ਸ਼ਿਮਲਾ : ਅੰਮਿ੍ਰਤਸਰ ਬੱਸ ਸਟੈਂਡ ’ਤੇ ਸ਼ੁੱਕਰਵਾਰ ਰਾਤ ਹਿਮਾਚਲ ਰੋਡ ਟਰਾਂਸਪੋਰਟ ਕਾਰਪੋਰੇਸ਼ਨ (ਐੱਚ ਆਰ ਟੀ ਸੀ) ਦੀਆਂ ਤਿੰਨ ਬੱਸਾਂ ਦੇ ਅਗਲੇ ਸ਼ੀਸ਼ੇ ਤੋੜ ਦਿੱਤੇ ਗਏ, ਜਦੋਂਕਿ ਅੰਮਿ੍ਰਤਸਰ-ਹਮੀਰਪੁਰ ਰੂਟ ’ਤੇ ਦੀ ਬੱਸ ’ਤੇ ਨਾਅਰੇ ਲਿਖ ਦਿੱਤੇ ਗਏ। ਪ੍ਰਭਾਵਤ ਬੱਸਾਂ ਵਿੱਚ ਅੰਮਿ੍ਰਤਸਰ-ਬਿਲਾਸਪੁਰ, ਅੰਮਿ੍ਰਤਸਰ-ਸੁਜਾਨਪੁਰ ਅਤੇ ਅੰਮਿ੍ਰਤਸਰ-ਜਵਾਲਾ ਜੀ ਰੂਟਾਂ ’ਤੇ ਚੱਲਣ ਵਾਲੀਆਂ ਬੱਸਾਂ ਸ਼ਾਮਲ ਹਨ। ਐੱਚ ਆਰ ਟੀ ਸੀ ਦੇ ਮੈਨੇਜਿੰਗ ਡਾਇਰੈਕਟਰ ਨਿਪੁਨ ਜਿੰਦਲ ਨੇ ਕਿਹਾ ਕਿ ਮਾਮਲਾ ਅੰਮਿ੍ਰਤਸਰ ਪੁਲਸ ਦੇ ਧਿਆਨ ਵਿੱਚ ਲਿਆਂਦਾ ਗਿਆ ਹੈ।
ਭੰਨ-ਤੋੜ ਦੀ ਇਹ ਕਾਰਵਾਈ ਇਸ ਤੋਂ ਪਹਿਲਾਂ ਖਰੜ ਵਿੱਚ ਤੋੜੀ ਗਈ ਬੱਸ ਤੋਂ ਬਾਅਦ ਹਿਮਾਚਲ ਪ੍ਰਦੇਸ਼ ਅਤੇ ਪੰਜਾਬ ਦੇ ਮੁੱਖ ਮੰਤਰੀਆਂ ਵਿਚਕਾਰ ਪਹਿਲਾਂ ਹੋਈ ਗੱਲਬਾਤ ਦੇ ਬਾਵਜੂਦ ਵਾਪਰੀ ਹੈ। ਗੱਲਬਾਤ ਦੌਰਾਨ ਮੁੱਦੇ ਨੂੰ ਹੱਲ ਕਰਨ ਲਈ ਡੀ ਜੀ ਪੀ ਪੱਧਰ ਦੇ ਅਧਿਕਾਰੀਆਂ ਨੂੰ ਸੌਂਪਣ ਲਈ ਸਹਿਮਤੀ ਜਤਾਈ ਗਈ ਸੀ।
