ਬੱਚਿਆਂ ਨੂੰ ਜਗਾਉਣ ਲਈ ਕਿਰਾਏ ‘ਤੇ ਲਿਆਂਦਾ ਬੈਂਡ

ਚੰਡੀਗੜ੍ਹ : ਭਾਰਤੀ ਮਾਵਾਂ ਆਪਣੇ ਬੱਚਿਆਂ ਨੂੰ ਸਵੇਰੇ ਜਲਦੀ ਉਠਾਉਣ ਲਈ ਆਪਣੀ ਅਨੋਖੀ ਸਿਰਜਣਾਤਮਿਕਤਾ ਲਈ ਜਾਣੀਆਂ ਜਾਂਦੀਆਂ ਹਨ, ਪਰ ਹਾਲ ਹੀ ਵਿੱਚ ਇੱਕ ਅÏਰਤ ਨੇ ਆਪਣੀਆਂ ਸੁੱਤੀਆਂ ਧੀਆਂ ਨੂੰ ਜਗਾਉਣ ਲਈ ਜੋ ਤਰੀਕਾ ਅਪਣਾਇਆ, ਉਸ ਨੇ ਪੂਰੇ ਇੰਟਰਨੈੱਟ ਹਲਕਿਆਂ ਨੂੰ ਹੈਰਾਨ ਕਰ ਦਿੱਤਾ ਹੈ | ਇੱਕ ਵਾਇਰਲ ਹੋ ਰਹੀ ਵੀਡੀਓ ਵਿੱਚ ਇੱਕ ਮਾਂ ਨੇ ਆਪਣੀਆਂ ਸੁੱਤੀਆਂ ਧੀਆਂ ਨੂੰ ਉਠਾਉਣ ਲਈ ਘਰ ਵਿੱਚ ਢੋਲ ਅਤੇ ਤੁਰ੍ਹੀ ਵਜਾਉਣ ਵਾਲੇ ਸਥਾਨਕ ਸੰਗੀਤਕਾਰਾਂ ਨੂੰ ਕਿਰਾਏ ‘ਤੇ ਲਿਆ | ਵਾਇਰਲ ਪੋਸਟ ਅਨੁਸਾਰ ਮਾਂ ਨੇ ਦੋ ਸੰਗੀਤਕਾਰਾਂ ਨੂੰ ਆਪਣੀਆਂ ਧੀਆਂ ਦੇ ਬੈੱਡਰੂਮ ਵਿੱਚ ਆ ਕੇ ਤੇਜ਼ ਆਵਾਜ਼ ਵਿੱਚ ਸਾਜ਼ ਵਜਾਉਣ ਲਈ ਕਿਹਾ | ਵੀਡੀਓ ਵਿੱਚ ਦੋਵੇਂ ਸੰਗੀਤਕਾਰ ਬੱਚੀਆਂ ਦੇ ਬੈੱਡ ਕੋਲ ਖੜ੍ਹੇ ਹੋ ਕੇ ਭਗਤੀ ਗੀਤ ‘ਸ੍ਰੀ ਰਾਮ ਜਾਨਕੀ ਬੈਠੇ ਹੈਂ’ ਦੀ ਊਰਜਾਵਾਨ ਪੇਸ਼ਕਾਰੀ ਸ਼ੁਰੂ ਕਰਦੇ ਨਜ਼ਰ ਆ ਰਹੇ ਹਨ | ਅਚਾਨਕ ਆਏ ਇਸ ਜ਼ੋਰਦਾਰ ਸ਼ੋਰ ਤੋਂ ਘਬਰਾਈਆਂ ਹੋਈਆਂ ਦੋਵੇਂ ਅੱਧ-ਸੁੱਤੀਆਂ ਧੀਆਂ ਅਚਾਨਕ ਉਠਦੀਆਂ ਹਨ ਅਤੇ ਵੀਡੀਓ ਬਣਦੀ ਦੇਖ ਫਿਰ ਤੁਰੰਤ ਆਪਣੇ ਚਿਹਰੇ ਢੱਕ ਲੈਂਦੀਆਂ ਹਨ | ਇਸ ਵੀਡੀਓ ਨੂੰ ਇੰਸਟਾਗ੍ਰਾਮ ‘ਤੇ ਸਾਂਝਾ ਕੀਤਾ ਗਿਆ, ਜਿੱਥੇ ਇਸ ਨੂੰ ਯੂਜ਼ਰਜ਼ ਵੱਲੋਂ ਬਹੁਤ ਪਸੰਦ ਕੀਤਾ ਜਾ ਰਿਹਾ ਹੈ | ਲੋਕ ਮਾਂ ਦੀ ਇਸ ਮਜ਼ਾਕੀਆ ਚਾਲ ਦੀ ਤਾਰੀਫ਼ ਕਰ ਰਹੇ ਹਨ ਅਤੇ ਇਸ ਨੂੰ ‘ਮਦਰ ਆਫ਼ ਦ ਈਅਰ’ ਦੱਸ ਰਹੇ ਹਨ | ਕਈ ਯੂਜ਼ਰਜ਼ ਨੇ ਮਜ਼ਾਕ ਵਿੱਚ ਲਿਖਿਆ ਕਿ ਉਹ ਉਮੀਦ ਕਰਦੇ ਹਨ ਕਿ ਇਹ ਵੀਡੀਓ ਉਨ੍ਹਾਂ ਦੇ ਮਾਪਿਆਂ ਨੂੰ ਨਾ ਦਿਖ ਜਾਵੇ |