‘ਡਿਜੀਟਲ ਅਰੈੱਸਟ’ ਢੰਗ ਨਾਲ 46 ਲੱਖ ਠੱਗੇ

ਇੰਦੌਰ : ਠੱਗ ਗਰੋਹ ਨੇ ‘ਡਿਜੀਟਲ ਅਰੈਸਟ’ ਢੰਗ ਨਾਲ 65 ਸਾਲਾ ਮਹਿਲਾ ਨੂੰ ਆਪਣੇ ਜਾਲ ’ਚ ਫਸਾ ਕੇ 46 ਲੱਖ ਰੁਪਏ ਠੱਗ ਲਏ। ਪੁਲਸ ਅਧਿਕਾਰੀਆਂ ਨੇ ਦੱਸਿਆ ਕਿ ‘ਡਿਜੀਟਲ ਅਰੈਸਟ’ ਸਾਈਬਰ ਠੱਗੀ ਦਾ ਇਕ ਨਵਾਂ ਤਰੀਕਾ ਹੈ। ਇਸ ਤਰ੍ਹਾਂ ਦੇ ਮਾਮਲਿਆਂ ’ਚ ਠੱਗ ਆਪਣੇ-ਆਪ ਨੂੰ ਕਾਨੂੰਨੀ ਅਧਿਕਾਰੀ ਦੱਸ ਕੇ ਲੋਕਾਂ ਨੂੰ ਵੀਡੀਓ ਅਤੇ ਆਡੀਓ ਕਾਲ ਰਾਹੀਂ ਡਰਾਉਂਦੇ ਹਨ ਅਤੇ ਗਿ੍ਰਫਤਾਰੀ ਦਾ ਝਾਂਸਾ ਦੇ ਕੇ ਘਰ ਵਿਚ ਹੀ ਡਿਜੀਟਲੀ ਬੰਧਕ ਬਣਾ ਲੈਂਦੇ ਹਨ। ਪੁਲਸ ਦੇ ਐਡੀਸ਼ਨਲ ਡਿਪਟੀ ਕਮਿਸ਼ਨਰ ਰਾਜੇਸ਼ ਡੰਡੋਤੀਆ ਨੇ ਦੱਸਿਆ ਕਿ ਪਿਛਲੇ ਮਹੀਨੇ ਇਕ ਵਿਅਕਤੀ ਨੇ 65 ਸਾਲਾ ਮਹਿਲਾ ਨੂੰ ਫੋਨ ਕੀਤਾ ਅਤੇ ਆਪਣੇ-ਆਪ ਨੂੰ ਸੀ ਬੀ ਆਈ ਅਧਿਕਾਰੀ ਦੱਸ ਕੇ ਮਹਿਲਾ ਨੂੰ ਡਰਾਇਆ ਕਿ ਉਸ ਦੇ ਬੈਂਕ ਖਾਤੇ ਦੀ ਵਰਤੋਂ ਨਸ਼ੀਲੇ ਪਦਾਰਥਾਂ ਦੀ ਖਰੀਦ, ਅੱਤਵਾਦੀ ਗਤੀਵਿਧੀਆਂ ਅਤੇ ਮਨੀ ਲਾਂਡਰਿੰਗ ਲਈ ਕੀਤੀ ਗਈ ਹੈ, ਜਿਸ ਲਈ ਉਸ ਦੇ ਖਿਲਾਫ ਗਿ੍ਰਫਤਾਰੀ ਵਾਰੰਟ ਜਾਰੀ ਕੀਤੇ ਗਏ ਹਨ। ਡੰਡੋਤੀਆ ਨੇ ਦੱਸਿਆ ਕਿ ਠੱਗ ਗਰੋਹ ਨੇ ਵੀਡੀਓ ਕਾਲ ਰਾਹੀਂ ਮਹਿਲਾ ਨੂੰ ਘਰ ਵਿਚ ਹੀ ਗਿ੍ਰਫਤਾਰ ਕਰਕੇ ਪੰਜ ਦਿਨ ਤੱਕ ਪੁੱਛਗਿੱਛ ਕੀਤੀ ਅਤੇ ਮਹਿਲਾ ਨੂੰ ਬੈਂਕ ਖਾਤੇ ਵਿਚ ਜਮ੍ਹਾਂ ਰਾਸ਼ੀ ਉਸ ਦੇ ਦੱਸੇ ਖਾਤਿਆਂ ਵਿਚ ਭੇਜਣ ਲਈ ਕਿਹਾ। ਠੱਗ ਨੇ ਵੀਡੀਓ ਕਾਲ ’ਤੇ ਮਹਿਲਾ ਨੂੰ ਧਮਕੀ ਦਿੱਤੀ ਕਿ ਜੇ ਉਹ ਪੈਸੇ ਉਸ ਦੇ ਦੱਸੇ ਖਾਤਿਆਂ ਵਿਚ ਨਹੀਂ ਭੇਜੇਗੀ ਤਾਂ ਉਸ ਦੇ ਬੱਚਿਆਂ ਨੂੰ ਵੀ ਖਤਰਾ ਹੋ ਸਕਦਾ ਹੈ, ਜਿਸ ਤੋਂ ਡਰੀ ਮਹਿਲਾ ਨੇ 46 ਲੱਖ ਰੁਪਏ ਗਰੋਹ ਵੱਲੋਂ ਦੱਸੇ ਖਾਤਿਆਂ ਵਿਚ ਟਰਾਂਸਫਰ ਕਰ ਦਿੱਤੇ। ਪੁਲਸ ਅਧਿਕਾਰੀਆਂ ਨੇ ਦੱਸਿਆ ਕਿ ਠੱਗੀ ਬਾਰੇ ਪਤਾ ਲੱਗਣ ਤੋਂ ਬਾਅਦ ਮਹਿਲਾ ਨੇ ਕੌਮੀ ਸਾਈਬਰ ਅਪਰਾਧ ਰਿਪੋਰਟਿੰਗ ਪੋਰਟਲ ਅਤੇ ਪੁਲਸ ਨੂੰ ਸ਼ਿਕਾਇਤ ਦਿੱਤੀ। ਇਸ ਸੰਬੰਧੀ ਮਾਮਲਾ ਦਰਜ ਕਰ ਜਾਂਚ ਕੀਤੀ ਜਾ ਰਹੀ ਹੈ।