ਡੀ ਐੱਸ ਪੀ ਕੋਲੋਂ 200 ਕਰੋੜ ਦਾ ਖਜ਼ਾਨਾ ਬਰਾਮਦ

ਨਵੀਂ ਦਿੱਲੀ : ਤੇਲੰਗਾਨਾ ‘ਚ ਇੱਕ ਡੀ ਐੱਸ ਪੀ ਕੋਲੋਂ 200 ਕਰੋੜ ਰੁਪਏ ਦਾ ਖਜ਼ਾਨਾ ਬਰਾਮਦ ਹੋਣ ਦੀ ਖ਼ਬਰ ਹੈ। ਤੇਲੰਗਾਨਾ ਭ੍ਰਿਸ਼ਟਾਚਾਰ ਵਿਰੋਧੀ ਬਿਊਰੋ (ਏ ਸੀ ਬੀ) ਨੇ ਡੀ ਐੱਸ ਪੀ ਸੰਕੀਰੈਡੀ ਭੀਮ ਰੈਡੀ ਦੇ 16 ਟਿਕਾਣਿਆਂ ‘ਤੇ ਛਾਪੇਮਾਰੀ ਕੀਤੀ, ਜਿਸ ਦੌਰਾਨ ਸੋਨੇ-ਚਾਂਦੀ ਦੇ ਗਹਿਣੇ, ਨਕਦੀ ਅਤੇ ਹੋਰ ਵੱਖ-ਵੱਖ ਸਰੋਤਾਂ ਤੋਂ ਇਕੱਠੀ ਕੀਤੀ ਜਾਇਦਾਦ ਮਿਲੀ ਹੈ, ਜੋ ਗ਼ੈਰ-ਕਾਨੂੰਨੀ ਢੰਗਾਂ ਅਤੇ ਭ੍ਰਿਸ਼ਟਾਚਾਰ ਕਰਕੇ ਇਕੱਠੀ ਕੀਤੀ ਹੈ। ਤਲਾਸ਼ੀ ਦੌਰਾਨ ਅਧਿਕਾਰੀਆਂ ਨੇ ਤੇਲੰਗਾਨਾ ਅਤੇ ਕਰਨਾਟਕ ਵਿੱਚ ਫੈਲੀਆਂ ਅਚੱਲ ਜਾਇਦਾਦਾਂ ਦੀ ਇੱਕ ਵਿਸ਼ਾਲ ਸ਼੍ਰੇਣੀ ਨਾਲ ਸੰਬੰਧਤ ਦਸਤਾਵੇਜ਼ ਬਰਾਮਦ ਕੀਤੇ। ਇਨ੍ਹਾਂ ਵਿੱਚ ਇਬਰਾਹਿਮਬਾਗ ਵਿੱਚ ਵੈਸੇਲਾ ਮੀਡੋਜ਼ ਵਿਖੇ ਇੱਕ ਵਿਲਾ, ਟੈਲੀਕਾਮ ਨਗਰ ਵਿੱਚ ਇੱਕ ਪੈਂਟਹਾਊਸ ਅਤੇ ਇੱਕ ਫਲੈਟ ਵਾਲਾ ਇੱਕ ਰਿਹਾਇਸ਼ੀ ਘਰ, ਗਾਚੀਬੋਵਲੀ ਵਿੱਚ ਇੱਕ ਹੋਰ ਫਲੈਟ, ਤੇਲਾਪੁਰ ਵਿੱਚ ਦੋ ਰਿਹਾਇਸ਼ੀ ਫਲੈਟ, ਨਾਗੋਲੇ, ਪਤਨਚੇਰੂ ਅਤੇ ਪ੍ਰਗਤੀ ਰਿਜ਼ੋਰਟ ਵਿੱਚ ਕਈ ਖੁੱਲ੍ਹੇ ਪਲਾਟ, ਮਨੀਕੋਂਡਾ ਵਿੱਚ ਵਪਾਰਕ ਜਾਇਦਾਦਾਂ, ਸੰਗਾਰੇਡੀ, ਵਿਕਾਰਾਬਾਦ ਤੇ ਕਰਨਾਟਕ ਵਿੱਚ ਖੇਤੀਬਾੜੀ ਜ਼ਮੀਨ ਅਤੇ ਇੱਕ ਰੇਤ ਮਾਈਨਿੰਗ ਕੰਪਨੀ ਵਿੱਚ 75 ਲੱਖ ਦਾ ਨਿਵੇਸ਼ ਸ਼ਾਮਲ ਹੈ। ਏ ਸੀ ਬੀ ਦੇ ਅਨੁਸਾਰ ਤਲਾਸ਼ੀ ਦੌਰਾਨ ਅਧਿਕਾਰੀ ਦੇ ਘਰ ਤੋਂ ਲੱਗਭੱਗ 3.6 ਲੱਖ ਅਤੇ ਉਸ ਦੇ ਕਥਿਤ ਬੇਨਾਮੀਦਾਰ ਦੇ ਘਰ ਤੋਂ 40 ਲੱਖ ਦੀ ਨਕਦੀ ਵੀ ਬਰਾਮਦ ਹੋਈ। ਅਧਿਕਾਰੀਆਂ ਨੇ ਲੱਗਭੱਗ ਦੋ ਕਿਲੋ ਸੋਨੇ ਦੇ ਗਹਿਣੇ, ਲੱਗਭੱਗ 20 ਕਿਲੋ ਚਾਂਦੀ ਦੇ ਸਾਮਾਨ ਅਤੇ ਕੁੱਲ ਲੱਗਭੱਗ 19.91 ਲੱਖ ਦੇ ਬੈਂਕ ਬੈਲੇਂਸ ਵੀ ਜ਼ਬਤ ਕੀਤੇ। ਏ ਸੀ ਬੀ ਨੇ ਕਿਹਾ ਕਿ ਅਚੱਲ ਜਾਇਦਾਦਾਂ ਦਾ ਬਾਜ਼ਾਰ ਮੁੱਲ ਉਨ੍ਹਾਂ ਦੇ ਦਸਤਾਵੇਜ਼ੀ ਮੁੱਲ ਨਾਲੋਂ ਕਾਫ਼ੀ ਜ਼ਿਆਦਾ ਹੋਣ ਦੀ ਸੰਭਾਵਨਾ ਹੈ। ਘਰ ਦੀ ਤਲਾਸ਼ੀ ਦੌਰਾਨ 23 ਵਿਦੇਸ਼ੀ ਸ਼ਰਾਬ ਦੀਆਂ ਬੋਤਲਾਂ ਵੀ ਮਿਲੀਆਂ।