ਵਾਸ਼ਿੰਗਟਨ : ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸ਼ੁੱਕਰਵਾਰ ਹਵਾਈ ਸੈਨਾ ਦੇ ਜਨਰਲ ਸੀ ਕਿਊ ਬਰਾਊਨ ਨੂੰ ਜਾਇੰਟ ਚੀਫ ਆਫ ਸਟਾਫ ਦੇ ਚੇਅਰਮੈਨ ਦੇ ਅਹੁਦੇ ਤੋਂ ਅਚਾਨਕ ਬਰਖਾਸਤ ਕਰ ਦਿੱਤਾ। ਟਰੰਪ ਨੇ ਇਤਿਹਾਸ ਰਚਣ ਵਾਲੇ ਲੜਾਕੂ ਪਾਇਲਟ ਤੇ ਸਤਿਕਾਰਤ ਅਧਿਕਾਰੀ ਨੂੰ ਲਾਂਭੇ ਕੀਤਾ ਹੈ ਤੇ ਉਨ੍ਹਾ ਦੀ ਇਹ ਕਾਰਵਾਈ ਫੌਜ ਨੂੰ ਉਨ੍ਹਾਂ ਆਗੂਆਂ ਤੋਂ ਛੁਟਕਾਰਾ ਦਿਵਾਉਣ ਦੀ ਮੁਹਿੰਮ ਦਾ ਹਿੱਸਾ ਹੈ, ਜੋ ਫੌਜੀ ਰੈਂਕਾਂ ਵਿੱਚ ਵਿਭਿੰਨਤਾ ਤੇ ਸਮਾਨਤਾ ਦੀ ਹਮਾਇਤ ਕਰਦੇ ਹਨ।
ਬ੍ਰਾਊਨ, ਜੋ ਚੇਅਰਮੈਨ ਵਜੋਂ ਸੇਵਾ ਨਿਭਾਉਣ ਵਾਲੇ ਸਿਰਫ ਦੂਜੇ ਸਿਆਹਫਾਮ ਜਨਰਲ ਹਨ, ਦੀ ਬਰਖਾਸਤਗੀ ਨਾਲ ਪੈਂਟਾਗਨ ਸਦਮੇ ਵਿੱਚ ਹੈ। ਉਨ੍ਹਾ ਆਪਣੀ ਨੌਕਰੀ ਦੇ 16 ਮਹੀਨੇ ਯੂਕਰੇਨ ਜੰਗ ਅਤੇ ਮੱਧ-ਪੂਰਬ ਵਿੱਚ ਵਧੇ ਹੋਏ ਸੰਘਰਸ਼ ਵਿੱਚ ਲਾਏ ਸਨ। ਟਰੰਪ ਨੇ ਇੱਕ ਸੋਸ਼ਲ ਮੀਡੀਆ ਪੋਸਟ ਵਿਚ ਕਿਹਾਮੈਂ ਜਨਰਲ ਚਾਰਲਸ ਸੀ ਕਿਊ ਬ੍ਰਾਊਨ ਦਾ ਸਾਡੇ ਦੇਸ਼ ਲਈ 40 ਸਾਲਾਂ ਤੋਂ ਵੱਧ ਸਮੇਂ ਦੀ ਸੇਵਾ ਲਈ ਧੰਨਵਾਦ ਕਰਨਾ ਚਾਹੁੰਦਾ ਹਾਂ, ਜਿਸ ਵਿੱਚ ਸਾਡੇ ਮੌਜੂਦਾ ਜਾਇੰਟ ਚੀਫ ਆਫ ਸਟਾਫ ਦੇ ਚੇਅਰਮੈਨ ਵਜੋਂ ਕਾਰਜਕਾਲ ਵੀ ਸ਼ਾਮਲ ਹੈ। ਉਹ ਇੱਕ ਵਧੀਆ ਸੱਜਣ ਅਤੇ ਇੱਕ ਸ਼ਾਨਦਾਰ ਲੀਡਰ ਹਨ ਅਤੇ ਮੈਂ ਉਨ੍ਹਾ ਅਤੇ ਉਨ੍ਹਾ ਦੇ ਪਰਵਾਰ ਲਈ ਇੱਕ ਵਧੀਆ ਭਵਿੱਖ ਦੀ ਕਾਮਨਾ ਕਰਦਾ ਹਾਂ। ਟਰੰਪ ਨੇ ਕਿਹਾ ਕਿ ਉਹ ਹਵਾਈ ਸੈਨਾ ਦੇ ਲੈਫਟੀਨੈਂਟ ਜਨਰਲ ਡੈਨ ਰਾਜ਼ਿਨ ਕੇਨ ਨੂੰ ਅਗਲੇ ਚੇਅਰਮੈਨ ਵਜੋਂ ਨਾਮਜ਼ਦ ਕਰ ਰਹੇ ਹਨ। ਕੇਨ ਐੱਫ-16 ਪਾਇਲਟ ਹਨ, ਜਿਨ੍ਹਾ ਸਰਗਰਮ ਡਿਊਟੀ ਅਤੇ ਨੈਸ਼ਨਲ ਗਾਰਡ ਵਿੱਚ ਸੇਵਾ ਨਿਭਾਈ। ਉਨ੍ਹਾ ਦੀ ਅਧਿਕਾਰਤ ਫੌਜੀ ਆਤਮਕਥਾ ਮੁਤਾਬਕ ਉਨ੍ਹਾ ਹਾਲ ਹੀ ਵਿੱਚ ਸੀ ਆਈ ਏ ਵਿੱਚ ਫੌਜੀ ਮਾਮਲਿਆਂ ਲਈ ਐਸੋਸੀਏਟ ਡਾਇਰੈਕਟਰ ਵਜੋਂ ਵੀ ਸੇਵਾ ਨਿਭਾਈ ਸੀ।
