ਚੰਡੀਗੜ੍ਹ : ਰਾਹੁਲ ਗਾਂਧੀ ਵੱਲੋਂ ਹਰਿਆਣਾ ਵਿਚ ਫਰਜ਼ੀ ਵੋਟਿੰਗ ਦੇ ਮੁੱਦੇ ’ਤੇ ਬ੍ਰਾਜ਼ੀਲ ਦੀ ਇਕ ਮਾਡਲ ਦੀ ਤਸਵੀਰ ਦਿਖਾਉਣ ਮਗਰੋਂ ਇਹ ਮਾਮਲਾ ਪੂਰੇ ਦੇਸ਼ ਵਿਚ ਸੁਰਖੀਆਂ ਵਿਚ ਹੈ। ਕਾਂਗਰਸ ਨੇ ਦਾਅਵਾ ਕੀਤਾ ਸੀ ਕਿ ਬ੍ਰਾਜ਼ੀਲ ਦੀ ਇਸ ਮਾਡਲ ਦੀ ਤਸਵੀਰ ਦੀ ਵਰਤੋਂ ਕਰਕੇ ਹਰਿਆਣਾ ਵਿਚ ਕਦੇ ਸੀਮਾ ਤਾਂ ਕਦੇ ਸਵੀਟੀ ਦੇ ਨਾਂਅ ’ਤੇ 22 ਵੋਟ ਪਾਏ ਗਏ। ਹੁਣ ਆਪਣੀ ਇਸ ਤਸਵੀਰ ਨੂੰ ਲੈ ਕੇ ਖੁਦ ਮਾਡਲ ਦੀ ਪ੍ਰਤੀਕਿਰਿਆ ਸਾਹਮਣੇ ਆਈ ਹੈ। ਬ੍ਰਾਜ਼ੀਲ ਦੀ ਇਸ ਮਾਡਲ ਲਾਰਿਸਾ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ’ਤੇ ਇਕ ਵੀਡੀਓ ਜਾਰੀ ਕਰਕੇ ਕਿਹਾ ਕਿ ਉਸ ਦੀ ਤਸਵੀਰ ਦਾ ਗ਼ਲਤ ਇਸਤੇਮਾਲ ਕੀਤਾ ਗਿਆ ਹੈ ਤੇ ਉਸ ਦਾ ਭਾਰਤ ਦੀ ਸਿਆਸਤ ਨਾਲ ਕੋਈ ਲਾਗਾ ਦੇਗਾ ਨਹੀਂ ਹੈ। ਪੁਰਤਗਾਲੀ ਭਾਸ਼ਾ ਵਿਚ ਜਾਰੀ ਵੀਡੀਓ ਲਾਰਿਸਾ ਨੇ ਕਿਹਾ, ‘‘ਮੈਨੂੰ ਕੁਝ ਭਾਰਤੀ ਪੱਤਰਕਾਰਾਂ ਨੇ ਤੁਹਾਡੇ ਲਈ ਇਕ ਵੀਡੀਓ ਕਰਨ ਵਾਸਤੇ ਕਿਹਾ ਸੀ, ਜਿਸ ਕਰਕੇ ਮੈਂ ਇਹ ਵੀਡੀਓ ਬਣਾ ਰਹੀ ਹਾਂ। ਮੇਰਾ ਭਾਰਤ ਦੀ ਰਾਜਨੀਤੀ ਨਾਲ ਕੋਈ ਲਾਗਾ ਦੇਗਾ ਨਹੀਂ ਹੈ। ਮੈਂ ਬ੍ਰਾਜ਼ੀਲ ਦੀ ਮਾਡਲ ਤੇ ਡਿਜੀਟਲ ਇਨਫਲੂਐਂਸਰ ਹਾਂ। ਮੈਂ ਭਾਰਤ ਦੇ ਲੋਕਾਂ ਨੂੰ ਪਿਆਰ ਕਰਦੀ ਹਾਂ। ਤੁਹਾਡਾ ਬਹੁਤ ਬਹੁਤ ਧੰਨਵਾਦ, ਨਮਸਤੇ।’’ ਮਾਡਲ ਨੇ ਅੱਗੇ ਕਿਹਾ, ‘‘ਵੇਖੋ ਇਹ ਪੂਰਾ ਮਾਮਲਾ ਬਹੁਤ ਗੰਭੀਰ ਹੋ ਚੁੱਕਾ ਹੈ। ਮੈਂ ਸਾਰਿਆਂ ਨੂੰ ਦੱਸ ਦੇਵਾਂ ਕਿ ਮੈਂ ਹੀ ਉਹ ਰਹੱਸਮਈ ਬ੍ਰਾਜ਼ੀਲੀਨ ਮਹਿਲਾ ਹਾਂ, ਪਰ ਮੇਰਾ ਇਸ ਮਾਮਲੇ ਨਾਲ ਕੋਈ ਸੱਬੰਧ ਨਹੀਂ ਹੈ। ਹੁਣ ਮੈਂ ਮਾਡਲਿੰਗ ਨਹੀਂ ਕਰਦੀ। ਮੈਂ ਸਿਰਫ਼ ਬੱਚਿਆਂ ਦੀ ਪਰਵਰਿਸ਼ ਤੇ ਡਿਜੀਟਲ ਕੰਮ ਵਿਚ ਰੁੱਝੀ ਹਾਂ।’’ ਲਾਰਿਸਾ ਨੇ ਦੱਸਿਆ ਕਿ ਉਸ ਦੀ ਤਸਵੀਰ ਇਕ ਸਟਾਕ ਇਮੇਜ ਵੈੱਬਸਾਈਟ ਤੋਂ ਖਰੀਦੀ ਗਈ ਸੀ, ਜਿਸ ਦੀ ਗ਼ਲਤ ਵਰਤੋਂ ਵੋਟਰ ਲਿਸਟ ਵਿਚ ਕੀਤੀ ਗਈ। ‘‘ਕਾਬਿਲੇਗੌਰ ਹੈ ਕਿ ਰਾਹੁਲ ਗਾਂਧੀ ਨੇ ਬੁੱਧਵਾਰ ਨੂੰ ਕੀਤੀ ਪ੍ਰੈੱਸ ਕਾਨਫਰੰਸ ਵਿੱਚ ਪੱਤਰਕਾਰਾਂ ਨੂੰ ਹਰਿਆਣਾ ਦੀ ਵੋਟਰ ਸੂਚੀ ਦਿਖਾਈ ਸੀ, ਜਿਸ ਵਿਚ ਬ੍ਰਾਜ਼ੀਲੀਅਨ ਮਾਡਲ ਦੀ ਤਸਵੀਰ ਦਾ ਕਈ ਨਾਵਾਂ ਨਾਲ ਇਸਤੇਮਾਲ ਕੀਤਾ ਗਿਆ ਸੀ। ਇਸ ਨੂੰ ਲੈ ਕੇ ਰਾਹੁਲ ਗਾਂਧੀ ਨੇ ਚੋਣ ਕਮਿਸ਼ਨ ’ਤੇ ਨਿਸ਼ਾਨਾ ਸੇਧਿਆ ਸੀ। ਰਾਹੁਲ ਨੇ ਮਾਡਲ ਦੀ ਤਸਵੀਰ ਦਿਖਾਉਂਦਿਆਂ ਕਿਹਾ ਸੀ ਕਿ ਇਸ ਮਹਿਲਾ ਨੇ ‘ਕਦੇ ਸਵੀਟੀ ਤੇ ਕਦੇ ਸੀਮਾ ਬਣ ਕੇ’ 22 ਵਾਰ ਵੋਟ ਪਾਈ।
