ਬਸ਼ਰ ਅਲ-ਅਸਦ ਨੂੰ ਸੁਣਾਈ ਮੌਤ ਦੀ ਸਜ਼ਾ

ਦਮਿਸ਼ਕ : ਸੀਰੀਆ ਦੀ ਅਦਾਲਤ ਨੇ ਗੱਦੀਉਂ ਲਾਹੇ ਸ਼ਾਸਕ ਬਸ਼ਰ ਅਲ-ਅਸਦ ਨੂੰ ਉਸ ਦੀ ਗੈਰਹਾਜ਼ਰੀ ਵਿੱਚ ਮੌਤ ਦੀ ਸਜ਼ਾ ਸੁਣਾਈ ਹੈ। ਅਦਾਲਤ ਨੇ ਅਸਦ ਜਿਸ ਦਾ ਦਸੰਬਰ 2024 ਵਿੱਚ ਤਖਤਾ ਪਲਟ ਦਿੱਤਾ ਗਿਆ ਸੀ, ਸੀਰੀਆ ਦੀ ਖਾਨਾਜੰਗੀ ਦੌਰਾਨ ਯੁੱਧ ਅਪਰਾਧ ਅਤੇ ਮਨੁੱਖਤਾ ਵਿਰੁੱਧ ਅਪਰਾਧ ਦੇ ਦੋਸ਼ਾਂ ਤਹਿਤ ਦੋਸ਼ੀ ਠਹਿਰਾਇਆ। ਅਸਦ ਆਪਣੇ ਪਰਵਾਰ ਨਾਲ ਮਾਸਕੋ ਭੱਜ ਗਿਆ ਸੀ, ਕਿਉਂਕਿ ਇਸਲਾਮਿਕ ਫੌਜਾਂ ਨੇ ਉਸ ਦੇ ਸ਼ਾਸਨ ਦੇ ਅੰਤ ਵਿੱਚ ਰਾਜਧਾਨੀ ਦਮਿਸ਼ਕ ਨੂੰ ਘੇਰ ਲਿਆ ਸੀ। ਅਦਾਲਤ ਨੇ ਦੱਖਣੀ ਸੀਰੀਆ ਦੇ ਡੇਰਾ ਪ੍ਰਾਂਤ ਵਿੱਚ ਰਾਜਨੀਤਿਕ ਸੁਰੱਖਿਆ ਦੇ ਸਾਬਕਾ ਮੁਖੀ ਅਤੇਫ਼ ਨਜੀਬ ਨੂੰ ਵੀ ਮੌਤ ਦੀ ਸਜ਼ਾ ਸੁਣਾਈ। ਅਸਦ ਦੇ ਚਚੇਰੇ ਭਰਾ ਨਜੀਬ ‘ਤੇ ਬੱਚਿਆਂ ਸਮੇਤ ਨਜ਼ਰਬੰਦਾਂ ‘ਤੇ ਤਸ਼ੱਦਦ ਦੀ ਨਿਗਰਾਨੀ ਕਰਨ ਅਤੇ ਸੰਘਰਸ਼ ਦੌਰਾਨ ਕਈ ਮੌਤਾਂ ਲਈ ਜ਼ਿੰਮੇਵਾਰ ਹੋਣ ਦਾ ਦੋਸ਼ ਲਗਾਇਆ ਗਿਆ ਸੀ।