ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਜਿਸ ਡੋਨਾਲਡ ਟਰੰਪ ਨੂੰ ਬੇਹੱਦ ਕਰੀਬੀ ਦੋਸਤ ਕਹਿੰਦੇ ਨਹੀਂ ਥੱਕਦੇ, ਉਸ ਦੀਆਂ ਨੀਤੀਆਂ ਪ੍ਰਤੀ ਅਮਰੀਕਾ ਰਹਿੰਦੇ ਭਾਰਤੀਆਂ ਦਾ ਭਰੋਸਾ ਘਟ ਕੇ ਰਿਕਾਰਡ ਹੇਠਲੇ ਪੱਧਰ ਤੱਕ ਪਹੁੰਚ ਗਿਆ ਹੈ। ਅਮਰੀਕਾ ਪ੍ਰਤੀ ਭਾਰਤੀਆਂ ਦੀ ਰਾਏ 25 ਸਾਲਾਂ ਵਿੱਚ ਸਭ ਤੋਂ ਵੱਧ ਨਕਾਰਾਤਮਕ ਪੱਧਰ ‘ਤੇ ਪਹੁੰਚ ਗਈ ਹੈ। ਇਹ ਸਥਿਤੀ ਟਰੰਪ ਦੀਆਂ ਟੈਰਿਫ ਨੀਤੀਆਂ, ਸਖਤ ਇਮੀਗ੍ਰੇਸ਼ਨ ਨਿਯਮਾਂ ਅਤੇ ਈਰਾਨ ਤੇ ਗਾਜ਼ਾ ਵਰਗੇ ਟਕਰਾਵਾਂ ਕਾਰਨ ਹੈ। ਇਹ ਗੱਲ ‘ਪਿਊ’ ਦੇ ਸਰਵੇਖਣ ਵਿੱਚ ਸਾਹਮਣੇ ਆਈ ਹੈ। ਪਿਊ ਰਿਸਰਚ ਸੈਂਟਰ ਦੁਨੀਆ ਭਰ ਵਿੱਚ ਜਨਤਕ ਰਾਏ ਲਈ ਇੱਕ ਸਤਿਕਾਰਤ ਸੰਸਥਾ ਹੈ। ਪਿਊ ਸਰਵੇਖਣ ਮੁਤਾਬਕ ਹੁਣ ਸਿਰਫ 45 ਪ੍ਰਤੀਸ਼ਤ ਭਾਰਤੀਆਂ ਦੀ ਅਮਰੀਕਾ ਪ੍ਰਤੀ ਸਕਾਰਾਤਮਕ ਰਾਏ ਹੈ, ਜਦੋਂ ਕਿ 31 ਪ੍ਰਤੀਸ਼ਤ ਦਾ ਨਕਾਰਾਤਮਕ ਵਿਚਾਰ ਹੈ। ਇਸ ਨੂੰ 2002 ਤੋਂ ਬਾਅਦ ਸਭ ਤੋਂ ਵੱਧ ਨਕਾਰਾਤਮਕ ਅੰਕੜਾ ਮੰਨਿਆ ਜਾ ਰਿਹਾ ਹੈ।
2025 ਦੇ ਸਰਵੇਖਣ ਵਿੱਚ 52 ਪ੍ਰਤੀਸ਼ਤ ਭਾਰਤੀਆਂ ਨੇ ਟਰੰਪ ਵਿੱਚ ਵਿਸ਼ਵਾਸ ਪ੍ਰਗਟ ਕੀਤਾ, ਜਦੋਂ ਕਿ ਅਮਰੀਕਾ ਬਾਰੇ ਸਕਾਰਾਤਮਕ ਰਾਏ 54 ਪ੍ਰਤੀਸ਼ਤ ਅਤੇ ਨਕਾਰਾਤਮਕ ਸਿਰਫ 19 ਪ੍ਰਤੀਸ਼ਤ ਸੀ। ਟਰੰਪ ਨੇ ਕਈ ਮੌਕਿਆਂ ‘ਤੇ ਮੋਦੀ ਨੂੰ ਆਪਣਾ ‘ਲੰਬੇ ਸਮੇਂ ਦਾ ਦੋਸਤ’, ‘ਮਹਾਨ ਦੋਸਤ’ ਅਤੇ ‘ਮੇਰਾ ਦੋਸਤ’ ਕਿਹਾ ਹੈ। ਮੋਦੀ ਨੇ ਟਰੰਪ ਨੂੰ ‘ਮੇਰਾ ਦੋਸਤ, ਰਾਸ਼ਟਰਪਤੀ ਡੋਨਾਲਡ ਟਰੰਪ’ ਕਿਹਾ ਹੈ। 2025-2026 ਵਿੱਚ ਟੈਰਿਫ, ਵਪਾਰਕ ਤਣਾਅ, ਰੂਸੀ ਤੇਲ ਅਤੇ ਹੋਰ ਮੁੱਦਿਆਂ ਦੇ ਬਾਵਜੂਦ, ਦੋਵਾਂ ਨੇਤਾਵਾਂ ਨੇ ਜਨਤਕ ਤੌਰ ‘ਤੇ ਆਪਣੀ ਨਿੱਜੀ ਦੋਸਤੀ ‘ਤੇ ਜ਼ੋਰ ਦਿੱਤਾ ਹੈ।
ਤਾਂ ਫਿਰ ਕਿਹੜੇ ਮੁੱਦਿਆਂ ‘ਤੇ ਭਾਰਤੀ ਟਰੰਪ ਤੋਂ ਨਾਰਾਜ਼ ਹਨ?
ਪਿਊ ਸਰਵੇਖਣ ਮੁਤਾਬਕ ਭਾਰਤੀ ਟਰੰਪ ਪ੍ਰਸ਼ਾਸਨ ਦੇ ਟੈਰਿਫ, ਈਰਾਨ ਤੇ ਵੈਨੇਜ਼ੂਏਲਾ ਬਾਰੇ ਫੈਸਲੇ, ਸਖਤ ਇਮੀਗ੍ਰੇਸ਼ਨ ਨੀਤੀ, ਗਾਜ਼ਾ ‘ਤੇ ਇਜ਼ਰਾਈਲੀ ਹਮਲਿਆਂ ਪ੍ਰਤੀ ਰੁਖ, ਰੂਸ-ਯੂਕਰੇਨ ਯੁੱਧ ਨਾਲ ਨਜਿੱਠਣ ਅਤੇ ਕੌਮਾਂਤਰੀ ਏਜੰਸੀਆਂ ਦੀ ਸਹਾਇਤਾ ਬੰਦ ਕਰਨ ਦੇ ਫੈਸਲਿਆਂ ਤੋਂ ਨਾਰਾਜ਼ ਹਨ। ਸਿਰਫ 32 ਪ੍ਰਤੀਸ਼ਤ ਭਾਰਤੀਆਂ ਨੇ ਟਰੰਪ ਦੀ ਇਮੀਗ੍ਰੇਸ਼ਨ ਨੀਤੀ ਦਾ ਸਮਰਥਨ ਕੀਤਾ, ਸਿਰਫ 28 ਪ੍ਰਤੀਸ਼ਤ ਨੇ ਈਰਾਨ ਨੀਤੀ ਦਾ ਸਮਰਥਨ ਕੀਤਾ ਅਤੇ ਸਿਰਫ 17 ਪ੍ਰਤੀਸ਼ਤ ਨੇ ਵੈਨੇਜ਼ੂਏਲਾ ਨੀਤੀ ਦਾ ਸਮਰਥਨ ਕੀਤਾ।
2009 ਵਿੱਚ ਬਰਾਕ ਓਬਾਮਾ ਰਾਸ਼ਟਰਪਤੀ ਬਣੇ, ਤਾਂ ਰਿਕਾਰਡ 76 ਪ੍ਰਤੀਸ਼ਤ ਭਾਰਤੀ ਅਮਰੀਕੀ ਨੀਤੀਆਂ ਨਾਲ ਸਹਿਮਤ ਸਨ। ਓਬਾਮਾ ਨੂੰ ਭਾਰਤੀਆਂ ਤੋਂ ਸਭ ਤੋਂ ਵੱਧ ਸਮਰਥਨ ਮਿਲਿਆ, 2009 ਵਿੱਚ 77 ਪ੍ਰਤੀਸ਼ਤ ਅਤੇ 2015 ਵਿੱਚ 75 ਪ੍ਰਤੀਸ਼ਤ ਨੇ ਉਸ ਵਿੱਚ ਵਿਸ਼ਵਾਸ ਪ੍ਰਗਟ ਕੀਤਾ। ਦਿਲਚਸਪ ਗੱਲ ਇਹ ਹੈ ਕਿ ਟਰੰਪ ਦੇ ਪਹਿਲੇ ਕਾਰਜਕਾਲ ਦੌਰਾਨ 2017 ‘ਚ ਉਸ ਪ੍ਰਤੀ ਵਿਸ਼ਵਾਸ 40 ਪ੍ਰਤੀਸ਼ਤ ਸੀ। 2020 ਤੱਕ ਇਹ ਵਧ ਕੇ 56 ਪ੍ਰਤੀਸ਼ਤ ਹੋ ਗਿਆ। ਇਸੇ ਸਮੇਂ ਦੌਰਾਨ ਅਮਰੀਕਾ ਬਾਰੇ ਸਕਾਰਾਤਮਕ ਰਾਏ ਵੀ 60 ਪ੍ਰਤੀਸ਼ਤ ਤੱਕ ਪਹੁੰਚ ਗਈ। ਹਾਲਾਂਕਿ, ਉਸ ਦੇ ਦੂਜੇ ਕਾਰਜਕਾਲ ਦੌਰਾਨ, ਸ਼ੁਰੂਆਤੀ ਸਕਾਰਾਤਮਕ ਭਾਵਨਾ ਹੌਲੀ-ਹੌਲੀ ਨਕਾਰਾਤਮਕ ਹੋ ਗਈ ਅਤੇ ਹੁਣ ਦੋਵੇਂ ਅੰਕੜੇ ਰਿਕਾਰਡ ਹੇਠਲੇ ਪੱਧਰ ‘ਤੇ ਪਹੁੰਚ ਗਏ ਹਨ।
ਮਾਹਰਾਂ ਦਾ ਮੰਨਣਾ ਹੈ ਕਿ ਟਰੰਪ ਪ੍ਰਸ਼ਾਸਨ ਦੀ ਵਿਦੇਸ਼ ਨੀਤੀ, ਵਪਾਰ ਟੈਰਿਫ, ਇਮੀਗ੍ਰੇਸ਼ਨ ਨਿਯਮਾਂ ਅਤੇ ਕੌਮਾਂਤਰੀ ਟਕਰਾਵਾਂ ‘ਤੇ ਰੁਖ ਨੇ ਭਾਰਤੀਆਂ ਦੀ ਰਾਏ ਨੂੰ ਪ੍ਰਭਾਵਤ ਕੀਤਾ ਹੈ। ਇਹੀ ਕਾਰਨ ਹੈ ਕਿ ਭਾਰਤੀਆਂ ਦੀ ਅਮਰੀਕਾ ਪ੍ਰਤੀ ਸਕਾਰਾਤਮਕ ਧਾਰਨਾ ਵਿੱਚ ਕਾਫੀ ਗਿਰਾਵਟ ਆਈ ਹੈ। ਸਰਵੇਖਣ ਇਹ ਵੀ ਦਰਸਾਉਂਦਾ ਹੈ ਕਿ ਭਾਰਤ-ਅਮਰੀਕਾ ਰਣਨੀਤਕ ਸੰਬੰਧ ਭਾਵੇਂ ਮਜ਼ਬੂਤ ਬਣੇ ਹੋਏ ਹਨ, ਆਮ ਭਾਰਤੀਆਂ ਵਿੱਚ ਅਮਰੀਕੀ ਲੀਡਰਸ਼ਿਪ ਤੇ ਇਸ ਦੀਆਂ ਨੀਤੀਆਂ ਵਿੱਚ ਵਿਸ਼ਵਾਸ ਵਿੱਚ ਕਾਫੀ ਗਿਰਾਵਟ ਆਈ ਹੈ।
