ਅਪ੍ਰੇਸ਼ਨ ਸਿੰਧੂਰ ਸ਼ਤਰੰਜ ਦੀ ਬਾਜ਼ੀ ਵਰਗਾ ਸੀ : ਜਨਰਲ ਦਿਵੇਦੀ

ਚੇਨੱਈ : ਥਲ ਸੈਨਾ ਮੁਖੀ ਜਨਰਲ ਉਪਿੰਦਰ ਦਿਵੇਦੀ ਨੇ ਕਿਹਾ ਹੈ ਕਿ ‘ਅਪ੍ਰੇਸ਼ਨ ਸਿੰਧੂਰ’ ਕਿਸੇ ਵੀ ਰਵਾਇਤੀ ਮਿਸ਼ਨ ਨਾਲੋਂ ਵੱਖ ਸੀ ਤੇ ਇਹ ਸ਼ਤਰੰਜ ਦੀ ਬਾਜ਼ੀ ਜਿਹਾ ਸੀ, ਕਿਉਂਕਿ ‘ਸਾਨੂੰ ਨਹੀਂ ਪਤਾ ਸੀ’ ਕਿ ਦੁਸ਼ਮਣ ਦੀ ਅਗਲੀ ਚਾਲ ਕੀ ਹੋਵੇਗੀ। ਆਈ ਆਈ ਟੀ ਮਦਰਾਸ ਵਿੱਚ ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਉਨ੍ਹਾ 22 ਅਪਰੈਲ ਦੇ ਪਹਿਲਗਾਮ ਹਮਲੇ ਦੀ ਜਵਾਬੀ ਕਾਰਵਾਈ ਵਜੋਂ ਦਹਿਸ਼ਤੀ ਢਾਂਚੇ ਨੂੰ ਨਿਸ਼ਾਨਾ ਬਣਾ ਕੇ ਕੀਤੀ ਗਈ ਭਾਰਤ ਦੀ ਫੈਸਲਾਕੁੰਨ ਫੌਜੀ ਕਾਰਵਾਈ ਦੀਆਂ ਪੇਚੀਦਗੀਆਂ ਨੂੰ ਯਾਦ ਕੀਤਾ। ਜਨਰਲ ਦਿਵੇਦੀ ਨੇ ਇਸ ਨੂੰ ਸ਼ਤਰੰਜ ਦੀ ਬਾਜ਼ੀ ਦੱਸਿਆ। ਉਨ੍ਹਾ ਕਿਹਾ, ‘‘ਅਪ੍ਰੇਸ਼ਨ ਸਿੰਧੂਰ ਵਿੱਚ ਅਸੀਂ ਸ਼ਤਰੰਜ ਦੀ ਬਾਜ਼ੀ ਖੇਡੀ। ਇਸ ਦਾ ਕੀ ਮਤਲਬ ਹੈ। ਇਸ ਦਾ ਮਤਲਬ ਹੈ ਕਿ ਸਾਨੂੰ ਨਹੀਂ ਪਤਾ ਸੀ ਕਿ ਦੁਸ਼ਮਣ ਦੀ ਅਗਲੀ ਚਾਲ ਕੀ ਹੋਵੇਗੀ ਤੇ ਅਸੀਂ ਕੀ ਕਰਨ ਵਾਲੇ ਹਾਂ। ਇਸ ਨੂੰ ਅਸੀਂ ‘ਗ੍ਰੇਅ ਜ਼ੋਨ’ ਕਹਿੰਦੇ ਹਾਂ। ਗ੍ਰੇਅ ਜ਼ੋਨ ਦਾ ਮਤਲਬ ਹੈ ਕਿ ਅਸੀਂ ਰਵਾਇਤੀ ਅਪ੍ਰੇਸ਼ਨ ਨਹੀਂ ਕਰ ਰਹੇ, ਪਰ ਅਸੀਂ ਕੁਝ ਅਜਿਹਾ ਕਰ ਰਹੇ ਹਾਂ ਜੋ ਰਵਾਇਤੀ ‘ਅਪ੍ਰੇਸ਼ਨ’ ਤੋਂ ਥੋੜ੍ਹਾ ਵੱਖ ਹੋਵੇ।’’
ਉਨ੍ਹਾ ਕਿਹਾ, ‘‘ਰਵਾਇਤੀ ਅਪ੍ਰੇਸ਼ਨ ਦਾ ਮਤਲਬ ਹੈ, ਸਭ ਕੁਝ ਲੈ ਕੇ ਜਾਓ, ਜੋ ਕੁਝ ਤੁਹਾਡੇ ਕੋਲ ਹੈ ਉਸ ਨੂੰ ਲੈ ਜਾਓ ਤੇ ਜੇ ਵਾਪਸ ਆ ਸਕਦੇ ਹੋ ਤਾਂ ਵਾਪਸ ਆ ਜਾਓ, ਨਹੀਂ ਤਾਂ ਉਥੇ ਰਹੋ। ਇਸ ਨੂੰ ਰਵਾਇਤੀ ਤਰੀਕਾ ਕਿਹਾ ਜਾਂਦਾ ਹੈ। ਇਥੇ ਗ੍ਰੇਅ ਜ਼ੋਨ ਦਾ ਮਤਲਬ ਹੈ ਹਰ ਖੇਤਰ ਵਿੱਚ ਹੋਣ ਵਾਲੀ ਕੋਈ ਵੀ ਸਰਗਰਮੀ, ਤੇ ‘ਅਪ੍ਰੇਸ਼ਨ ਸਿੰਧੂਰ’ ਨੇ ਸਾਨੂੰ ਸਿਖਾਇਆ ਹੈ ਇਹੀ ‘ਗ੍ਰੇਅ ਜ਼ੋਨ’ ਹੈ।’’
ਥਲ ਸੈਨਾ ਮੁਖੀ ਨੇ ਕਿਹਾ, ‘‘ਅਸੀਂ ਸ਼ਤਰੰਜ ਦੀ ਬਾਜ਼ੀ ਖੇਡ ਰਹੇ ਸੀ ਤੇ ਉਹ (ਦੁਸ਼ਮਣ) ਵੀ ਸ਼ਤਰੰਜ ਦੀਆਂ ਚਾਲਾਂ ਚੱਲ ਰਿਹਾ ਸੀ। ਕਿਤੇ ਅਸੀਂ ਉਨ੍ਹਾਂ ਨੂੰ ਸ਼ਹਿ ਤੇ ਮਾਤ ਦੇ ਰਹੇ ਸੀ, ਤੇ ਕਿਤੇ ਅਸੀਂ ਆਪਣੀ ਜਾਨ ਗੁਆਉਣ ਦੇ ਦਾਅ ਉੱਤੇ ਵੀ ਉਨ੍ਹਾਂ ਨੂੰ ਮਾਤ ਦੇਣ ਦੀ ਕੋਸ਼ਿਸ਼ ਕਰ ਰਹੇ ਸੀ, ਪਰ ਜ਼ਿੰਦਗੀ ਦਾ ਇਹੀ ਮਤਲਬ ਹੈ।’’