ਮੋਦੀ ਦਾ ਝਾਰਖੰਡ ’ਚ ਵਿਰੋਧੀ ਗੱਠਜੋੜ ’ਤੇ ਹਮਲਾ

ਰਾਂਚੀ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸੋਮਵਾਰ ਝਾਰਖੰਡ ’ਚ ਜੇ ਐੱਮ ਐੱਮ ਦੀ ਅਗਵਾਈ ਵਾਲੇ ਗੱਠਜੋੜ ’ਤੇ ਤਿੱਖਾ ਹਮਲਾ ਬੋਲਦਿਆਂ ਕਥਿਤ ਤੌਰ ’ਤੇ ਬੰਗਲਾਦੇਸ਼ੀ ਘੁਸਪੈਠੀਆਂ ਦਾ ਸਮਰਥਨ ਕਰਨ ਲਈ ਉਸ ਨੂੰ ‘ਘੁਸਪੈਠੀਆ ਬੰਧਨ’ ਕਰਾਰ ਦਿੱਤਾ ਅਤੇ ‘ਮਾਫੀਆ ਦਾ ਗੁਲਾਮ’ ਕਿਹਾ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਝਾਰਖੰਡ ’ਚ ਗੱਠਜੋੜ ਦੇ ਆਗੂਆਂ ਵੱਲੋਂ ਘੁਟਾਲੇ ਇੱਕ ਉਦਯੋਗ ਦੀ ਤਰ੍ਹਾਂ ਬਣ ਗਏ ਹਨ ਅਤੇ ਭਿ੍ਰਸ਼ਟਾਚਾਰ ਨੇ ਝਾਰਖੰਡ ਨੂੰ ਸਿਉਂਕ ਵਾਂਗ ਨਿਗਲ ਲਿਆ ਹੈ। ਝਾਰਖੰਡ ’ਚ ਤੁਸ਼ਟੀਕਰਨ ਦੀ ਰਾਜਨੀਤੀ ਆਪਣੇ ਸਿਖਰ ’ਤੇ ਪਹੁੰਚ ਗਈ ਹੈ, ਜਿੱਥੇ ਜੇ ਐੱਮ ਐੱਮ ਦੀ ਅਗਵਾਈ ਵਾਲਾ ਗੱਠਜੋੜ ਬੰਗਲਾਦੇਸੀ ਘੁਸਪੈਠੀਆਂ ਦਾ ਸਮਰਥਨ ਕਰਨ ’ਚ ਰੁਝਿਆ ਹੋਇਆ ਹੈ। ਜੇ ਅਜਿਹਾ ਜਾਰੀ ਰਿਹਾ ਤਾਂ ਝਾਰਖੰਡ ’ਚ ਕਬਾਇਲੀ ਆਬਾਦੀ ਸੁੰਗੜ ਜਾਵੇਗੀ। ਇਹ ਕਬਾਇਲੀ ਸਮਾਜ ਅਤੇ ਦੇਸ਼ ਲਈ ਖਤਰਾ ਹੈ। ਮੋਦੀ ਨੇ ਝਾਰਖੰਡ ਦੇ ਗੜ੍ਹਵਾ ’ਚ ਵਿਧਾਨ ਸਭਾ ਚੋਣਾਂ ਦੇ ਐਲਾਨ ਤੋਂ ਬਾਅਦ ਪਹਿਲੀ ਰੈਲੀ ’ਚ ਕਿਹਾ ਕਿ ਜੇ ਸਕੂਲਾਂ ’ਚ ਸਰਸਵਤੀ ਵੰਦਨਾ ਨੂੰ ਰੋਕਿਆ ਜਾਂਦਾ ਹੈ, ਤਾਂ ਤੁਸੀਂ ਖਤਰੇ ਦੇ ਪੱਧਰ ਨੂੰ ਸਮਝ ਸਕਦੇ ਹੋ।