ਸੁਰੇਂਦਰ ਕੋਲੀ ਦੁਕਾਨ ‘ਤੇ ਮ੍ਰਿਤਕ ਮਿਲਿਆ

ਨਵੀਂ ਦਿੱਲੀ : ਨਿਠਾਰੀ ਮਾਮਲੇ ਦੇ ਦੋਸ਼ੀ ਸੁਰੇਂਦਰ ਕੋਲੀ ਸ਼ੁੱਕਰਵਾਰ ਨੂੰ ਆਪਣੇ ਚਾਹ ਦੇ ਸਟਾਲ ‘ਤੇ ਮ੍ਰਿਤਕ ਪਾਇਆ ਗਿਆ। ਕੋਲੀ, ਜਿਸ ਨੂੰ ਬਾਅਦ ਵਿੱਚ ਕਈ ਨਿਠਾਰੀ ਮਾਮਲਿਆਂ ਵਿੱਚ ਬਰੀ ਕਰ ਦਿੱਤਾ ਗਿਆ ਸੀ, ਵਪਾਰੀ ਮੋਨਿੰਦਰ ਸਿੰਘ ਪੰਧੇਰ ਦੇ ਨੋਇਡਾ ਘਰ ਵਿੱਚ ਘਰੇਲੂ ਨੌਕਰ ਵਜੋਂ ਕੰਮ ਕਰਦਾ ਸੀ। ਨਿਠਾਰੀ ਮਾਮਲਾ 2006 ਵਿੱਚ ਉਦੋਂ ਸਾਹਮਣੇ ਆਇਆ ਸੀ ਜਦੋਂ ਨੋਇਡਾ ਦੇ ਸੈਕਟਰ 31 ਵਿੱਚ ਪੰਧੇਰ ਦੇ ਇੱਕ ਬੰਗਲੇ ਦੇ ਨੇੜੇ ਵਿਹੜੇ ਅਤੇ ਨਾਲੀਆਂ ਵਿੱਚੋਂ ਪਿੰਜਰਾਂ ਦੇ ਅਵਸ਼ੇਸ਼, ਖੋਪੜੀਆਂ ਅਤੇ ਹੱਡੀਆਂ ਮਿਲੀਆਂ ਸਨ। ਸ਼ੱਕ ਕੀਤਾ ਜਾਂਦਾ ਸੀ ਕਿ ਇਹ ਅਵਸ਼ੇਸ਼ ਲਾਪਤਾ ਬੱਚਿਆਂ ਅਤੇ ਔਰਤਾਂ ਦੇ ਹਨ। ਇਸ ਮਾਮਲੇ ਵਿੱਚ ਸਹਿ-ਮੁਲਜ਼ਮ ਪੰਧੇਰ ਨੂੰ 20 ਅਕਤੂਬਰ, 2023 ਨੂੰ ਇਸ ਮਾਮਲੇ ਵਿੱਚ ਬਰੀ ਹੋਣ ਤੋਂ ਬਾਅਦ ਰਿਹਾਅ ਕਰ ਦਿੱਤਾ ਗਿਆ ਸੀ।
ਆਤਮਘਾਤੀ ਧਮਾਕੇ ‘ਚ 16 ਮੌਤਾਂ
ਇਸਲਾਮਾਬਾਦ : ਉੱਤਰ-ਪੱਛਮੀ ਪਾਕਿਸਤਾਨ ਵਿੱਚ ਮਸਜਿਦ ਵਿੱਚ ਸ਼ੁੱਕਰਵਾਰ ਨਮਾਜ਼ ਦੌਰਾਨ ਆਤਮਘਾਤੀ ਧਮਾਕੇ ਵਿੱਚ 16 ਲੋਕ ਮਾਰੇ ਗਏ ਅਤੇ ਦਰਜਨਾਂ ਜ਼ਖਮੀ ਹੋ ਗਏ। ਧਮਾਕਾ ਪੇਸ਼ਾਵਰ ਤੋਂ ਲੱਗਭੱਗ 60 ਕਿਲੋਮੀਟਰ ਦੱਖਣ-ਪੱਛਮ ਵਿੱਚ ਕੋਹਾਟ ਜ਼ਿਲ੍ਹੇ ਵਿੱਚ ਪੁਰਾਣੀ ਪੁਲਸ ਲਾਈਨਾਂ ਦੇ ਨੇੜੇ ਸਥਿਤ ਮਸਜਿਦ ਵਿੱਚ ਹੋਇਆ। ਧਮਾਕੇ ਵਿੱਚ ਪੰਜ ਪੁਲਸ ਕਰਮਚਾਰੀ ਅਤੇ 11 ਨਾਗਰਿਕ ਮਾਰੇ ਗਏ।
ਸੋਨੂ ਸੂਦ ਦਾ ਤਨਜ਼
ਮੁੰਬਈ : ਨਵੇਂ ਲਾਂਚ ਹੋਏ ‘ਆਈਫੋਨ 18’ ਨੂੰ ਲੈ ਕੇ ਦੇਸ਼ ਭਰ ਵਿੱਚ ਦੇਖੇ ਜਾ ਰਹੇ ਜ਼ਬਰਦਸਤ ਉਤਸ਼ਾਹ ਵਿਚਾਲੇ ਬਾਲੀਵੁੱਡ ਅਦਾਕਾਰ ਸੋਨੂ ਸੂਦ ਨੇ ਸੋਸ਼ਲ ਮੀਡੀਆ ‘ਤੇ ਇੱਕ ਮਜ਼ੇਦਾਰ ਅਤੇ ਵਿਚਾਰਨਯੋਗ ਪੋਸਟ ਸਾਂਝੀ ਕੀਤੀ ਹੈ। ਸ਼ੁੱਕਰਵਾਰ ਨੂੰ ਐਪਲ ਸਟੋਰਾਂ ਦੇ ਬਾਹਰ ਲਾਈਨਾਂ ਵਿੱਚ ਖੜ੍ਹੇ ਗਾਹਕਾਂ ਦੀ ਤਸਵੀਰ ਸ਼ੇਅਰ ਕਰਦਿਆਂ ਅਦਾਕਾਰ ਨੇ ਲਿਖਿਆ, “ਨਵਾਂ ਫੋਨ, ਨਵੀਂ ਈ ਐੱਮ ਆਈ… ਪਰ ਬਿੱਲ ਉਹੀ ਪੁਰਾਣੇ! ਸ਼ਾਇਦ ਹੁਣ ਸਮਾਂ ਆ ਗਿਆ ਹੈ ਕਿ ਅਸੀਂ ਸਿਰਫ਼ ਫੋਨ ਅੱਪਗ੍ਰੇਡ ਕਰਨ ਲਈ ਹੀ ਨਹੀਂ, ਸਗੋਂ ਸਮਾਜ ਵਿੱਚ ਕੋਈ ਬਦਲਾਅ ਲਿਆਉਣ ਲਈ ਵੀ ਲਾਈਨਾਂ ਵਿੱਚ ਖੜ੍ਹੇ ਹੋਈਏ। ਅਸਲੀ ਅੱਪਗ੍ਰੇਡ ਇੱਕ ਬਿਹਤਰ ਸਮਾਜ ਬਣਾਉਣਾ ਹੈ।”ਬਾਲੀਵੁੱਡ ਅਦਾਕਾਰ ਵਿੱਕੀ ਕੌਸ਼ਲ ਨਵਾਂ ਫੋਨ ਖਰੀਦਣ ਵਾਲੇ ਪਹਿਲੇ ਸਿਤਾਰਿਆਂ ਵਿੱਚੋਂ ਇੱਕ ਰਹੇ, ਜਿਨ੍ਹਾਂ ਨੂੰ ਮੁੰਬਈ ਦੇ ਐਪਲ ਬੀ.ਕੇ.ਸੀ. ਸਟੋਰ ‘ਚ ਨਵੇਂ ਡਿਵਾਈਸ ਨਾਲ ਸੈਲਫ਼ੀਆਂ ਲੈਂਦੇ ਦੇਖਿਆ ਗਿਆ।