ਕਤੂਰੇ ਨੂੰ ਬਲਦੇ ਤੰਦੂਰ ‘ਚ ਸੁੱਟ’ਤਾ!

ਚੰਡੀਗੜ੍ਹ : ਇੱਥੋਂ ਦੇ ਸੈਕਟਰ 26 ਸਥਿਤ ਬਾਪੂ ਧਾਮ ਕਲੋਨੀ ਵਿੱਚ ਇੱਕ ਢਾਬੇ ਦੇ ਬਾਹਰ ਕਤੂਰੇ ਨੂੰ ਕਥਿਤ ਤੌਰ ‘ਤੇ ਬਲਦੇ ਤੰਦੂਰ ਵਿੱਚ ਜ਼ਿੰਦਾ ਸੁੱਟ ਦਿੱਤਾ ਗਿਆ, ਜਿਸ ਕਾਰਨ ਉਸ ਦੀ ਮੌਤ ਹੋ ਗਈ। ਇਹ ਘਟਨਾ 16 ਮਈ ਨੂੰ ਰਾਤ 1.40 ਵਜੇ ਦੇ ਕਰੀਬ ਕਲੋਨੀ ਦੇ ਫੇਜ਼ 2 ਵਿੱਚ ਨੂਰਾਨੀ ਢਾਬੇ ਨੇੜੇ ਵਾਪਰੀ। ਸਥਾਨਕ ਨਿਵਾਸੀ ਸੰਜੇ ਕੁਮਾਰ ਦੀ ਸ਼ਿਕਾਇਤ ਤੋਂ ਬਾਅਦ ਸੈਕਟਰ 26 ਦੇ ਥਾਣੇ ਵਿੱਚ ਜਾਨਵਰਾਂ ਪ੍ਰਤੀ ਬੇਰਹਿਮੀ ਰੋਕਥਾਮ ਐਕਟ ਤਹਿਤ ਅਣਪਛਾਤੇ ਵਿਅਕਤੀਆਂ ਵਿਰੁੱਧ ਐੱਫ ਆਈ ਆਰ ਦਰਜ ਕੀਤੀ ਗਈ ਹੈ। ਸੰਜੇ ਕੁਮਾਰ, ਜੋ ਕਿ ਸੈਕਟਰ 26 ਸਬਜ਼ੀ ਮੰਡੀ ਵਿੱਚ ਮਜ਼ਦੂਰ ਵਜੋਂ ਕੰਮ ਕਰਦਾ ਹੈ, ਨੇ ਦੱਸਿਆ ਕਿ ਉਹ ਕੰਮ ਤੋਂ ਬਾਅਦ ਘਰ ਵਾਪਸ ਆ ਰਿਹਾ ਸੀ ਤਾਂ ਉਸ ਨੇ ਅਣਪਛਾਤੇ ਵਿਅਕਤੀ ਨੂੰ ਇੱਕ ਕਤੂਰੇ ਨੂੰ ਲਿਜਾਂਦੇ ਦੇਖਿਆ। ਜਿਵੇਂ ਹੀ ਉਹ ਵਿਅਕਤੀ ਨੂਰਾਨੀ ਢਾਬੇ ਦੇ ਬਾਹਰ ਪਹੁੰਚਿਆ, ਉਸ ਨੇ ਕਤੂਰੇ ਨੂੰ ਤੰਦੂਰ ਵਿੱਚ ਸੁੱਟ ਦਿੱਤਾ ਅਤੇ ਭੱਜ ਗਿਆ। ਉਹ ਤੁਰੰਤ ਤੰਦੂਰ ਵੱਲ ਭੱਜਿਆ ਅਤੇ ਬਹੁਤ ਮੁਸ਼ਕਲ ਨਾਲ ਕਤੂਰੇ ਨੂੰ ਬਾਹਰ ਕੱਢਿਆ। ਹਾਲਾਂਕਿ, ਉਦੋਂ ਤੱਕ ਉਹ ਸਾਹ ਲੈਣਾ ਬੰਦ ਕਰ ਚੁੱਕਾ ਸੀ ਅਤੇ ਮਰ ਗਿਆ ਸੀ। ਬਾਅਦ ਵਿੱਚ ਉਸ ਨੇ ਬਾਪੂ ਧਾਮ ਕਲੋਨੀ ਵਿੱਚ ਸੁਖਨਾ ਚੋਅ ਦੇ ਨੇੜੇ ਕਤੂਰੇ ਨੂੰ ਦਫਨਾ ਦਿੱਤਾ। ਉਸ ਨੇ ਪੁਲਸ ਨੂੰ ਇਹ ਵੀ ਦੱਸਿਆ ਕਿ ਜੇ ਕਤੂਰੇ ਨੂੰ ਤੰਦੂਰ ਵਿੱਚ ਸੁੱਟਣ ਵਾਲੇ ਨੂੰ ਉਸ ਦੇ ਸਾਹਮਣੇ ਪੇਸ਼ ਕੀਤਾ ਜਾਵੇ ਤਾਂ ਉਹ ਉਸ ਦੀ ਪਛਾਣ ਕਰ ਸਕਦਾ ਹੈ।