ਹਿੰਦੀ ਮੁਖੌਟਾ, ਸੰਸ�ਿਤ ਲੁਕਿਆ ਚਿਹਰਾ : ਸਟਾਲਿਨ

ਚੇਨਈ : ਕੇਂਦਰ ਵੱਲੋਂ ਹਿੰਦੀ ਮੜ੍ਹਨ ਵਿਰੁੱਧ ਮੋਰਚਾ ਖੋਲ੍ਹਦਿਆਂ ਤਾਮਿਲਨਾਡੂ ਦੇ ਮੁੱਖ ਮੰਤਰੀ ਐਮ ਕੇ ਸਟਾਲਿਨ ਨੇ ਵੀਰਵਾਰ ਇੱਕ ਵਾਰ ਫਿਰ ਕਿਹਾ ਕਿ ਉਨ੍ਹਾ ਦੀ ਸਰਕਾਰ ਸੂਬੇ ਵਿਚ ਹਿੰਦੀ ਨੂੰ ‘ਮੜ੍ਹਨ’ ਦੀ ਇਜਾਜ਼ਤ ਨਹੀਂ ਦੇਵੇਗੀ। ਉਨ੍ਹਾ ਤਾਮਿਲਨਾਡੂ ਵਿੱਚ ਤਾਮਿਲ ਭਾਸ਼ਾ ਤੇ ਸੱਭਿਆਚਾਰ ਦੀ ਰਾਖੀ ਕਰਨ ਦੀ ਸਹੁੰ ਖਾਧੀ। ਹਾਕਮ ਪਾਰਟੀ ਡੀ ਐੱਮ ਕੇ ਦੇ ਵਰਕਰਾਂ ਨੂੰ ਲਿਖੇ ਇੱਕ ਪੱਤਰ ਵਿੱਚ ਸਟਾਲਿਨ ਨੇ ਕਿਹਾਹਿੰਦੀ ਮੜ੍ਹਨ ਦਾ ਵਿਰੋਧ ਕੀਤਾ ਜਾਵੇਗਾ। ਹਿੰਦੀ ਮੁਖੌਟਾ ਹੈ, ਸੰਸਕਿ੍ਰਤ ਲੁਕਿਆ ਹੋਇਆ ਚਿਹਰਾ ਹੈ।
ਡੀ ਐੱਮ ਕੇ ਕੇਂਦਰ ਉੱਤੇ ਦੋਸ਼ ਲਾ ਰਹੀ ਹੈ ਕਿ ਕੌਮੀ ਸਿੱਖਿਆ ਨੀਤੀ (ਐੱਨ ਈ ਪੀ) ਤਹਿਤ ਤਿੰਨ-ਭਾਸ਼ਾਈ ਫਾਰਮੂਲੇ ਰਾਹੀਂ ਕੇਂਦਰ ਵੱਲੋਂ ਸੂਬੇ ਉਤੇ ਹਿੰਦੀ ਮੜ੍ਹੀ ਜਾ ਰਹੀ ਹੈ। ਉਂਜ ਕੇਂਦਰ ਸਰਕਾਰ ਨੇ ਇਨ੍ਹਾਂ ਦੋਸ਼ਾਂ ਨੂੰ ਰੱਦ ਕੀਤਾ ਹੈ।
ਪੱਤਰ ਵਿੱਚ ਸਟਾਲਿਨ ਨੇ ਦਾਅਵਾ ਕੀਤਾ ਕਿ ਬਿਹਾਰ, ਯੂ ਪੀ ਅਤੇ ਮੱਧ ਪ੍ਰਦੇਸ਼ ਵਿੱਚ ਬੋਲੀਆਂ ਜਾਣ ਵਾਲੀਆਂ ਬਹੁਤ ਸਾਰੀਆਂ ਉੱਤਰੀ ਭਾਰਤੀ ਭਾਸ਼ਾਵਾਂ ਜਿਵੇਂ ਕਿ ਮੈਥਿਲੀ, ਬ੍ਰਜਭਾਸ਼ਾ, ਬੁੰਦੇਲਖੰਡੀ ਅਤੇ ਅਵਧੀ ਨੂੰ ਗਲਬਾਕਾਰੀ ਹਿੰਦੀ ਵੱਲੋਂ ਤਬਾਹ ਕਰ ਦਿੱਤਾ ਗਿਆ ਹੈ।
ਡੀ ਐੱਮ ਕੇ ਮੁਖੀ ਸਟਾਲਿਨ ਨੇ ਦੋਸ਼ ਲਾਇਆ ਕਿ 25 ਤੋਂ ਵੱਧ ਉੱਤਰ ਭਾਰਤੀ ਮੂਲ ਭਾਸ਼ਾਵਾਂ ਨੂੰ ਹਿੰਦੀ-ਸੰਸਕਿ੍ਰਤ ਭਾਸ਼ਾਵਾਂ ਦੇ ਹਮਲੇ ਰਾਹੀਂ ਤਬਾਹ ਕਰ ਦਿੱਤਾ ਗਿਆ ਹੈ। ਸਦੀ ਪੁਰਾਣੀ ਦ੍ਰਾਵਿੜ ਲਹਿਰ ਨੇ ਤਾਮਿਲ ਅਤੇ ਇਸ ਦੇ ਸੱਭਿਆਚਾਰ ਦੀ ਰਾਖੀ ਕੀਤੀ, ਕਿਉਂਕਿ ਇਸ ਨੇ ਜਾਗਰੂਕਤਾ ਪੈਦਾ ਕੀਤੀ ਅਤੇ ਵੱਖ-ਵੱਖ ਅੰਦੋਲਨ ਚਲਾਏ। ਉਨ੍ਹਾ ਕਿਹਾ ਕਿ ਤਾਮਿਲਨਾਡੂ ਵੱਲੋਂ ਐੱਨ ਈ ਪੀ ਦਾ ਵਿਰੋਧ ਇਸੇ ਕਾਰਨ ਕੀਤਾ ਜਾ ਰਿਹਾ ਹੈ, ਕਿਉਂਕਿ ਕੇਂਦਰ ਵੱਲੋਂ ਸਿੱਖਿਆ ਨੀਤੀ ਰਾਹੀਂ ਹਿੰਦੀ ਅਤੇ ਸੰਸਕਿ੍ਰਤ ਮੜ੍ਹਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
ਉਨ੍ਹਾ ਭਾਜਪਾ ਦੇ ਇਸ ਦਾਅਵੇ ਨੂੰ ਖਾਰਜ ਕਰ ਦਿੱਤਾ ਕਿ ਐੱਨ ਈ ਪੀ ਤਹਿਤ ਤੀਜੀ ਭਾਸ਼ਾ ਵਿਦੇਸ਼ੀ ਵੀ ਹੋ ਸਕਦੀ ਹੈ। ਸਟਾਲਿਨ ਨੇ ਦਾਅਵਾ ਕੀਤਾ ਕਿ ਤਿੰਨ-ਭਾਸ਼ਾਈ ਫਾਰਮੂਲੇ ਤਹਿਤ ਕਈ ਰਾਜਾਂ ਵਿੱਚ ਸਿਰਫ ਸੰਸਕਿ੍ਰਤ ਨੂੰ ਉਤਸ਼ਾਹਤ ਕੀਤਾ ਜਾ ਰਿਹਾ ਹੈ। ਉਨ੍ਹਾ ਦਾਅਵਾ ਕੀਤਾ ਕਿ ਭਾਜਪਾ ਸ਼ਾਸਤ ਰਾਜਸਥਾਨ ਵਿੱਚ ਉਰਦੂ ਇੰਸਟ੍ਰਕਟਰਾਂ ਦੀ ਬਜਾਏ ਸੰਸਕਿ੍ਰਤ ਅਧਿਆਪਕਾਂ ਦੀ ਨਿਯੁਕਤੀ ਹੋ ਰਹੀ ਹੈ।