ਵਿਦਿਆਰਥਣ ਨੂੰ ਖੁਦਕੁਸ਼ੀ ਲਈ ਕੀਤਾ ਮਜਬੂਰ

ਜੈਪੁਰ : ਕੇਂਦਰੀ ਸੈਕੰਡਰੀ ਸਿੱਖਿਆ ਬੋਰਡ (ਸੀ ਬੀ ਐੱਸ ਈ) ਦੀ ਇੱਕ ਰਿਪੋਰਟ ਅਨੁਸਾਰ ਜੈਪੁਰ ਦੇ ਨੀਰਜਾ ਮੋਦੀ ਸਕੂਲ ਦੀ ਨੌਂ ਸਾਲਾ ਵਿਦਿਆਰਥਣ ਨੇ ਇੱਕ ਨਵੰਬਰ ਨੂੰ ਖੁਦਕੁਸ਼ੀ 18 ਮਹੀਨਿਆਂ ਤੋਂ ਚੱਲ ਰਹੀ ਧੱਕੇਸ਼ਾਹੀ ਦਾ ਸ਼ਿਕਾਰ ਹੋਣ ਤੋਂ ਬਾਅਦ ਕੀਤੀ। ਇਹ ਸਿੱਟਾ ਸੀ ਬੀ ਐੱਸ ਈ ਦੀ ਦੋ-ਮੈਂਬਰੀ ਜਾਂਚ ਟੀਮ ਨੇ ਕੱਢਿਆ ਹੈ।
ਇੱਕ ਮੀਡੀਆ ਦੀ ਰਿਪੋਰਟ ਮੁਤਾਬਕ ਉਸ ਦੇ ਮਾਪਿਆਂ ਨੇ ਦੋਸ਼ ਲਾਇਆ ਕਿ ਉਸ ਨੂੰ ਤੰਗ ਕੀਤਾ ਜਾਂਦਾ ਸੀ, ਛੇੜਿਆ ਜਾਂਦਾ ਸੀ ਅਤੇ ‘ਜਿਨਸੀ ਸੋਸ਼ਣ’ ਵੀ ਕੀਤਾ ਜਾਂਦਾ ਸੀ। ਉਨ੍ਹਾਂ ਇਹ ਵੀ ਦੋਸ਼ ਲਾਇਆ ਕਿ ਸਕੂਲ ਪ੍ਰਸ਼ਾਸਨ ਨੂੰ ਵਾਰ-ਵਾਰ ਸ਼ਿਕਾਇਤਾਂ ਵੀ ਦਿੱਤੀਆਂ ਗਈਆਂ, ਪਰ ਇਸ ਦੇ ਬਾਵਜੂਦ ਸਕੂਲ ਪ੍ਰਸ਼ਾਸਨ ਨੇ ਕੋਈ ਕਾਰਵਾਈ ਨਹੀਂ ਕੀਤੀ। ਰਿਪੋਰਟ ਵਿੱਚ ਖੁਲਾਸਾ ਹੋਇਆ ਕਿ ਵਿਦਿਆਰਥਣ ਨੇ ਆਪਣੀ ਕਲਾਸ ਟੀਚਰ ਪੁਨੀਤਾ ਸ਼ਰਮਾ ਤੋਂ ਵਾਰ-ਵਾਰ ਮਦਦ ਮੰਗੀ, ਉਸ ਨੇ ਆਪਣੀ ਕਲਾਸ ਟੀਚਰ ਨੂੰ ਮੌਤ ਵਾਲੇ ਦਿਨ ਪੰਜ ਵਾਰ ਅਪੀਲ ਕੀਤੀ, ਪਰ ਉਸ ਦੀ ਅਰਜ਼ੀ ਨੂੰ ਖਾਰਜ ਕਰ ਦਿੱਤਾ ਗਿਆ।
ਰਿਪੋਰਟ ਮੁਤਾਬਕ ਸਹਾਇਤਾ ਦੇਣ ਦੀ ਬਜਾਏ ਅਧਿਆਪਕਾ ਨੇ ਉਸ ’ਤੇ ਚੀਕਿਆ, ਜਿਸ ਨਾਲ ਪੂਰੀ ਕਲਾਸ ਹੈਰਾਨ ਰਹਿ ਗਈ।
ਉਸ ਦਿਨ ਦੀ ਸੀ ਸੀ ਟੀ ਵੀ ਫੁਟੇਜ਼ ਮੁਤਾਬਕ ਸਵੇਰੇ 11 ਵਜੇ ਤੋਂ ਪਹਿਲਾਂ ਵਿਦਿਆਰਥਣ ਖੁਸ਼ ਸੀ ਅਤੇ ਆਮ ਗਤੀਵਿਧੀਆਂ ਵਿੱਚ ਰੁੱਝੀ ਹੋਈ ਸੀ। ਬਾਅਦ ਵਿੱਚ ਉਹ ਆਪਣੇ ਜਮਾਤੀਆਂ ਦੁਆਰਾ ਇੱਕ ਡਿਜੀਟਲ ਸਲੇਟ ’ਤੇ ਲਿਖੀ ਗਈ ਅਣਉਚਿਤ ਸਮੱਗਰੀ ਕਾਰਨ ਪਰੇਸ਼ਾਨ ਹੋ ਗਈ, ਇਸ ਦੇ ਬਾਵਜੂਦ ਅਧਿਆਪਕਾਂ ਵੱਲੋਂ ਕੋਈ ਦਖਲ ਨਹੀਂ ਦਿੱਤਾ ਗਿਆ। ਘਬਰਾਹਟ ਮਹਿਸੂਸ ਕਰਦਿਆਂ ਉਹ ਕਲਾਸਰੂਮ ਤੋਂ ਬਾਹਰ ਨਿਕਲੀ, ਚੌਥੀ ਮੰਜ਼ਲ ’ਤੇ ਚੜ੍ਹੀ ਅਤੇ ਛਾਲ ਮਾਰ ਦਿੱਤੀ, ਜਿਸ ਨਾਲ ਉਸ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ।
ਰਿਪੋਰਟ ਵਿੱਚ ਧੱਕੇਸ਼ਾਹੀ ਦੀਆਂ ਪਿਛਲੀਆਂ ਘਟਨਾਵਾਂ ਦਾ ਵੀ ਵੇਰਵਾ ਦਿੱਤਾ ਗਿਆ ਹੈ, ਜਿਸ ਵਿੱਚ ਜ਼ੁਬਾਨੀ ਪ੍ਰੇਸ਼ਾਨ ਕਰਨਾ, ਉਸ ਦੇ ਸ਼ਬਦਾਂ ਨੂੰ ਗਲਤ ਤਰੀਕੇ ਨਾਲ ਪੇਸ਼ ਕਰਨਾ ਅਤੇ ਸਰੀਰਕ ਘਟਨਾਵਾਂ ਸ਼ਾਮਲ ਹਨ, ਜਿਨ੍ਹਾਂ ਨੂੰ ਸਕੂਲ ਨੇ ਵੱਡੇ ਪੱਧਰ ’ਤੇ ਅਣਗੌਲਿਆ। ਉਸ ਦੇ ਮਾਪਿਆਂ ਵੱਲੋਂ ਉਸ ਨੂੰ ਦੂਜੇ ਸਕੂਲ ਵਿੱਚ ਤਬਦੀਲ ਕਰਨ ਦੀਆਂ ਕੋਸ਼ਿਸ਼ਾਂ ਵੀ ਅਸਫਲ ਰਹੀਆਂ ਸਨ।
ਜਾਂਚ ਵਿੱਚ ਕੈਂਪਸ ਵਿੱਚ ਸੁਰੱਖਿਆ ਵਿੱਚ ਖਾਮੀਆਂ ਨੂੰ ਵੀ ਉਜਾਗਰ ਕੀਤਾ ਗਿਆ ਹੈ, ਜਿਸ ਵਿੱਚ ਫਲੋਰ ਅਟੈਂਡੈਂਟਾਂ ਦੀ ਗੈਰ-ਮੌਜੂਦਗੀ, ਸੀ ਸੀ ਟੀ ਵੀ ਨਿਗਰਾਨੀ ਦੀ ਘਾਟ, ਵਿਦਿਆਰਥੀਆਂ ਦਾ ਆਈ ਡੀ ਕਾਰਡ ਨਾ ਪਾਉਣਾ ਅਤੇ ਉੱਚੀਆਂ ਮੰਜ਼ਲਾਂ ’ਤੇ ਸੁਰੱਖਿਆ ਜਾਲ ਨਾ ਹੋਣਾ ਸ਼ਾਮਲ ਹੈ।
ਰਿਪੋਰਟ ਵਿੱਚ ਸਕੂਲ ਦੀ ਸੁਰੱਖਿਅਤ ਮਾਹੌਲ ਬਣਾਈ ਰੱਖਣ ਵਿੱਚ ਅਸਫਲਤਾ ਅਤੇ ਅਧਿਆਪਕ ਦੀ ਹਮਦਰਦੀ ਅਤੇ ਕਾਰਵਾਈ ਦੀ ਘਾਟ ਲਈ ਨਿੰਦਾ ਕੀਤੀ ਗਈ ਹੈ, ਜਿਸ ਕਾਰਨ ਉਹ ਨਾ ਬਚ ਸਕੀ। ਸੀ ਬੀ ਐੱਸ ਈ ਨੇ 30 ਦਿਨਾਂ ਦੇ ਅੰਦਰ ਸਕੂਲ ਤੋਂ ਸਪੱਸ਼ਟੀਕਰਨ ਮੰਗਿਆ ਹੈ ਅਤੇ ਕਿਹਾ ਹੈ ਕਿ ਸੁਰੱਖਿਆ ਨਿਯਮਾਂ ਅਤੇ ਬੱਚਿਆਂ ਨੂੰ ਜਿਨਸੀ ਅਪਰਾਧਾਂ ਤੋਂ ਸੁਰੱਖਿਆ ਐਕਟ (ਪੋਕਸੋ) ਤਹਿਤ ਜੁਰਮਾਨਾ ਲੱਗ ਸਕਦਾ ਹੈ।