ਇੱਕ ਲੱਖ ਆਂਡਿਆਂ ਦੀ ਚੋਰੀ ਨੇ ਅਮਰੀਕੀ ਪੁਲਸ ਨੂੰ ਚੱਕਰਾਂ ’ਚ ਪਾਇਆ

ਐਂਟਰੀਮ ਟਾਊਨਸ਼ਿਪ : ਅਮਰੀਕੀ ਸੂਬੇ ਪੈਨਸਿਲਵੇਨੀਆ ਵਿੱਚ ਇੱਕ ਟਰੇਲਰ ਦੇ ਪਿਛਲੇ ਹਿੱਸੇ ਤੋਂ ਇੱਕ ਲੱਖ ਆਂਡਿਆਂ ਦੀ ਚੋਰੀ ਦਾ ਮਾਮਲਾ ਪੁਲਸ ਲਈ ਸਿਰਦਰਦੀ ਬਣ ਗਿਆ ਹੈ। ਪੈਨਸਿਲਵੇਨੀਆ ਸਟੇਟ ਪੁਲਸ ਦੇ ਬੁਲਾਰੇ ਟਰੂਪਰ ਫਸਟ ਕਲਾਸ ਮੇਗਨ ਫਰੇਜ਼ਰ ਨੇ ਬੁੱਧਵਾਰ ਕਿਹਾਅਸੀਂ ਕਮਿਊਨਿਟੀ ਦੇ ਲੋਕਾਂ ਦੀਆਂ ਲੀਡਜ਼ ’ਤੇ ਭਰੋਸਾ ਕਰ ਰਹੇ ਹਾਂ। ਇਸ ਲਈ ਅਸੀਂ ਉਮੀਦ ਕਰ ਰਹੇ ਹਾਂ ਕਿ ਕਿਸੇ ਨੂੰ ਕੁਝ ਤਾਂ ਪਤਾ ਹੈ, ਉਹ ਸਾਨੂੰ ਕਾਲ ਕਰਨਗੇ ਅਤੇ ਕੋਈ ਜਾਣਕਾਰੀ ਦੇਣਗੇ। ਫਰੇਜ਼ਰ ਨੇ ਕਿਹਾ ਕਿ ਪੁਲਸ ਕਿਸੇ ਵੀ ਤਰ੍ਹਾਂ ਦੇ ਸੰਭਾਵੀ ਗਵਾਹਾਂ ਦੀ ਭਾਲ ਕਰ ਰਹੀ ਹੈ ਅਤੇ ਨਿਗਰਾਨੀ ਫੁਟੇਜ਼ ਦੀ ਜਾਂਚ ਕਰ ਰਹੀ ਹੈ, ਜੋ ਕਿ ਉਨ੍ਹਾਂ ਨੂੰ ਗੁਨਾਹਗਾਰ ਦੀ ਪਛਾਣ ਕਰਨ ਵਿੱਚ ਮਦਦ ਕਰ ਸਕਦੀ ਹੈ। ਉਨ੍ਹਾ ਕਿਹਾਮੇਰੇ ਕਰੀਅਰ ਵਿੱਚ, ਮੈਂ ਕਦੇ ਵੀ ਇੱਕ ਲੱਖ ਆਂਡੇ ਚੋਰੀ ਹੋਣ ਬਾਰੇ ਨਹੀਂ ਸੁਣਿਆ ਹੈ। ਇਹ ਯਕੀਨਨ ਨਿਵੇਕਲਾ ਮਾਮਲਾ ਹੈ।
ਬਰਡ ਫਲੂ ਕਿਸਾਨਾਂ ਨੂੰ ਇੱਕ ਮਹੀਨੇ ਵਿੱਚ ਲੱਖਾਂ ਮੁਰਗੀਆਂ ਨੂੰ ਮਾਰਨ ਲਈ ਮਜਬੂਰ ਕਰ ਰਿਹਾ ਹੈ, ਜਿਸ ਨਾਲ 2023 ਦੀਆਂ ਗਰਮੀਆਂ ਵਿੱਚ ਅਮਰੀਕੀ ਆਂਡੇ ਦੀ ਕੀਮਤ ਲਾਗਤ ਤੋਂ ਦੁੱਗਣੀ ਹੋ ਗਈ ਹੈ। ਅਜਿਹਾ ਜਾਪਦਾ ਹੈ ਕਿ ਈਸਟਰ ਨੇੜੇ ਆਉਣ ਨਾਲ ਸ਼ਾਇਦ ਕੋਈ ਰਾਹਤ ਨਜ਼ਰ ਨਹੀਂ ਆਵੇਗੀ। ਦਸੰਬਰ ਵਿੱਚ ਅਮਰੀਕੀ ਆਂਡੇ ਦੀ ਔਸਤਨ ਕੀਮਤ 4.5 ਡਾਲਰ ਸੀ। ਖੇਤੀਬਾੜੀ ਵਿਭਾਗ ਨੇ ਭਵਿੱਖਬਾਣੀ ਕੀਤੀ ਹੈ ਕਿ ਇਸ ਸਾਲ ਆਂਡੇ ਦੀਆਂ ਕੀਮਤਾਂ 20 ਫੀਸਦੀ ਹੋਰ ਵਧਣ ਜਾ ਰਹੀਆਂ ਹਨ।
ਅਧਿਕਾਰੀ ਨੇ ਕਿਹਾ ਕਿ 100,000 ਆਂਡੇ ਸ਼ਨਿੱਚਰਵਾਰ ਨੂੰ ਰਾਤ 8.40 ਵਜੇ ਪੀਟ ਐਂਡ ਗੈਰੀ ਦੇ ਆਰਗੈਨਿਕਸ ਡਿਸਟਰੀਬਿਊਸ਼ਨ ਟਰਾਲੇ ਦੇ ਪਿਛਲੇ ਹਿੱਸੇ ਤੋਂ ਚੋਰੀ ਕੀਤੇ ਗਏ ਸਨ। ਪੁਲਸ ਦੇ ਅਨੁਸਾਰ ਪੈਨਸਿਲਵੇਨੀਆ ਦੇ ਐਂਟਰੀਮ ਟਾਊਨਸ਼ਿਪ ਵਿੱਚ ਉਨ੍ਹਾਂ ਦੀ ਕੀਮਤ ਲੱਗਭੱਗ 40,000 ਡਾਲਰ ਹੈ, ਜੋ ਕਿ ਵੱਡਾ ਅਪਰਾਧ ਹੈ। ਪੀਟ ਐਂਡ ਗੈਰੀ’ਜ਼ ਆਰਗੈਨਿਕਸ ਐੱਲ ਐੱਲ ਸੀ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਕੰਪਨੀ ਚੋਰੀ ਦੀ ਜਾਂਚ ਲਈ ਅਧਿਕਾਰੀਆਂ ਨਾਲ ਮਿਲ ਕੇ ਕੰਮ ਕਰ ਰਹੀ ਹੈ।