ਪਿਓ-ਧੀ ਨੇ ਟਾਇਲਟ ਕਲੀਨਰ ਵਰਤ ਕੇ ਘੜੀ ਤੇਜ਼ਾਬ ਹਮਲੇ ਦੀ ਕਹਾਣੀ

ਨਵੀਂ ਦਿੱਲੀ : ਉੱਤਰ-ਪੱਛਮੀ ਦਿੱਲੀ ਦੇ ਲਕਸ਼ਮੀ ਬਾਈ ਕਾਲਜ ਨੇੜੇ ਹੋਏ ਕਥਿਤ ਤੇਜ਼ਾਬ ਹਮਲੇ ਦੇ ਮਾਮਲੇ ਵਿੱਚ ਇੱਕ ਹੈਰਾਨੀਜਨਕ ਮੋੜ ਆਇਆ ਹੈ। ਦਿੱਲੀ ਪੁਲਸ ਨੇ ਖੁਲਾਸਾ ਕੀਤਾ ਹੈ ਕਿ ਇਹ ਸਾਰੀ ਘਟਨਾ ਪੀੜਤਾ ਅਤੇ ਉਸ ਦੇ ਪਿਤਾ ਵੱਲੋਂ ਟਾਇਲਟ ਕਲੀਨਰ ਦੀ ਵਰਤੋਂ ਕਰਕੇ ਮਨਘੜਤ ਬਣਾਈ ਗਈ ਸੀ। ਅਧਿਕਾਰੀਆਂ ਅਨੁਸਾਰ 20 ਸਾਲਾ ਲੜਕੀ ਦੇ ਪਿਤਾ, ਜਿਸ ਦੀ ਪਛਾਣ ਅਕੀਲ ਖਾਨ ਵਜੋਂ ਹੋਈ ਹੈ, ਨੇ ਝੂਠੀ ਤੇਜ਼ਾਬ ਹਮਲੇ ਦੀ ਕਹਾਣੀ ਘੜਨ ਦੀ ਗੱਲ ਕਬੂਲ ਕੀਤੀ ਹੈ। ਪੁਲਸ ਨੇ ਖਾਨ ਨੂੰ ਸੰਗਮ ਵਿਹਾਰ ਤੋਂ ਗਿ੍ਰਫਤਾਰ ਕੀਤਾ, ਜਿੱਥੇ ਉਹ ਲੁਕਿਆ ਹੋਇਆ ਸੀ। ਖਾਨ ਨੇ ਝੂਠੀ ਕਹਾਣੀ ਘੜ ਕੇ ਜਿਨ੍ਹਾਂ ਆਦਮੀਆਂ ਨੂੰ ਫਸਾਉਣ ਦੀ ਕੋਸ਼ਿਸ਼ ਕੀਤੀ ਸੀ, ਉਨ੍ਹਾਂ ਵਿੱਚੋਂ ਇੱਕ ਦੀ ਪਤਨੀ ਨੇ ਉਸ ਦੇ ਖ਼ਿਲਾਫ਼ ਜਬਰ-ਜ਼ਨਾਹ ਦੀ ਸ਼ਿਕਾਇਤ ਦਰਜ ਕਰਵਾਈ ਸੀ। ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਖਾਨ ਅਤੇ ਉਸ ਦੀ ਧੀ ਨੇ ਇਸ ਝੂਠੀ ਘਟਨਾ ਦੀ ਸਾਜ਼ਿਸ਼ ਤਿੰਨ ਵਿਅਕਤੀਆਂ ਨੂੰ ਫਸਾਉਣ ਲਈ ਰਚੀ ਸੀ, ਜਿਨ੍ਹਾਂ ਵਿੱਚੋਂ ਇੱਕ ਉਸ ਔਰਤ ਦਾ ਪਤੀ ਹੈ ਜਿਸ ਨੇ ਪਹਿਲਾਂ ਖਾਨ ’ਤੇ ਜਿਨਸੀ ਤੌਰ ’ਤੇ ਪਰੇਸ਼ਾਨ ਕਰਨ ਦਾ ਦੋਸ਼ ਲਾਇਆ ਸੀ। ਪੁੱਛਗਿੱਛ ਦੌਰਾਨ ਖਾਨ ਨੇ ਮੰਨਿਆ ਕਿ ਉਸ ਦੀ ਧੀ ਨੇ ਟਾਇਲਟ ਕਲੀਨਰ ਆਪਣੇ ਹੱਥਾਂ ’ਤੇ ਇਸ ਲਈ ਪਾ ਲਿਆ ਸੀ ਤਾਂ ਜੋ ਜਲਣ ਦੇ ਨਿਸ਼ਾਨ ਪੈਦਾ ਹੋ ਜਾਣ ਅਤੇ ਹਮਲਾ ਅਸਲੀ ਲੱਗੇ। ਇੱਕ ਸੀਨੀਅਰ ਪੁਲਸ ਅਧਿਕਾਰੀ ਨੇ ਕਿਹਾ, ‘ਦੋਸ਼ੀ ਨੇ ਕਬੂਲ ਕੀਤਾ ਕਿ ਇਹ ਸਾਰੀ ਕਹਾਣੀ ਬਦਲੇ ਦੀ ਯੋਜਨਾ ਦੇ ਹਿੱਸੇ ਵਜੋਂ ਮਨਘੜਤ ਸੀ। ਦਿੱਲੀ ਪੁਲਸ ਨੇ ਹੁਣ ਝੂਠੇ ਤੇਜ਼ਾਬ ਹਮਲੇ ਦੀ ਕਹਾਣੀ ਘੜਨ ਲਈ ਲੜਕੀ ਅਤੇ ਉਸ ਦੇ ਪਿਤਾ ਖ਼ਿਲਾਫ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਜ਼ਿਕਰਯੋਗ ਹੈ ਕਿ ਦੂਜੇ ਸਾਲ ਦੀ ਓਪਨ ਸਕੂਲ ਦੀ ਵਿਦਿਆਰਥਣ ਪੀੜਤਾ ਨੇ ਦੋਸ਼ ਲਾਇਆ ਸੀ ਕਿ ਉਸ ਦੇ ਜਾਣਕਾਰ ਜਤਿੰਦਰ ਅਤੇ ਉਸ ਦੇ ਦੋਸਤਾਂ ਈਸ਼ਾਨ ਅਤੇ ਅਰਮਾਨ ਨੇ ਉਸ ’ਤੇ ਹਮਲਾ ਕੀਤਾ ਜਦੋਂ ਉਹ ਕਾਲਜ ਵੱਲ ਜਾ ਰਹੀ ਸੀ। ਉਸ ਨੇ ਦਾਅਵਾ ਕੀਤਾ ਕਿ ਈਸ਼ਾਨ ਵੱਲੋਂ ਬੋਤਲ ਦਿੱਤੇ ਜਾਣ ਤੋਂ ਬਾਅਦ ਅਰਮਾਨ ਨੇ ਉਸ ’ਤੇ ਤੇਜ਼ਾਬ ਸੁੱਟਿਆ। ਉਸ ਦੇ ਬਿਆਨ ਦੇ ਆਧਾਰ ’ਤੇ ਭਾਰਤ ਨਗਰ ਪੁਲਸ ਸਟੇਸ਼ਨ ਵਿੱਚ ਇੱਕ ਕੇਸ ਦਰਜ ਕੀਤਾ ਗਿਆ ਸੀ। ਹਾਲਾਂਕਿ ਜਾਂਚ ਵਿੱਚ ਕਈ ਗੜਬੜੀਆਂ ਸਾਹਮਣੇ ਆਈਆਂ। ਸੀ ਸੀ ਟੀ ਵੀ ਫੁਟੇਜ, ਸੀ ਡੀ ਆਰ ਵਿਸ਼ਲੇਸ਼ਣ ਅਤੇ ਗਵਾਹਾਂ ਦੇ ਬਿਆਨਾਂ ਨੇ ਇਹ ਸਥਾਪਤ ਕੀਤਾ ਕਿ ਸ਼ਿਕਾਇਤ ਵਿੱਚ ਦੱਸਿਆ ਗਿਆ ਦੋਸ਼ੀ, ਜਤਿੰਦਰ, ਕਥਿਤ ਘਟਨਾ ਦੇ ਸਮੇਂ ਕਰੋਲ ਬਾਗ ਵਿੱਚ ਸੀ ਅਤੇ ਉਸ ਦਾ ਮੋਟਰਸਾਈਕਲ ਵੀ ਉੱਥੇ ਹੀ ਮਿਲਿਆ ਸੀ। ਇਸ ਦੌਰਾਨ, ਸਹਿ-ਦੋਸ਼ੀ ਅਰਮਾਨ ਅਤੇ ਈਸ਼ਾਨ ਆਪਣੀ ਮਾਂ ਸ਼ਬਨਮ ਦੇ ਨਾਲ ਆਗਰਾ ਵਿੱਚ ਪਾਏ ਗਏ। ਸੀ ਸੀ ਟੀ ਵੀ ਫੁਟੇਜ ਵਿੱਚ ਇਹ ਵੀ ਦਿਖਾਇਆ ਗਿਆ ਕਿ ਪੀੜਤਾ ਨੂੰ ਉਸ ਦੇ ਭਰਾ ਨੇ ਅਸ਼ੋਕ ਵਿਹਾਰ ਨੇੜੇ ਛੱਡਿਆ ਸੀ, ਜਿਸ ਤੋਂ ਬਾਅਦ ਉਸ ਨੇ ਕਾਲਜ ਵੱਲ ਜਾਣ ਲਈ ਈ-ਰਿਕਸ਼ਾ ਲਿਆ, ਜਿਸ ਨਾਲ ਉਸ ਦੇ ਘਟਨਾ ਦੇ ਵਰਣਨ ’ਤੇ ਹੋਰ ਸਵਾਲ ਖੜ੍ਹੇ ਹੋ ਗਏ।