ਕੋਲਕਾਤਾ : ਇੱਥੇ ਸਾਲਟ ਲੇਕ ਸਟੇਡੀਅਮ ਵਿੱਚ ਹਫੜਾ-ਦਫੜੀ ਮਚ ਗਈ, ਜਦੋਂ ਅਰਜਨਟੀਨਾ ਦੇ ਫੁੱਟਬਾਲ ਆਈਕਨ ਲਿਓਨਲ ਮੈਸੀ ਨੂੰ ਦੇਖਣ ਲਈ ਟਿਕਟਾਂ ’ਤੇ ਮੋਟੀਆਂ ਰਕਮਾਂ ਖਰਚ ਕਰਨ ਵਾਲੇ ਦਰਸ਼ਕਾਂ ਨੇ ਫੁੱਟਬਾਲ ਖਿਡਾਰੀ ਦੀ ਸਾਫ਼ ਝਲਕ ਨਾ ਮਿਲਣ ’ਤੇ ਰੋਸ ਪ੍ਰਦਰਸ਼ਨ ਕੀਤਾ। ਮੈਸੀ ਲੰਮੇ ਸਮੇਂ ਦੇ ਸਟਰਾਈਕ ਪਾਰਟਨਰ ਲੁਈਸ ਸੁਆਰੇਜ਼ ਅਤੇ ਅਰਜਨਟੀਨਾ ਦੇ ਟੀਮ ਸਾਥੀ ਰੌਡਰਿਗੋ ਡੀ ਪਾਲ ਦੇ ਨਾਲ ਸਵੇਰੇ 11.30 ਵਜੇ ਦੇ ਕਰੀਬ ਵਿਵੇਕਾਨੰਦ ਯੁਵਾ ਭਾਰਤੀ ਕਿ੍ਰੜਾਂਗਨ ਪਹੁੰਚੇ। ਉਹ ਮੈਦਾਨ ਵਿੱਚ ਆਉਣ ਵਾਲੇ ਪਹਿਲੇ ਵਿਅਕਤੀ ਸਨ। ਉਹ ਸੰਖੇਪ ਵਿੱਚ ਘੁੰਮੇ ਅਤੇ ਭੀੜ ਵੱਲ ਹੱਥ ਹਿਲਾਇਆ। ਹਾਲਾਂ ਕਿ ਉਹ ਆਪਣੇ ਪੂਰੇ ਚੱਕਰ ਦੌਰਾਨ ਵੀ ਆਈ ਪੀਜ਼, ਪ੍ਰਬੰਧਕਾਂ ਅਤੇ ਸੁਰੱਖਿਆ ਕਰਮਚਾਰੀਆਂ ਨਾਲ ਘਿਰੇ ਰਹੇ। ਪ੍ਰਸੰਸਕਾਂ ਨੇ ਦਾਅਵਾ ਕੀਤਾ ਕਿ ਸਵੇਰ ਤੋਂ ਇੰਤਜ਼ਾਰ ਕਰਨ ਦੇ ਬਾਵਜੂਦ ਉਹ ਮੈਸੀ ਨੂੰ ਨਾ ਤਾਂ ਸਿੱਧੇ ਤੌਰ ’ਤੇ ਅਤੇ ਨਾ ਹੀ ਸਟੇਡੀਅਮ ਦੀਆਂ ਵੱਡੀਆਂ ਸਕ੍ਰੀਨਾਂ ’ਤੇ ਠੀਕ ਤਰ੍ਹਾਂ ਦੇਖ ਸਕੇ। ਸਟੈਂਡਾਂ ਵਿੱਚ ‘ਸਾਨੂੰ ਮੈਸੀ ਚਾਹੀਦਾ ਹੈ’ ਦੇ ਨਾਅਰੇ ਗੂੰਜਣ ਨਾਲ ਨਿਰਾਸ਼ਾ ਵਧ ਗਈ। ਨਿਰਾਸ਼ ਸਮਰਥਕਾਂ ਨੇ ਮੈਦਾਨ ’ਤੇ ਬੋਤਲਾਂ ਸੁੱਟੀਆਂ ਅਤੇ ਗੈਲਰੀਆਂ ਵਿੱਚ ਬੈਨਰਾਂ, ਹੋਰਡਿੰਗਾਂ ਅਤੇ ਪਲਾਸਟਿਕ ਦੀਆਂ ਕੁਰਸੀਆਂ ਨੂੰ ਨੁਕਸਾਨ ਪਹੁੰਚਾਇਆ। ਇਸ ਦੌਰਾਨ ਮੈਸੀ ਨੂੰ ਨਿਰਧਾਰਤ ਸਮੇਂ ਤੋਂ ਪਹਿਲਾਂ ਬਾਹਰ ਕੱਢ ਲਿਆ ਗਿਆ ਅਤੇ ਵਾਧੂ ਸੁਰੱਖਿਆ ਤਾਇਨਾਤ ਕਰ ਦਿੱਤੀ। ਲਿਓਨਲ ਮੈਸੀ ਦੇ ਸਾਲਟ ਲੇਕ ਸਟੇਡੀਅਮ ਈਵੈਂਟ ਦੇ ਮੁੱਖ ਪ੍ਰਬੰਧਕ ਸਤਦਰੂ ਦੱਤਾ ਨੂੰ ਐਤਵਾਰ ਵੱਡੇ ਪੱਧਰ ’ਤੇ ਅਫਰਾ-ਤਫਰੀ ਅਤੇ ਗੰਭੀਰ ਗਲਤ ਪ੍ਰਬੰਧਨ ਦੇ ਦੋਸ਼ਾਂ ਤੋਂ ਬਾਅਦ ਹਿਰਾਸਤ ਵਿੱਚ ਲਿਆ ਗਿਆ ਹੈ। ਇਹ ਜਾਣਕਾਰੀ ਪੱਛਮੀ ਬੰਗਾਲ ਦੇ ਪੁਲਸ ਡਾਇਰੈਕਟਰ ਜਨਰਲ (ਡੀ ਜੀ ਪੀ) ਰਾਜੀਵ ਕੁਮਾਰ ਨੇ ਦਿੱਤੀ। ਦੱਤਾ ਨੂੰ ਕੋਲਕਾਤਾ ਹਵਾਈ ਅੱਡੇ ਤੋਂ ਹਿਰਾਸਤ ਵਿੱਚ ਲਿਆ ਗਿਆ, ਜਿੱਥੇ ਉਹ ਮੈਸੀ ਅਤੇ ਉਸ ਦੇ ਸਾਥੀਆਂ ਨੂੰ ਹੈਦਰਾਬਾਦ ਲਈ ਰਵਾਨਾ ਕਰਨ ਗਿਆ ਸੀ। ਰਾਜੀਵ ਕੁਮਾਰ ਨੇ ਕਿਹਾ, ‘ਅਸੀਂ ਦੇਖ ਰਹੇ ਹਾਂ ਕਿ ਕੀ ਪ੍ਰਬੰਧਕ ਦੇ ਪੱਖੋਂ ਪ੍ਰਬੰਧ ਠੀਕ ਨਹੀਂ ਸਨ, ਜਿਸ ਕਾਰਨ ਸਟੇਡੀਅਮ ਵਿੱਚ ਅਫਰਾ-ਤਫਰੀ ਹੋਈ। ਉਸ ਨੂੰ ਹਿਰਾਸਤ ਵਿੱਚ ਲਿਆ ਗਿਆ ਹੈ। ਪੁਲਸ ਨੇ ਸਥਿਤੀ ਨੂੰ ਕਾਬੂ ਵਿੱਚ ਕਰ ਲਿਆ ਹੈ। ਉਨ੍ਹਾ ਕਿਹਾ ਕਿ ਪ੍ਰਬੰਧਕ ਨੇ ਲਿਖਤੀ ਰੂਪ ਵਿੱਚ ਭਰੋਸਾ ਦਿੱਤਾ ਹੈ ਕਿ ਉਹ ਨਿਰਾਸ਼ ਦਰਸ਼ਕਾਂ ਨੂੰ ਵੇਚੀਆਂ ਗਈਆਂ ਟਿਕਟਾਂ ਦੀ ਕੀਮਤ ਵਾਪਸ ਕਰੇਗਾ।
