ਓਡੀਸ਼ਾ ’ਚ ਵੀ ਗੇੜਾ ਹੋਇਆ : ਕਾਂਗਰਸ

ਭੁਬਨੇਸ਼ਵਰ : ਓਡੀਸ਼ਾ ਵਿੱਚ ਵਿਰੋਧੀ ਧਿਰ ਕਾਂਗਰਸ ਨੇ ਦੋਸ਼ ਲਗਾਇਆ ਕਿ ਪਿਛਲੇ ਸਾਲ ਵਿਧਾਨ ਸਭਾ ਅਤੇ ਲੋਕ ਸਭਾ ਦੀਆਂ ਇੱਕੋ ਸਮੇਂ ਹੋਈਆਂ ਚੋਣਾਂ ਦੌਰਾਨ ਸੂਬੇ ਵਿੱਚ ਬੇਨੇਮੀਆਂ ਹੋਈਆਂ ਸਨ। ਇੱਥੇ ਪ੍ਰੈੱਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਸੂਬਾ ਕਾਂਗਰਸ ਪ੍ਰਧਾਨ ਭਗਤ ਚਰਨ ਦਾਸ ਨੇ ਦਾਅਵਾ ਕੀਤਾ ਕਿ ਵੋਟਿੰਗ ਵਾਲੇ ਦਿਨ ਸ਼ਾਮ 5 ਵਜੇ ਤੋਂ ਰਾਤ 9 ਵਜੇ ਦੇ ਦਰਮਿਆਨ ਸੂਬੇ ਵਿੱਚ ਲੱਗਭੱਗ 42 ਲੱਖ ਵੋਟਾਂ ਪਈਆਂ। ਉਨ੍ਹਾ ਪੁੱਛਿਆ, ‘‘ਸ਼ਾਮ ਨੂੰ ਇੰਨੀ ਵੱਡੀ ਗਿਣਤੀ ਵਿੱਚ ਵੋਟਰ ਪੋਲਿੰਗ ਸਟੇਸ਼ਨਾਂ ’ਤੇ ਕਿਵੇਂ ਆਏ?’’ ਦਾਸ ਨੇ ਬੀਜੂ ਜਨਤਾ ਦਲ (ਬੀ ਜੇ ਡੀ) ਦੇ ਓਡੀਸ਼ਾ ਵਿੱਚ ਇੱਕ ਵੀ ਲੋਕ ਸਭਾ ਸੀਟ ਨਾ ਜਿੱਤਣ ’ਤੇ ਵੀ ਸਵਾਲ ਉਠਾਏ। ਦਾਸ ਨੇ ਕਿਹਾ, ‘‘ਬੀਜੇਡੀ ਨੇ 51 ਵਿਧਾਨ ਸਭਾ ਸੀਟਾਂ ਜਿੱਤੀਆਂ, ਪਰ ਇੱਕ ਵੀ ਲੋਕ ਸਭਾ ਹਲਕਾ ਜਿੱਤਣ ਵਿੱਚ ਅਸਮਰੱਥ ਰਹੀ। ਬੀ ਜੇ ਡੀ ਨੇ ਕੁਝ ਲੋਕ ਸਭਾ ਹਲਕਿਆਂ ਵਿੱਚ ਚਾਰ ਜਾਂ ਪੰਜ ਵਿਧਾਨ ਸਭਾ ਸੀਟਾਂ ਜਿੱਤੀਆਂ, ਪਰ ਇਸ ਦੇ ਉਮੀਦਵਾਰ ਸੰਸਦ ਮੈਂਬਰ ਨਹੀਂ ਬਣ ਸਕੇ। ਇਹ ਕਿਵੇਂ ਹੋਇਆ?’’ ਦਾਸ ਨੇ ਕਿਹਾ ਕਿ ਕਾਂਗਰਸ ਨੇ ਸਿਰਫ ਇੱਕ ਲੋਕ ਸਭਾ ਸੀਟ, ਕੋਰਾਪੁਟ ਜਿੱਤੀ, ਕਿਉਂਕਿ ਪਾਰਟੀ ਨੇ ਸੱਤ ਹਲਕਿਆਂ ਵਿੱਚੋਂ ਛੇ ਜਿੱਤੇ, ਜੋ ਇਸ ਦਾ ਹਿੱਸਾ ਹਨ। ਦਾਸ ਨੇ ਕਿਹਾ, ‘‘ਕਾਂਗਰਸ ਸੋਮਵਾਰ ਨੂੰ ਹਰ ਜ਼ਿਲ੍ਹੇ ਵਿੱਚ ਇੱਕ ਪ੍ਰੈੱਸ ਕਾਨਫਰੰਸ ਕਰੇਗੀ ਤਾਂ ਜੋ ਲੋਕਾਂ ਨੂੰ ਦੱਸਿਆ ਜਾ ਸਕੇ ਕਿ ਕਿਵੇਂ ਚੋਣ ਕਮਿਸ਼ਨ ਨੇ ਵੋਟ ਚੋਰੀ ਕਰਕੇ ਉਨ੍ਹਾਂ ਨਾਲ ਧੋਖਾ ਕੀਤਾ ਅਤੇ ਭਾਜਪਾ ਨੂੰ ਸੱਤਾ ਵਿੱਚ ਲਿਆਂਦਾ।’’ ਉਧਰ, ਸੀਨੀਅਰ ਭਾਜਪਾ ਆਗੂ ਜੈਨਾਰਾਇਣ ਮਿਸ਼ਰਾ ਨੇ ਦੋਸ਼ਾਂ ਨੂੰ ਰੱਦ ਕਰਦੇ ਹੋਏ ਕਿਹਾ, ‘‘ਕਾਂਗਰਸ ਲੋਕਾਂ ਨੂੰ ਗੁੰਮਰਾਹ ਕਰ ਰਹੀ ਹੈ। ਜੇ ਉਨ੍ਹਾਂ ਕੋਲ ਸਬੂਤ ਅਤੇ ਦਸਤਾਵੇਜ਼ ਹਨ, ਤਾਂ ਉਨ੍ਹਾਂ ਨੂੰ ਚੋਣ ਕਮਿਸ਼ਨ ਜਾਂ ਸਮਰੱਥ ਅਦਾਲਤਾਂ ਵਿੱਚ ਪਹੁੰਚ ਕਰਨੀ ਚਾਹੀਦੀ ਹੈ।’’