ਭਾਰਤੀ ਨਾਗਰਿਕ ਬਾਰੇ ਸੂਹ ਦੇਣ ਲਈ 50 ਹਜ਼ਾਰ ਡਾਲਰ ਦਾ ਇਨਾਮ

ਨਿਊ ਯਾਰਕ : ਫੈਡਰਲ ਬਿਊਰੋ ਆਫ਼ ਇਨਵੈਸਟੀਗੇਸ਼ਨ (ਐੱਫ ਬੀ ਆਈ) ਨੇ 2017 ਵਿੱਚ ਇੱਕ ਭਾਰਤੀ ਔਰਤ ਅਤੇ ਉਸ ਦੇ ਛੇ ਸਾਲ ਦੇ ਪੁੱਤਰ ਦੇ ਕਤਲ ਵਿੱਚ ਕਥਿਤ ਤੌਰ ’ਤੇ ਸ਼ਾਮਲ ਇੱਕ ਭਾਰਤੀ ਨਾਗਰਿਕ ਬਾਰੇ ਸੂਹ ਦੇਣ ਵਾਲੇ ਲਈ 50 ਹਜ਼ਾਰ ਡਾਲਰ ਤੱਕ ਦਾ ਇਨਾਮ ਦੇਣ ਦਾ ਐਲਾਨ ਕੀਤਾ ਹੈ। 38 ਸਾਲਾ ਨਜ਼ੀਰ ਹਮੀਦ ’ਤੇ ਮਾਰਚ 2017 ਵਿੱਚ ਨਿਊ ਜਰਸੀ ਦੇ ਮੈਪਲ ਸ਼ੇਡ ਵਿੱਚ ਇੱਕ ਅਪਾਰਟਮੈਂਟ ਦੇ ਅੰਦਰ 38 ਸਾਲਾ ਸ਼ਸ਼ੀਕਲਾ ਨਾਰਾ ਅਤੇ ਉਸ ਦੇ ਪੁੱਤਰ ਅਨੀਸ਼ ਨਾਰਾ ਦੇ ਕਤਲ ਦਾ ਦੋਸ਼ ਲਗਾਇਆ ਗਿਆ ਹੈ। ਇਸ ਸਾਲ ਫਰਵਰੀ ਵਿੱਚ ਹਮੀਦ ’ਤੇ ਫਸਟ ਡਿਗਰੀ ਕਤਲ ਦੇ ਦੋ ਮਾਮਲੇ, ਗੈਰ-ਕਾਨੂੰਨੀ ਉਦੇਸ਼ ਲਈ ਹਥਿਆਰ ਰੱਖਣ ਦੇ ਦੋ ਕੇਸ ਅਤੇ ਹਥਿਆਰ ਰੱਖਣ ਦੇ ਗੈਰ-ਕਾਨੂੰਨੀ ਕਬਜ਼ੇ ਦਾ ਦੋਸ਼ ਲਗਾਇਆ ਗਿਆ ਸੀ। ਅਮਰੀਕੀ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਹਮੀਦ ਕਤਲਾਂ ਤੋਂ ਛੇ ਮਹੀਨਿਆਂ ਬਾਅਦ ਭਾਰਤ ਵਾਪਸ ਆ ਗਿਆ ਸੀ ਅਤੇ ਅੱਜ ਤੱਕ ਉੱਥੇ ਹੀ ਹੈ। ਬਰਲਿੰਗਟਨ ਕਾਉਂਟੀ ਪ੍ਰੋਸੀਕਿਊਟਰ ਦੇ ਦਫ਼ਤਰ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਜਿਵੇਂ-ਜਿਵੇਂ ਕਤਲਾਂ ਦੀ ਜਾਂਚ ਅੱਗੇ ਵਧੀ, ਉਸ ਨੂੰ ਖਾਸ ਲੋੜੀਂਦੇ ਵਿਅਕਤੀ ਵਜੋਂ ਪਛਾਣਿਆ ਗਿਆ, ਕਿਉਂਕਿ ਇਹ ਖੁਲਾਸਾ ਹੋਇਆ ਸੀ ਕਿ ਉਹ ਪੀੜਤਾ ਦੇ ਪਤੀ ਅਤੇ ਪਿਤਾ ਹਨੂਮੰਤ ਨਾਰਾ ਦਾ ਪਿੱਛਾ ਕਰ ਰਿਹਾ ਸੀ। ਹਮੀਦ ਦੀ ਗਿ੍ਰਫਤਾਰੀ ਲਈ ਇੱਕ ਰਾਜ ਵਾਰੰਟ ਜਾਰੀ ਕੀਤਾ ਗਿਆ ਸੀ ਅਤੇ ਐੱਫ ਬੀ ਆਈ ਹਮੀਦ ਦੀ ਗਿ੍ਰਫਤਾਰੀ ਜਾਂ ਦੋਸ਼ੀ ਠਹਿਰਾਏ ਜਾਣ ਦੀ ਅਗਵਾਈ ਕਰਨ ਵਾਲੀ ਜਾਣਕਾਰੀ ਲਈ 50 ਹਜ਼ਾਰ ਡਾਲਰ ਤੱਕ ਦਾ ਇਨਾਮ ਦੇ ਰਿਹਾ ਹੈ। ਹਮੀਦ ਬਾਰੇ ਜਾਣਕਾਰੀ ਐੱਫ ਬੀ ਆਈ ਦੀ ‘ਮੋਸਟ ਵਾਂਟੇਡ’ ਵੈੱਬਸਾਈਟ ’ਤੇ ਸੂਚੀਬੱਧ ਹੈ।