਲ ਗਾਂਧੀ ਦਾ ਦੇਸ਼ ਹਿੱਤ ਨਾਲ ਜੁੜੇ ਮਾਮਲਿਆਂ ਵਿਚ ਗੈਰ-ਜ਼ਿੰਮੇਵਾਰਾਨਾ ਸਿਆਸਤ ਕਰਨਾ ਅਫਸੋਸਨਾਕ ਹੈ। ਰਾਹੁਲ ਨੇ ਸੋਮਵਾਰ ਬਜਟ ਅਜਲਾਸ ਦੌਰਾਨ ਰਾਸ਼ਟਰਪਤੀ ਦੇ ਭਾਸ਼ਣ ਦਾ ਧੰਨਵਾਦ ਕਰਨ ਵਾਲੇ ਮਤੇ ’ਤੇ ਬਹਿਸ ਦੌਰਾਨ ਕਿਹਾ ਸੀ ਕਿ ‘ਚੀਨੀ ਫੌਜ ਸਾਡੇ ਖੇਤਰ ਵਿਚ ਦਾਖਲ ਹੋ ਚੁੱਕੀ ਹੈ। ਪ੍ਰਧਾਨ ਮੰਤਰੀ ਨੇ ਹਾਲਾਂਕਿ ਇਸ ਤੋਂ ਇਨਕਾਰ ਕੀਤਾ ਹੈ, ਪਰ ਥਲ ਸੈਨਾ ਮੁਖੀ ਨੇ ਉਨ੍ਹਾ (ਪੀ ਐੱਮ) ਦਾ ਖੰਡਨ ਕੀਤਾ ਹੈ। ਸਾਡੇ ਥਲ ਸੈਨਾ ਮੁਖੀ ਨੇ ਕਿਹਾ ਸੀ ਕਿ ਚੀਨੀ (ਫੌਜ) ਸਾਡੇ ਖੇਤਰ ਵਿਚ ਹਨ।’ ਰਾਜਨਾਥ ਸਿੰਘ ਨੇ ਕਿਹਾਥਲ ਸੈਨਾ ਮੁਖੀ ਵੱਲੋਂ 13 ਜਨਵਰੀ ਨੂੰ ਪ੍ਰੈੱਸ ਕਾਨਫਰੰਸ ਦੌਰਾਨ ਕੀਤੀ ਟਿੱਪਣੀ ਸਿਰਫ ਦੋਵਾਂ ਧਿਰਾਂ ਵੱਲੋਂ ਰਵਾਇਤੀ ਗਸ਼ਤ ਦੀ ਗੜਬੜੀ ਦਾ ਹਵਾਲਾ ਦਿੰਦੀ ਹੈ। ਥਲ ਸੈਨਾ ਮੁਖੀ ਨੇ ਇਸ ਗੱਲ ਦਾ ਵੀ ਜ਼ਿਕਰ ਕੀਤਾ ਕਿ ਹਾਲ ਹੀ ਵਿਚ ਦੋਵਾਂ ਧਿਰਾਂ ਵੱਲੋਂ ਫੌਜਾਂ ਪਿੱਛੇ ਹਟਾਏ ਜਾਣ ਮਗਰੋਂ ਗਸ਼ਤ ਦੇ ਇਨ੍ਹਾਂ ਅਭਿਆਸਾਂ ਨੂੰ ਉਨ੍ਹਾਂ ਦੇ ਰਵਾਇਤੀ ਪੈਟਰਨ ਵਿੱਚ ਬਹਾਲ ਕੀਤਾ ਗਿਆ ਹੈ। ਸਰਕਾਰ ਨੇ ਇਹ ਵੇਰਵੇ ਸੰਸਦ ਵਿੱਚ ਵੀ ਸਾਂਝੇ ਕੀਤੇ ਹਨ।