ਕਰਾਚੀ : ਪਾਕਿਸਤਾਨ ਕਿ੍ਰਕਟ ਬੋਰਡ (ਪੀ ਸੀ ਬੀ) ਨੇ ਇਤਿਹਾਸ ਰਚਦਿਆਂ ਹਿਨਾ ਮੁਨੱਵਰ ਨੂੰ ਪੁਰਸ਼ ਕਿ੍ਰਕਟ ਟੀਮ ਦੀ ਪਹਿਲੀ ਮਹਿਲਾ ਮੈਨੇਜਰ (ਆਪਰੇਸ਼ਨਜ਼) ਨਿਯੁਕਤ ਕੀਤਾ ਹੈ। ਉਹ ਅਗਾਮੀ ਤਿਕੋਣੀ ਲੜੀ ਤੇ ਚੈਂਪੀਅਨਜ਼ ਟਰਾਫੀ 2025, ਜੋ 19 ਫਰਵਰੀ ਤੋਂ ਕਰਾਚੀ ਵਿੱਚ ਸ਼ੁਰੂ ਹੋ ਰਹੀ ਹੈ, ਤੋਂ ਇਹ ਨਵੀਂ ਜ਼ਿੰਮੇਵਾਰੀ ਸੰਭਾਲੇਗੀ। ਉਂਜ ਸੀਨੀਅਰ ਸੇਵਾਮੁਕਤ ਨੌਕਰਸ਼ਾਹ ਨਵੀਦ ਅਕਬਰ ਚੀਮਾ ਟੀਮ ਮੈਨੇਜਰ ਵਜੋਂ ਭੂਮਿਕਾ ਨਿਭਾਉਂਦੇ ਰਹਿਣਗੇ। ਹਿਨਾ ਦੀ ਚੋਣ ਨੇ ਕਿ੍ਰਕਟ ਪ੍ਰੇਮੀਆਂ, ਮਾਹਰਾਂ ਤੇ ਮੀਡੀਆ ਵਿਚ ਉਤਸੁਕਤਾ ਪੈਦਾ ਕੀਤੀ ਹੈ। ਪੀ ਸੀ ਬੀ ਨਾਲ ਜੁੜੇ ਸੂਤਰ ਮੁਤਾਬਕ ਹਿਨਾ ਮੁਨੱਵਰ ਦੀ ਨਿਯੁਕਤੀ ਟੀਮ ਮੈਨੇਜਮੈਂਟ ਤੇ ਖਿਡਾਰੀਆਂ ਦਰਮਿਆਨ ਸੰਚਾਲਨ ਨੂੰ ਸੁਚਾਰੂ ਬਣਾਉਣ ਦੇ ਮੰਤਵ ਨਾਲ ਕੀਤੀ ਗਈ ਹੈ। ਉਸ ਨੇ ਰਣਨੀਤਕ ਤੇ ਅਗਵਾਈ ਜਿਹੀ ਭੂਮਿਕਾਵਾਂ ਵਿਚ ਕੰਮ ਕੀਤਾ ਹੈ, ਜਿਸ ਕਰਕੇ ਉਸ ਨੂੰ ਪ੍ਰਸ਼ਾਸਨਕ ਕਾਰਜਾਂ ਦਾ ਚੰਗਾ ਤਜਰਬਾ ਹੈ। ਉਹ ਪਿਛਲੇ ਸਾਲ ਪੀ ਸੀ ਬੀ ਵਿੱਚ ਸ਼ਾਮਲ ਹੋਈ ਸੀ ਅਤੇ ਪਾਕਿਸਤਾਨ ਮਹਿਲਾ ਅੰਡਰ-19 ਟੀਮ ਦੀ ਏਸ਼ੀਆ ਕੱਪ ਮੈਨੇਜਰ ਵੀ ਰਹਿ ਚੁੱਕੀ ਹੈ।
