ਫੌਜ ਦੀ ਮਨੀਪੁਰ ਦੀਆਂ ਬੀਬੀਆਂ ਨੂੰ ਅੜਿੱਕੇ ਨਾ ਡਾਹੁਣ ਦੀ ਅਪੀਲ

ਇੰਫਾਲ : ਫੌਜ ਨੇ ਲੋਕਾਂ ਨੂੰ ਮਨੀਪੁਰ ’ਚ ਸ਼ਾਂਤੀ ਬਹਾਲ ਕਰਨ ’ਚ ਮਦਦ ਕਰਨ ਦੀ ਅਪੀਲ ਕਰਦੇ ਹੋਏ ਕਿਹਾ ਹੈ ਕਿ ਹਿੰਸਾ ਪ੍ਰਭਾਵਤ ਉੱਤਰ-ਪੂਰਬੀ ਰਾਜ ’ਚ ਔਰਤਾਂ ਜਾਣਬੁੱਝ ਕੇ ਸੜਕਾਂ ਨੂੰ ਰੋਕ ਰਹੀਆਂ ਹਨ ਅਤੇ ਸੁਰੱਖਿਆ ਬਲਾਂ ਦੀਆਂ ਕਾਰਵਾਈਆਂ ’ਚ ਅੜਿੱਕਾ ਪਾ ਰਹੀਆਂ ਹਨ। ਫੌਜ ਦੀ ‘ਸਪੀਅਰਜ਼ ਕੋਰ’ ਨੇ ਸੋਮਵਾਰ ਦੇਰ ਰਾਤ ਟਵਿੱਟਰ ’ਤੇ ਕੁਝ ਅਜਿਹੀਆਂ ਘਟਨਾਵਾਂ ਦਾ ਵੀਡੀਓ ਸਾਂਝਾ ਕੀਤਾ ਅਤੇ ਕਿਹਾ ਕਿ ਇਸ ਤਰ੍ਹਾਂ ਦੀ ਗੈਰ-ਵਾਜਬ ਦਖਲਅੰਦਾਜ਼ੀ ਸੁਰੱਖਿਆ ਬਲਾਂ ਨੂੰ ਸਮੇਂ ਸਿਰ ਲੋੜੀਂਦੀ ਕਾਰਵਾਈ ਕਰਨ ਤੋਂ ਰੋਕਦੀ ਹੈ। ਇਹ ਬਿਆਨ ਇੰਫਾਲ ਪੂਰਬੀ ਜ਼ਿਲ੍ਹੇ ਦੇ ਇਥਮ ਪਿੰਡ ’ਚ ਫੌਜ ਅਤੇ ਔਰਤਾਂ ਦੀ ਅਗਵਾਈ ਵਾਲੀ ਭੀੜ ਵਿਚਾਲੇ ਹੋਏ ਸੰਘਰਸ਼ ਦੇ ਦੋ ਦਿਨ ਬਾਅਦ ਆਇਆ ਹੈ, ਜਿਸ ਨਾਲ ਸੁਰੱਖਿਆ ਬਲਾਂ ਨੂੰ ਉਥੇ ਲੁਕੇ 12 ਅੱਤਵਾਦੀਆਂ ਨੂੰ ਹੱਥੋਂ ਜਾਣ ਦੇਣ ਲਈ ਮਜਬੂਰ ਹੋਣਾ ਪਿਆ।