ਦੋ ਮਾਓਵਾਦੀ ਤੇ ਇੱਕ ਜਵਾਨ ਮਾਰੇ ਗਏ

ਬੋਕਾਰੋ : ਝਾਰਖੰਡ ਦੇ ਬੋਕਾਰੋ ਜ਼ਿਲ੍ਹੇ ਵਿੱਚ ਬੁੱਧਵਾਰ ਸਵੇਰੇ ਹੋਈ ਗੋਲੀਬਾਰੀ ਵਿੱਚ ਦੋ ਮਾਓਵਾਦੀਆਂ ਅਤੇ ਇੱਕ ਸੀ ਆਰ ਪੀ ਐੱਫ ਜਵਾਨ ਦੀ ਮੌਤ ਹੋ ਗਈ। ਅਧਿਕਾਰੀਆਂ ਨੇ ਦੱਸਿਆ ਕਿ ਸਵੇਰੇ 5.30 ਵਜੇ ਦੇ ਕਰੀਬ ਗੋਮੀਆ ਥਾਣਾ ਖੇਤਰ ਦੇ ਬਿਰਹੋਰਡੇਰਾ ਜੰਗਲ ਵਿੱਚ ਸੁਰੱਖਿਆ ਬਲਾਂ ਅਤੇ ਮਾਓਵਾਦੀਆਂ ਵਿਚਕਾਰ ਗੋਲੀਬਾਰੀ ਹੋਈ।
ਪ੍ਰਾਡਾ ਖਿਲਾਫ ਪਟੀਸ਼ਨ ਰੱਦ
ਮੰੁਬਈ : ਬੰਬੇ ਹਾਈ ਕੋਰਟ ਨੇ ਬੁੱਧਵਾਰ ਇਤਾਲਵੀ ਫੈਸ਼ਨ ਹਾਊਸ ਪ੍ਰਾਡਾ ਦੇ ਖਿਲਾਫ ਇੱਕ ਜਨਹਿੱਤ ਪਟੀਸ਼ਨ ਖਾਰਜ ਕਰ ਦਿੱਤੀ, ਜਿਸ ਵਿੱਚ ਉਸ ’ਤੇ ਮਸ਼ਹੂਰ ਕੋਲਹਾਪੁਰੀ ਚੱਪਲਾਂ ਦੀ ਕਥਿਤ ਤੌਰ ’ਤੇ ਅਣਅਧਿਕਾਰਤ ਵਰਤੋਂ ਦਾ ਦੋਸ਼ ਲਗਾਇਆ ਗਿਆ ਸੀ। ਚੀਫ ਜਸਟਿਸ ਆਲੋਕ ਅਰਾਧੇ ਅਤੇ ਜਸਟਿਸ ਸੰਦੀਪ ਮਾਰਨੇ ਦੀ ਬੈਂਚ ਨੇ ਪੰਜ ਵਕੀਲਾਂ ਵੱਲੋਂ ਦਾਇਰ ਕੀਤੀ ਗਈ ਪਟੀਸ਼ਨ ਵਿੱਚ ਉਨ੍ਹਾਂ ਦੇ ਕਾਨੂੰਨੀ ਅਧਿਕਾਰ ’ਤੇ ਸਵਾਲ ਚੁੱਕਦਿਆਂ ਕਿਹਾ ਕਿ ਉਹ ਨਾ ਤਾਂ ਪੀੜਤ ਵਿਅਕਤੀ ਹਨ ਤੇ ਨਾ ਹੀ ਫੁਟਵੀਅਰ ਦੇ ਰਜਿਸਟਰਡ ਮਾਲਕ। ਪਟੀਸ਼ਨ ਵਿੱਚ ਕਿਹਾ ਗਿਆ ਸੀ ਕਿ ਕੋਲਹਾਪੁਰੀ ਚੱਪਲ (ਸੈਂਡਲ) ਨੂੰ ਭੂਗੋਲਿਕ ਸੰਕੇਤਾਂ ਦੇ ਰਜਿਸਟ੍ਰੇਸ਼ਨ ਅਤੇ ਸੁਰੱਖਿਆ ਐਕਟ ਦੇ ਤਹਿਤ ਇੱਕ ਭੂਗੋਲਿਕ ਸੰਕੇਤ (ਜੀ ਆਈ) ਵਜੋਂ ਸੁਰੱਖਿਅਤ ਕੀਤਾ ਗਿਆ ਹੈ। ਬੈਂਚ ਨੇ ਫਿਰ ਕਿਹਾ ਕਿ ਜੀ ਆਈ ਟੈਗ ਦਾ ਰਜਿਸਟਰਡ ਮਾਲਕ ਅਦਾਲਤ ਵਿੱਚ ਆ ਕੇ ਆਪਣੀ ਕਾਰਵਾਈ ਕਰ ਸਕਦਾ ਹੈ। ਅਦਾਲਤ ਨੇ ਪਟੀਸ਼ਨ ਖਾਰਜ ਕਰ ਦਿੱਤੀ ਅਤੇ ਕਿਹਾ ਕਿ ਉਹ ਬਾਅਦ ਵਿੱਚ ਵਿਸਤਿ੍ਰਤ ਹੁਕਮ ਪਾਸ ਕਰੇਗੀ। ਪ੍ਰਾਡਾ ਨੇ ਆਪਣੇ ਬਸੰਤ/ ਗਰਮੀ ਸੰਗ੍ਰਹਿ ਵਿੱਚ ਆਪਣੇ ‘ਟੋ-ਰਿੰਗ ਸੈਂਡਲ’ ਪ੍ਰਦਰਸ਼ਤ ਕੀਤੇ ਸਨ, ਜੋ ਪਟੀਸ਼ਨ ਅਨੁਸਾਰ ਕੋਲਹਾਪੁਰੀ ਚੱਪਲਾਂ ਦੇ ਸਮਾਨ ਹਨ। ਇਨ੍ਹਾਂ ਸੈਂਡਲਾਂ ਦੀ ਕੀਮਤ ਪ੍ਰਤੀ ਜੋੜਾ 1 ਲੱਖ ਰੁਪਏ ਹੈ।