ਪੈਰਿਸ : ਮੌਜੂਦਾ ਚੈਂਪੀਅਨ ਬੈਲਜੀਅਮ ਨੇ ਪੈਰਿਸ ਉਲੰਪਿਕਸ ਵਿਚ ਪੁਰਸ਼ ਹਾਕੀ ਦੇ ਪੂਲ ਬੀ ਦੇ ਮੁਕਾਬਲੇ ਵਿਚ ਵੀਰਵਾਰ ਭਾਰਤ ਨੂੰ 2-1 ਨਾਲ ਹਰਾ ਦਿੱਤਾ। ਗਰੁੱਪ ਗੇੜ ਵਿਚ ਭਾਰਤੀ ਹਾਕੀ ਟੀਮ ਦੀ ਇਹ ਪਹਿਲੀ ਹਾਰ ਹੈ। ਅਭਿਸ਼ੇਕ ਨੇ 18ਵੇਂ ਮਿੰਟ ਵਿਚ ਗੋਲ ਕਰਕੇ ਟੀਮ ਨੂੰ ਲੀਡ ਦਿਵਾਈ। ਅੱਧੇ ਸਮੇਂ ਤੱਕ ਭਾਰਤ ਅੱਗੇ ਰਿਹਾ, ਪਰ ਬੈਲਜੀਅਮ ਨੇ ਦੂਜੇ ਅੱਧ ਵਿਚ ਜ਼ੋਰਦਾਰ ਵਾਪਸੀ ਕੀਤੀ। ਟੀਮ ਲਈ ਸਟੌਕਬ੍ਰੋਕਸ ਨੇ 33ਵੇਂ ਤੇ ਜੌਹਨ ਡੋਹਮੈੱਨ ਨੇ 44ਵੇਂ ਮਿੰਟ ਵਿਚ ਗੋਲ ਕੀਤੇ। ਬੈਲਜੀਅਮ ਪੂਲ ਬੀ ਵਿੱਚੋਂ ਪਹਿਲਾਂ ਹੀ ਕੁਆਰਟਰ ਫਾਈਨਲ ਲਈ ਕੁਆਲੀਫਾਈ ਕਰ ਚੁੱਕਾ ਹੈ। ਭਾਰਤ ਨੇ ਹੁਣ ਤੱਕ ਗਰੁੱਪ ਗੇੜ ਵਿਚ ਨਿਊ ਜ਼ੀਲੈਂਡ ਨੂੰ 3-2 ਨਾਲ ਹਰਾਇਆ, ਅਰਜਨਟੀਨਾ ਨਾਲ 1-1 ਨਾਲ ਡਰਾਅ ਖੇਡਿਆ ਤੇ ਆਇਰਲੈਂਡ ਨੂੰ 2-0 ਨਾਲ ਹਰਾਇਆ ਹੈ। ਭਾਰਤ ਸ਼ੁੱਕਰਵਾਰ ਨੂੰ ਆਪਣਾ ਆਖਰੀ ਪੂਲ ਮੈਚ ਆਸਟਰੇਲੀਆ ਖਿਲਾਫ ਖੇਡੇਗਾ।
